Salamo ma le Liuaina

Elder Russell M. Nelson

O Le Korama a Aposetolo e Toasefululua

O se agaga ua salamo o se agaga lea ua liua ma o se agaga ua liua o se agaga lea ua salamo.

I le tausaga ua tuanai a o ma tietie atu ma Elder David S. Baxter i se konafesi a le siteki, sa ma afe ai i se faleaiga. Mulimuli ane ina ua ma toe foi i le taavale, na alu atu se tamaitai ma tauvalaau atu ia i ma’ua. Sa ma fememeai ona o ona foliga vaaia. O ana teuga (po o le leai foi) e mafai ona faaupuina faaaloalo o le “soona fai.” Sa fesili mai pe o ma’ua o ni faifeau o le Ekalesia. Sa ma tali atu ioe. Sa toetoe a le taofiofia, lona faamatalaina o le tala i lona olaga matautia, ua matuai lofituina i le agasala. O lenei, i le na o le 28 o tausaga, ua matuai faanoanoa lava o ia. Sa ia lagonaina lona le aoga ma le leai o se faamoemoega e ola ai. A o ia tautala, sa amata ona ma matauina le manaia o lona agaga. Sa ia aioi mai ma loimata pe i ai lava se isi faamoemoe mo ia, se isi auala e sola ese ai mai lona pagatia o loo i ai.

“Ioe,” sa ma tali atu ai, “o loo i ai le faamoemoe. O le faamoemoe e fesootai atu i le salamo. E mafai ona e suia. E mafai ona e ‘sau ia Keriso ma ia faaatoatoaina ia te ia.’”¹ Sa ma uunaiina o ia ina ia aua ne’i tolopoina.² Sa ia masusu ma le faamaulalo ma faafetai faamaoni mai ia i ma’ua.

A o faaauau le ma malaga ma Elder Baxter, sa ma mafaufau loloto i lena mea na ma oo i ai. Sa ma toe manatuaina le fautuaga sa tuuina atu e Arona i se agaga ua leai se faamoemoe, ma faapea atu, “afai e te salamo i au agasala, ma faasifo atu i luma o le Atua, ma valaau atu i lona suafa i le faatuatua, … ona e maua lea o le mea ua e manao i ai.”³

O lenei, i lenei sauniga faaiu o le konafesi aoao, ou te talanoa atu ai i le salamo. Ou te faia aua ua poloaiina e le Alii Ana auauna ina ia talai atu le salamo i nuu uma.⁴ Ua toefuatai mai e le Matai Lana talalelei ina ia aumaia ai le olioli i Lana fanau, ma o le salamo o se vaega taua lea o lena talalelei.⁵

O le aoaoga faavae o le salamo ua loa ona i ai e pei o le talalelei lava ia. O aoaoga faatusipaia mai tusi o Kenese⁶ e oo i le Faaaliga⁷ o loo aoao ai le salamo. O lesona mai ia Iesu Keriso i le taimi o Lana galuega faaletino e aofia ai lapataiga nei: “Ua latalata mai le malo o le Atua: ina salamo ia, ma talitonu i le talalelei,”⁸ ma “Afai tou te le salamo, e faapena lava ona fano outou uma.”⁹

O faamatalaga faamaonia i le salamo o loo sili atu ona tuuina soo mai i le Tusi a Mamona.¹⁰ I tagata o Amerika anamua, na tuuina atu ai le poloaiga lenei a le Alii: “Ou te toe fai atu foi ia te outou, e tatau ona outou salamo, ma papatisoina i lo’u igoa, ma liua ia pei o se tamaitiiti, a leai, e le mafai lava ona fai mo outou tofi le malo o le Atua.”¹¹

Faatasi ma le toefuataiga o le talalelei, ua toe faamamafa mai ai e le Faaola lenei aoaoga faavae. O le upu salamo i soo se faaaogaga e faa-47 ona vaaia i le vaega e 138 o le Mataupu Faavae ma Feagaiga!¹²

Salamo mai Agasala

O le a le uiga o le salamo? Tatou te amata i se faauigaga a le lolomifefiloi e faapea o le salamo “o le liliuese mai le agasala … lagonaina le faanoanoa [ma le] tiga.”¹³ O le salamo mai le agasala e le faigofie. Ae o le taui e taua nai lo le tau. O le salamo e auauai ona laasaga e faia. O le tatalo faamaualalo o le a faaosofia ai ia laasaga taitasi taua uma. I le avea ai ma tulaga manaomia mo le faamagaloga, e tatau ona muamua iloa e le tagata ua agasala, faanoanoa, ona tautau atu lea.¹⁴ “Tou te iloa faapea se ua salamo i ana agasala—faauta, na te tautau atu ma lafoaia.”¹⁵ O le tautau atu e tatau ona faia i le tagata na sese i ai. O le tautau atu e tatau ona faamaoni ae le na o se tautino atu o le tausalaga ina ua mavae ona maua se faamaoniga. Afai e toatele ni tagata na afaina, e tatau ona tautau atu i tagata uma na aafia. O gaoioiga e ono aafia ai le agavaa o se tasi i le Ekalesia po o le aia i ona avanoa, e tatau ona vave ona tautau atu i le epikopo, o le ua valaauina e le Alii o se faamasino ia Isaraelu.¹⁶

O le isi laasaga o le toe totogi—ia toe faaleleia mea ua faaleagaina—pe afai e mafai. A mavae lena o loo i ai ia laasaga o le matuai tautino atu ina ia faia le lelei ma aloese mai le toe faia o le agasala—ia salamo “ma le loto faamaoni.”¹⁷ Talu ai ona o le tau na totogiina e le Togiola a Iesu Keriso, ua tuuina atu ai le faamagaloga atoatoa i le tagata agasala, o le salamo ma tumau saoloto ai mai le agasala.¹⁸ Fai mai Isaia i le agaga ua salamo, “e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe.”¹⁹

O le matuai faatauaina lava e le Alii o le salamo ua matuai manino lava a o tatou faitau mai le vaega e 19 o le Mataupu Faavae ma Feagaiga: “Ou te poloai atu ia te oe ia salamo—salamo, ne’i ou taia oe i la’u upu, i le tiga tele o lo’u loto, ma lo’u ita, ma e faigata tele ou puapuaga—o le tiga e te le’i iloa, ma o le uiga ese o le tiga e te le’i iloa, ioe, o le faigata ona onosai e te le’i iloa.

“Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“A e peitai, afai latou te le salamo, e ao ina latou tiga e pei o a’u.”²⁰

E ui o loo tausisi mai le Alii i lo tatou salamo, o le toatele o tagata latou te le o lagonaina se manaoga malosi faapena.²¹ Latou te manatu o i latou o nisi o e o loo taumafai ia lelei.²² E leai ni o latou faamoemoega leaga. Ae peitai o loo matuai manino lelei le Alii i Lana savali e faapea e moomia e tagata uma ona salamo—e le gata mai agasala o le faia, ae faapea foi i agasala o le le faia. E faapena le tulaga i Lana lapatai atu i matua: “Afai e maua fanau e matua i Siona … e le aoao atu ia te i latou ia malamalama i le mataupu o le salamo, faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia … o le a pau lea agasala i matua.”²³

Uiga Lautele Atu o le Upu Salamo

O le aoaoga faavae o le salamo e lautele atu nai lo le faauigaga a se lolomifefiloi. Ina ua fetalai Iesu “salamo,” sa tusi faamaumau e Ona soo lena poloaiga i le gagana Eleni faatasi ai ma le veape metanoeo.²⁴ O lenei upu mamana e tulaga ese lona taua. O le sope i luma o le meta o lona uiga o le “suia.”²⁵ O le sope i tua e faatatau lea i ni upu Eleni taua se fa: nous, o lona uiga “o le mafaufau”²⁶; gnosis, o lona uiga o le “iloa”²⁷; pneuma, o lona uiga o le “agaga”²⁸; ma le pnoe, o lona uiga o le “manava.”²⁹

O lea la, ina ua fetalai Iesu “salamo,” ua Ia poloaiina i tatou ina ia sui—sui o tatou mafaufau, iloa, ma le agaga, e oo i la tatou manava. Na faamatalaina e se perofeta o se suiga faapea i le manava a se tasi, o le manava lea ma le loto faafetai ia te Ia o le na tuuina atu le manava. Fai mai le Tupu o Peniamina, “Afai tou te auauna atu i Le na faia outou … ma o loo faasaoina foi outou i lea aso ma lea aso, ua tuuina mai foi ia te outou le manava … i lea itula ma lea itula—ou te fai atu, afai tou te auauna atu ia te ia ma o outou agaga atoa, e fai pea outou ma auauna le aoga.”³⁰

Ioe, ua poloai mai le Alii ia i tatou ina ia salamo, ia suia o tatou ala, ia o mai ia te Ia, ma ia avea atili e faapei o Ia.³¹ O lenei mea e matuai moomia ai se suiga atoa. Na faapea ona aoaoina e Alema lona atalii: “Ia e aoao i le poto ina o e taulealea;” na ia fai atu ai, “A o e taulealea, ia e aoao e tausi i poloaiga a le Atua… . Ia liliu atu ou manatu i le Atua, ioe, ia e tuuina atu e faavavau le alofa o lou loto i le Atua.”³²

Ina ia salamo atoatoa o le liuaina atoatoa lea i le Alii o Iesu Keriso ma Lana galuega paia. Na aoaoina e Alema lena manatu ina ua ia fesiligia ia fesili nei: “Ou te fai atu ia te outou, o’u uso e o le ekalesia, po ua fanauina ea outou faaleagaga i la le Atua? Po ua outou maua ea lona foliga i o outou mata? Po ua outou lagona ea lenei liliu tele i o outou loto?”³³ O lena suiga e oo mai pe a tatou “toe fanauina,” liuaina ma taulai atu i le tatou faigamalaga i le malo o le Atua.³⁴

Fua o le Salamo

O fua o le salamo e suamalie. O tagata liliu mai ua salamo latou te iloaina o upumoni o le talalelei toefuataiina ua pulea ai o latou mafaufauga ma mea e fai, suia ai o latou mausa, ma aoaia ai o latou tagata. Ua sili atu ona latou mafaia ona tumau ma mafaia ona teena le amioletonu uma.³⁵ Ae o le mea sili, ua matuai aveeseina atoatoa manaoga faaletino e le puleaina,³⁶ o le mausa o ponokalafi ma fualaau faasaina,³⁷ o tuinanauga e le mataofiofia,³⁸ o le manao i mea o le lalolagi,³⁹ ma le fiasili amioletonu⁴⁰ ona o le liuaina i le Alii ma se naunautaiga ina ia auauna atu ia te Ia ma mulimuli i Lana faataitaiga.⁴¹ Ua teuteuina o latou manatu e le mama, ma ua malosi le faatuatua fai ifo.⁴² Ua vaaia le sefuluai o se faamanuiaga e olioli ma puipuia ai, e le o se tiute po o se osigataulaga.⁴³ Ua sili atu ona faatosina le upumoni, ma ua sili atu ona naunau i mea lelei.⁴⁴

O le salamo o le auala lea a le Alii mo le alualu i luma faaleagaga. Na faamatalaina e le Tupu o Peniamina e faapea “o le tagata o le lalolagi o le ita lea i le Atua, ma ua faapea talu le pau o Atamu, e faapea foi e oo i le faavavau, faavavau lava, a e afai e gauai o ia i galuega alofa a le Agaga Paia, ma ua tuu ese le tagata o le lalolagi ma ua avea o ia ma tagata amiotonu ona o le togiola o Keriso le Alii, ma ua avea foi o ia e pei o le tama itiiti ua fia usiusitai, ma agamalu, ma faamaulalo, ma onosai, ma ua tumu i le alofa, ma le fia gauai i mea uma ua silafia e le Atua e tatau ona faatiga ai o ia, e pei lava ona gauai le tamaitiiti i lona tama.”⁴⁵ Uso e ma tuafafine, o lona uiga o lena mea o le liuaina! O le salamo o le liuaina! O se agaga ua salamo o se agaga lea ua liua ma o se agaga ua liua o se agaga lea ua salamo.

Salamo mo i Latou o e ua Maliliu

O tagata ola uma lava e mafai ona salamo. Ae faapefea i latou o e ua maliliu? Latou te maua foi avanoa e salamo ai. Ua folafola mai e tusitusiga paia e faapea “o toeaina faamaoni o lenei augatupulaga, pe a mavae atu ma lenei olaga faaletino, e faaauau a latou galuega i le talaiina o le talalelei o le salamo … ia i latou o e … noatia i le agasala i le lalolagi tele o agaga o e ua oti.

“O e ua oti e salamo o le a togiolaina, e ala i le usiusitai i sauniga o le maota o le Atua,

“Ma pe a mavae foi ona totogi e i latou le faasalaga mo a latou solitulafono, ma faamamaina, [latou] te maua se taui e tusa ma a latou galuega.”⁴⁶

Na toe faaalia mai e le Perofeta o Iosefa Samita e faapea “o le a taia le lalolagi i le fetuu sei iloga e i ai se ituaiga o sootaga i le va o tama ma fanau… . E le mafai ona faaatoatoaina i tatou e aunoa ma [o tatou tagata ua oti]; po o latou foi e aunoa ma i tatou e le mafai lava ona faaatoatoaina… . [O lenei] augatupulaga ua amata nei ona oo mai, ina ia faataunuuina ma faaalia se fesootaiga ma faatasiga atoa, mae’a ma maopoopo o augatupulaga ma ki, ma mana, ma mamalu.”⁴⁷

“E manao Iesu ia ou fai ma sulu?”⁴⁸ Ioe! Ma oe foi! E finagalo o Ia ina ia avea i tatou ma tagata e faamauina o tatou aiga e faavavau—ia faia ni sootaga faaselesitila—ina ia taofiofia le fetuu⁴⁹ lea e oo mai i le faataapeapeina o le aiga. Na foafoaina le lalolagi ma fausia malumalu ina ia mafai ai ona faatasia aiga e faavavau.⁵⁰ O le toatele, a leai o le toatele o i tatou, e mafai ona salamo ma liuaina ina ia faia ni galuega se tele o le malumalu ma talafaasolopito o le aiga mo o tatou tuaa. O lea la, e moomia ai lo tatou salamo ma e taua mo lo latou salamo.

Mo o tatou aiga uma ua maliliu, i le tamaitai ua 28 tausaga le matua o loo lopala i le agasala, faapea i tatou uma taitoatasi, ou te folafola atu faapea e mafai ona maua faamanuiaga matagofie o le salamo. E oo mai e ala i le liuaina atoatoa i le Alii ma Lana galuega paia.

Ou te iloa o loo soifua le Atua. O Iesu o le Keriso. O Lana Ekalesia lenei. O Lana perofeta i aso nei o Peresitene Gordon B. Hinckley, ou te molimau atu ai, i le suafa o Iesu Keriso, amene.