Tatalaina o Faaipoipoga
O se faaipoipoga lelei e le manaomia ai se alii po o se tamaitai ua atoatoa. E na ona manaomia ai o se alii ma se tamaitai e tautino atu e taumafai faatasi e agai atu i le faaatoatoaina.
Ua ou lagonaina le musuia o au e talanoa atu e uiga i le tatalaina o faaipoipoga. O se mataupu maaleale lenei aua e aliae ai lagona malolosi mai tagata na aafia ai i auala eseese. O nisi ua manatu o i latou lava po o i latou e pele ia i latou o tagata ua aafia fua i faaipoipoga ua tatalaina. O isi ua manatu o i latou lava o tagata ua faamanuiaina ai. O nisi ua manatu o le tetea o se faamaoniga o le toilalo. Ua manatu isi o se auala tatau e sola ese ai mai le faaipoipoga. Po o le a lava le itu, o le tetea ua aafia ai le tele o aiga i totonu o le Ekalesia.
Po o le a lava lou manatu, faamolemole faafofoga mai a o ou taumafai e talanoa manino atu e uiga i aafiaga o le tetea o se mafutaga faaleaiga e faavavau o loo tatou sailia i lalo o le fuafuaga a le talalelei. Ou te talanoa atu ona o le popole, ae faatasi ai ma le faamoemoe.
I.
Ua tatou ola i se lalolagi lea ua oo ai le manatu atoa e uiga i le faaipoipoga i se tulaga faamatauina, ma o le tetea ua avea o se mea masani.
O le manatu e faapea o loo i ai se lagona malosi o le lalolagi i le faasaoina o faaipoipoga mo le manuia masani, ma le manuia foi o le ulugalii ma le la fanau, ua suia mo le toatele i le manatu e faapea, o le faaipoipoga ua na o se mafutaga patino i le va o ni tagata matutua ua malilie i ai, ma e mafai ona faaleaogaina i le manao o soo se tasi o i laua.1
O atunuu na leai se tulafono e faatagaina ai le tatalaina o faaipoipoga ua faia [lea tulafono], ma o le tele o atunuu na faatagaina le tatalaina o faaipoipoga ua latou faafaigofieina ona maua. Ae paga lea, i lalo o tulafono o loo i ai nei e leai se isi e tuuaia i se teteaga, e mafai ona faigofie atu ona faamutaina se mafutaga o se faaipoipoga ma se toalua ua le manaomia, nai lo se mafutaga i se galuega ma ni tagata faigaluega ua le manaomia. Ua oo lava ina taua e nisi se faaipoipoga muamua o se “faaipoipoga amata,” e pei o se tamai fale e faaaoga e se tagata mo se taimi a o lei toe agai i luma.
O le taumamaina o le manatu e faapea o faaipoipoga e tumau ma e faapelepeleina, e i ai ni ona taunuuga taua. I le ta’a’ina ai i tete’aga a o latou lava matua po o manatu taatele e faapea, o le faaipoipoga o se polo ma o se filifili e taofia ai le faamalieina o le tagata lava ia, o lea ua teena ai e isi talavou le faaipoipoina. O le toatele o e faaipoipo e tetee i le faia o tautinoga aiai, ma ua sauni e sola ese i le luitau ogaoga muamua lava.
O le eseesega, ua lapatai mai perofeta o aso nei e faapea, o le vaai atu i le faaipoipoga “ua na o se maliliega faatauvaa e mafai ona ulufale atu i ai pe a mananao i ai … ma e faamutaina i le faafitauli muamua lava … o se mea leaga ua alagatatau mo se faatamaiaga ogaoga,” ae maise lava tulaga ua pagatia ai le fanau.2
I aso anamua, e oo lava i tulafono faaleaganuu i nisi atunuu ua i ai nei o tatou tagata o le ekalesia, na i ai i alii le pule e tatala ai faaipoipoga ma a latou ava mo soo se mea faatauvaa lava. O lea faiga faamalosia amioletonu o tamaitai na teena e le Faaola, o le na tautino mai:
“Ona o outou loto ina maaa na tuu mai ai e Mose ia te outou e faatea i a outou ava: a e le’i faapea talu mai i le amataga.
“Ou te fai atu foi ia te outou, Ai se faatea i lana ava, a o le’i mulilua ia, ma fai ava i se tasi, ua mulilua ia: o se fai ava i le na faate’aina, ua mulilua foi lea” (Mataio 19:8–9).
O le ituaiga faaipoipoga e manaomia mo le faaeaga—e faavavau le umi ma e uiga faaleatua—e le mafaufau i le tetea. I malumalu o le Alii, e faaipoipoina ai ulugalii mo le faavavau atoa. Ae o nisi faaipoipoga e le agai atu i lena faatulagaga. Ona “o le maaa o o [tatou] loto,” e le o faamamafaina ai i le taimi nei e le Alii ia taunuuga o le tulaga faaselesitila. Na te faatagaina tagata ua tetea e toe faaipoipo e aunoa ma le faailoga tumau o le agasala e pei ona faamaninoina i le tulafono maualuga. Sei vagana ua solia e le tagata ua tetea ni solitulafono matuia, ona mafai lea ona agavaa o ia mo se pepa faataga o le malumalu i lalo o tulaga agavaa lea e faatatau foi i isi tagata o le ekalesia.
II.
Ua toatele tagata lelei o le Ekalesia ua tatalaina faaipoipoga. Ou te talanoa muamua atu ia i latou. Ua matou iloa o le toatele o outou ua aafia fua ae le sala—o i latou ia, o o latou taitoalua muamua ua taufaaoleole soo i feagaiga paia pe lafoaia pe musu foi e faataunuu tiutetauave faalefaaipoipoga mo se taimi umi. O tagata o le ekalesia ua oo i ia ituaiga faatautala, ua latou iloa lelei tulaga e sili atu ona leaga nai lo le tetea.
A mate se faaipoipoga ma ua leai se faamoemoe o le toe faaolaina, e alagatatau ai lava ona i ai se auala e faamutaina ai. Na ou vaai i faataitaiga o lenei tulaga i Filipaina. E lua aso talu ona uma le la faaipoipoga i le malumalu, ae tuua e se tane lana ava talavou, ma e le’i toe maua mai ai lava se tala mo le silia ma le 10 tausaga. Na sola se tamaitai ua faaipoipo ma mafai ona tatala lana faaipoipoga i se isi atunuu, ae o lana tane, o le na tuua, o loo faaipoipo pea i le vaaiga a le tulafono a Filipaina. Talu ai ona e leai se aiaiga mo le tatalaina o faaipoipoga i lalo o le tulafono a lena atunuu, o lea e leai ai se auala e mafai ona fai e nei tagata lē sala ua tuulafoaiina, e faamutaina ai o latou tulaga faalefaaipoipoga ma agai i luma i o latou olaga.
Ua tatou iloa, o nisi e toe mafaufau ifo i a latou teteaga ma ua toe salamo ona o si o latou sasi pe o le sese atoa foi ua mafua ai ona tetea. O i latou uma na oo i le tetea ua iloa le tiga ma le manaomia o le mana faamalolo ma le faamoemoe lea e maua mai i le Togiola. O loo i ai lena mana faamalolo ma lena faamoemoe mo i latou faapena foi mo a latou fanau.
III.
O le a ou talanoa atu nei i tagata ua faaipoipoina, ae maise lava i soo se tasi atonu o loo mafaufau e tatala se faaipoipoga.
Ou te fautuaina malosi oe ma i latou o loo fautuaina oe ina ia silasila i le mea moni lenei, o le tele o faafitauli i faaipoipoga, o le fofo e le o le tetea ae o le salamo. E masani lava o le mafuaaga e le alagatatau, ae o le manatu faapito lava. O le laasaga muamua lava e le o le tetea, ae o le toe suia o le tagata lava ia. O le tetea e le o se tali aoga lea, ma e tele ina afua mai ai le lototiga mo se taimi umi. O se sailiga lautele faavaomalo i le tulaga o le fiafia i luma ma tua mai o “mea aupito taua e tutupu i le olaga” na iloa ai, o le averesi o tagata e sili atu ona faamanuiaina lo latou toe maua o le fiafia pe a mavae le maliu o se toalua nai lo le mavae ai o le tatalaina o se faaipoipoga.3 O taitoalua o ē faamoemoe o le tatalaina o le faaipoipoga o le a foia ai feeseeseaiga, e masani ona latou iloa ai o le faapogai lea o isi faafitauli e tele, ona o lavelave e sosoo mai ma le tetea—ae maise lava i tulaga o loo i ai se fanau—e matua’ia ai ni faafitauli fou.
Mafaufau muamua i tamaiti. Aua o le tetea e tuueseeseina ai manaoga o tamaiti mai manaoga o o latou matua, o tamaiti e muamua lava aafia. Ua tau mai e le au faitofa o le olaga faaleaiga, o le mafuaaga autu lava o le faiifo o loo i ai nei o le manuia o fanau, o le vaivai o loo i ai nei ia faaipoipoga, aua o le le mautu o le aiga e tuuitiitia ai le aafia ma le manatu popole o matua i le fanau.4 Ua tatou iloa, o tamaiti e tausia i se aiga e toatasi se matua i le mavae ai o se teteaga, e tele atu se tulaga lamatia i fualaau oona ma le sauaina ona o le ava malosi, amioga feusuai, le lelei i aoaoga, ma isi ituaiga eseese o amioga le lelei.
E tatau i se ulugalii o loo i ai ni faafitauli ogaoga faalefaaipoipoga ona vaai lo laua epikopo. O le avea ai ma faamasino a le Alii, o le a ia tuuina atu ni fautuaga ma atonu foi o se aoaiga o le a toe taitaiina atu ai i le faamalologa.
E le fautuaina e epikopo ni tagata e tetea, ae e mafai ona latou fesoasoani atu i tagata e uiga i taunuuga o a latou filifiliga. I lalo o le tulafono a le Alii, e pei foi o se ola o se tagata soifua, o se mea ola faapelepele. Afai e mama’i o tatou tino, tatou te saili ina ia toe manuia. Tatou te le fiu. Ona o le i ai o soo se faamoemoega o le ola, tatou te sailia ai pea lava pea le faamalologa. E tatau foi ona moni lea tulaga i a tatou faaipoipoga, ma afai tatou te sailia o Ia, o le a fesoasoani mai le Alii ia i tatou ma faamaloloina i tatou.
E tatau i ulugalii o le Au Paia o Aso e Gata Ai, ona faia mea uma i lo latou malosi e faasaoina ai a latou faaipoipoga. E tatau ona latou mulimuli i le fautuaga o le faatamaoaigaina o le faaipoipoga o loo i le savali a le Au Peresitene Sili i le Liahona o Aperila 2007.5 Ina ia puipui mai le mea ua taua o le “le alagatatau,” e tatau ona avea i latou ma uo lelei, agalelei, ma ia magafagafa, ma mataala i manaoga o le isi, ma taumafai i taimi uma e faafiafia le isi. E tatau ona la faipaaga i mea tautupe a le aiga, e galulue faatasi e pulea o laua manao i mea faalelalolagi.
E moni e i ai taimi e vaivai ai se tasi o le toalua, ma e faamanualia ai le isi ma lagona ai le tiga. Pe a tupu lena mea, o le tagata o loo sese e tatau ona faapaleniina ia tulaga le fiafia o loo i ai nei agai i taimi lelei ua tuanai ma faamoemoega manuia o le lumanai.
Aua nei teulotoina sese ua fano, ma mafaufau pea lava pea i ai. I se mafutaga faalefaaipoipoga, o le faateleina o le loto tiga e faatamaiaina; o le faamagalo atu e paia (tagai MFF 64:9–10). Ia ole atu mo le taitaiga a le Agaga o le Alii e faamagalo atu ai sese, (e pei o lea na faatoa aoaoina ai ma le matagofie i tatou e Peresitene Faust), e lafoai sese, ma ia faamalolosia mafutaga.
Afai ua e i ai nei i le faaifoifo o le tulaga maualalo o le faaipoipo ona o le tulafono, faamolemole ia uu lima, tootutuli faatasi, ma ia augani atu ma le agaga tatalo mo se fesoasoani ma le mana faamalolo o le Togiola. O a outou olega faamaulalo ma le lotogatasi o le a outou latalata atu ai i le Alii ma le tasi i le isi, ma o le a fesoasoani ai ia te oe i le faigata o le malaga toe foi atu i se faaipoipoga fiafia.
Mafaufau i manatu nei a se epikopo atamai ua tele ni ona aafiaga i le fautuaina o tagata o le ekalesia e i ai faafitauli i faaipoipoga. I le saunoa atu ia i latou o e na iu lava ina tetea, fai mai a ia:
“E masani lava, fai mai ulugalii uma lava po o tagata taitoatasi, ua latou iloaina o le tetea e le o se mea lelei, ae na latou finau lava faapea e ese o latou tulaga.
“E masani lava, latou te taulai atu i le sese o le toalua ae tau le taua a latou lava amioga. Na mou atu le fesootaiga.
“E masani lava, sa fai ma latou toe tepa i tua, ae sa le mananao e lafoai amio tuai [a le isi] ae agai i luma.
“E i ai se taimi na aafia ai ni agasala mamafa, ae e masani lava, sa na o le ‘le toe alofa o le tasi i le isi,’ fai mai, ‘Ua ia le toe faamalieina ou manao’ po o le ‘Ua sui lava o ia.’
“Na popole uma i latou i le aafiaga o tamaiti, ae e masani lava o le faaiuga o le ‘e sili atu le leaga ia i latou lo ma i ai ae tauaimisa.’”
O le mea e ese ai, o ulugalii na mulimuli i le fautuaga a lenei epikopo ma nonofo faatasi pea, na tula’i mai na sili atu ona malolosi a latou faaipoipoga. Sa amata lena faamoemoe i a latou lava tautinoga faamaoni ina ia tausi poloaiga, tumau lo latou toaaga e o i le Lotu, faitau tusitusiga paia, ma tatalo, ma galulue i o latou lava vaivaiga. Sa latou “iloaina le taua ma le mana o le Togiola mo o latou taitoalua ma mo i latou lava”, ma “sa latou onosai ma toe taumafai pea lava pea.” Ina ua faatinoina faamaoni e ulugalii na ia fautuaina nei mea, ua salamo ma galulue e faasaoina a latou faaipoipoga, sa lipotia mai e lenei epikopo e faapea, “na maua lava le 100 pasene o le faamalologa i lena taimi.”
E oo lava foi ia i latou o e ua manatu, o o latou taitoalua e tuuaia atoa, e le tatau ona vavevave. O se tasi suesuega na iloa ai “e leai se faamaoniga e faapea, o le tetea po o le nonofo eseese e masani ona maua ai e tagata matutua le fiafia sili atu nai lo le nonofo pea i se faaipoipoga le fiafia. O le lua mai le tolu o faaipoipoga le fiafia o e na aloese mai le tetea, na lipotia mai le faaipoipoina fiafia i le lima tausaga mulimuli ane.”6 O se tamaitai o le na tumau pea i se faaipoipoga tiga mo le tele o tausaga seia oo ina matutua tamaiti, na ia faamatalaina : “E toatolu ni tagata na i ai i le ma faaipoipoga—o lou toalua, o au ma le Alii. Na ou fai ifo ia te au lava, afai e toalua i maua e mafai ona onosaia pea, e mafai lava ona ma faatumauina [le ma faaipoipoga].”
O le mana o le faamoemoe na faailoaina i nei faataitaiga, e i ai taimi e tauia ai i le salamo ma toe faaleleia, ae o nisi foi taimi e leai. E matua eseese lava tulaga faaletagata lava ia. E le mafai ona tatou pulea ma tatou te le nafa foi ma filifiliga a isi, e tusa lava pe i ai ni aafiaga tiga tele ia i tatou. Ou te mautinoa e alofa le Alii ma faamanuiaina tane ma ava o e o loo taumafai ma le alofa e fesoasoani i taitoalua o loo tauivi ma ni faafitauli faapena, e pei o ponokarafi ma isi amioga ua fai ma mausa po o taunuuga umi foi o le sauaina a o laiti.
Po o le a lava le taunuuga ma po o le a foi le faigata o ou aafiaga, ua ia te oe le folafolaga o le a le mafai ona teenaina oe mai faamanuiaga o mafutaga faavavau faaleaiga, pe afai e te alofa i le Alii, tausi Ana poloaiga, ma tau lava ia fai le mea sili e te mafaia. Ina ua pagatia le taulealea o Iakopo i “puapuaga ma faigata e tele” mai amioga a isi tagata o le aiga, na faalaeiau atu Tama Liae ia te ia, “Ua e iloa le silisiliese o le Atua; na te faapaiaina ou puapuaga e foi mou manuia” (2 Nifae 2:2). E faapena foi, le faamautu mai a le Aposetolo o Paulo ia i tatou “E galulue faatasi mea uma e lelei ai i latou e ua alofa atu i le Atua” (Roma 8:28).
IV.
I le faaiuga, ou te talanoa puupuu atu ia i latou o e o loo mafaufau e faaipoipo. O le auala sili ona lelei e aloese ai mai le tetea ma se toalua e le faamaoni, e saua, pe le lagolago atu foi, o le aua lea nei faaipoipo i se tagata faapena. Afai e te manao ina ia e faaipoipo lelei, ia fesilisili lelei. O fegalegaleaiga e ala i le “na o le tafafaovale” po o le feavea’i o faamatalaga i luga o le Initoneti e le o se faavae talafeagai lea mo se faaipoipoga. E tatau ona i ai le tafafao faamasani, sosoo ai ma faamasaniga tumau e faia ma le totoa, magafagafa ma le maeaea. E tatau ona tele ni avanoa e iloa ai amio a se toalua ua faamoemoeina i ni tulaga eseese. E tatau i tagata ua faamau [mo se faaipoipoga] ona aoaoina mea uma latou te mafaia e uiga i aiga o le a latou faatasi atu i ai i le faaipoipoga. I nei mea uma, e tatau ona tatou iloa, o se faaipoipoga lelei e le manaomia ai se alii po o se tamaitai ua atoatoa. E na ona manaomia ai o se alii ma se tamaitai e tautino atu e taumafai faatasi e agai atu i le faaatoatoaina.
Na aoao mai Peresitene Spencer W. Kimball: “O ni tagata se toalua e o atu i le fata faitaulaga o le faaipoipoga, e tatau ona iloa, ina ia maua le faaipoipoga fiafia ua la moomoo i ai, e tatau ona la iloa o le faaipoipoga … o lona uiga o le ositaulaga, fetufaai, ma e oo foi i le tuuitiitia o nisi o saolotoga faaletagata lava ia. O lona uiga o le ola i se taimi umi i se tupe itiiti. O lona uiga o tamaiti lea e oo mai faatasi ma avega tautupe, avega o auaunaga, avega o le tausiga ma le popole; ae o lona uiga foi, o le loloto ma le faamalieina o lagona uma.”7
Mai ou aafiaga patino, ou te molimau atu ai i le faamalieina o le olaga faaipoipoina ma le faaleaiga, lea o loo faamatalaina e le folafolaga i le aiga, ua faavae i le tane ma le ava ua i ai “le tiutetauave paia e alofa ma tausi e le tasi le isi ma a la fanau,” ma “aoaoga a le Alii o Iesu Keriso.”8 Ou te molimau atu ia te Ia o lo tatou Faaola ma ou te tatalo i Lona suafa mo i latou uma o e o loo tauivi mo le faamanuiaga tupito o se aiga e faavavau, i le suafa o Iesu Keriso, amene.