Barbara Thompson
Fesoasoani Lua i le Au Peresitene Aoao a le Aualofa

I le avea ai ma se tasi na taitaifono i le komiti o gaoioiga a le uarota, e sili atu le lagolelei o Barbara Thompson i le ofuina o se ofuvae malo ma tuufaatasi ni pusa o mea e faaaoga mo le ola tumama nai lo le avea ma se tasi o le au pulega aoao a le Aualofa. Ae e faafetai o ia mo le valaauga fou o le avea ma fesoasoani lua i lena au peresitene.

O le avea foi ma se tasi na auauna faamisiona i le Misiona a Germany Hamburg, faiaoga o Mataupu o le Talalelei, faatonu o tolauapiga a Tamaitai Talavou, fautua a le Lora ma le Ofagapi, peresitene o Tamaitai Talavou i le uarota, fesoasoani i le Aualofa a le uarota, ma se tasi o le au taitai aoao a le Aualofa, e talitonu Sister Thompson “a i ai i uso se molimau e uiga i le moni o le talalelei, e faaosofia i latou e faatino.”

Na soifua mai ia W. Peter ma Fern Rymer Thompson i le aso 13 o Iuni, 1952, i San Luis Obispo, Kalefonia, na siitia mulimuli ane ia Sister Thompson ma lona aiga i Granger, Iuta. E fiafia lava o ia taaloga ma tolauapiga, ae o le mea e sili ona fiafia i ai e faapasi ai le taimi o le asiasi atu i uo ma aiga.

Faatasi ai ma se faailoga o le matuaofaiva mai le Iunivesite o Iuta i galuega lautele, na faigaluega ai Sister Thompson i Iuta i le Department of Human Services [Matagaluega o Tautua mo Tagata] mo le 30 tausaga. Talu mai ona litaea, na auauna atu ai o ia o se faatonu sili i se faalapotopotoga faavaomalo lea e auauna atu i fanau e sauaina ma lafoaiina.

E ui lava ina e le’i faaipoipo lava o ia pe fai foi sa na lava fanau, ae fai mai a Sister Thompson, “O loo i ai ni tagata o lou aiga ma ni au uo ou te aumaia, ma ou te maua lava foi i taimi uma le tele o le lagolago mai uso o lenei Ekalesia.”

Ua ia vaaia lana matafaioi fou o se lagolagosua ia Sister Beck. “Ou te fia siiina ae o ia i lona valaauga.”

Ua tulimatai atu Sister Thompson i le faalogoina o molimau a tagata i le lalolagi atoa a o ia auauna atu i ai. O lana savali i ona uso i le Aualofa o le: “Alofa i le Alii. Sau ia Keriso ma lou loto atoa. E tele luitau o loo feagai ma tamaitai, ae a tatou faalagolago i le talalelei ma le faaleusoga ua tatou maua i le Aualofa, o le a faamamaina a tatou avega.”