Elder Claudio D. Zivic
O Le Au Fitugafulu

E talitonu Elder Claudio Daniel Zivic a tatou taumafai e ola amiotonu, e mafai ona tatou faatuatua o le a taitaiina i tatou e le Atua.

Na soifua mai Elder Zivic i le aso 19 o Tesema, 1948, i ni matua o le Au Paia o Aso e Gata Ai o Sergio Jorge Zivic ma Eleonora Zalewski Zivic i Buenos Aires, Atenitina. I le avea ai o se tagata tamoe e 15 tausaga le matua, na tu lua ai o ia i le atunuu i lana tupulaga i le 800 mita. O lona manaoga sili ina ia tauva i le Olimipeka, ma o lona faiaoga, o se tagata na taalo i ni taaloga se tele i le Olimipeka, na talitonu e mafai ona ia faia—pe afai o le a ia lafoaia lona musu e tauva i Aso Sa.

“Sa tatau ona ou filifili,” o le tala lea a Elder Zivic. “I le faaiuga, na ou manatu ai, o le tauva, e le o le mea lea na finagalo i ai le Alii mo au.”

Na feagai foi Elder Zivic ma se isi filifiliga faigata, ina ua oo i le taimi e filifili ai se galuega. Mo ni tausaga sosoo se fa i le aoga maualuga, sa tatau ai ona ia sueina se suega faaopoopo o le tausitusi i le faaiuga o le tausaga, ona sa matuai le lelei lona taumafai i le mataupu lea i le aluga o le tausaga.

“O le mea moni ou te le’i fiafia i le tausitusi,” na ia fai mai ai. Ae ina ua ia mafaufau i ai ma le agaga tatalo i lenei itu faamatata, na malosi lava lona lagona e tatau ona agai atu i le faatausitusi. I le faalagolago ai i le Alii, na ia maua ai lona tikeri faatausitusi mai le Iunivesite o Buenos Aires ma fiafia ai i se galuega o se tausitusi faamaonia a le malo.

Na mafai ona iloa e Elder Zivic le taitaiga a le Alii i lona olaga atoa. “Afai tatou te ou ola amiotonu, o le a Ia faamanuiaina i tatou,” na saunoa ai Elder Zivic. “O le a tuu mai lava mea uma i o latou tulaga e tatau ona i ai.”

Ina ua maea lana tautua i le militeli, na faamauina loa i laua ma lona faletua o Dina Noemí Alvarez, i le aso 9 o Ianuari, 1979, i le Malumalu o São Paulo Pasila. E toalima alo o Elder ma Sister Zivic.

A o le’i valaauina o ia i le Korama Muamua a le Au Fitugafulu, na auauna atu Elder Zivic o se peresitene o le korama a le au toeaina, faiaoga a le inisititiuti, epikopo, fautua maualuga i le siteki, fesoasoani i le peresitene o le siteki, faigaluega i sauniga o le malumalu, sui risone, peresitene o le Misiona a Spain Bilbao, ma Fesoasoani Lua i le Au Peresitene o le Eria a Saute Amerika i Saute.