E Sa’o, a Ea? O Le a La Se Isi Mea e Sili Atu Ona Taua?
O le a avea lo tatou talitonuga i le Faaola ma Lana galuega i aso e gata ai ma tioata malolosi lea e mafai ai ona tatou faamasinoina mea uma lava.
Ou te avea e fai ma a’u mataupu i lenei aso se mea na saunoa i ai Peresitene Hinckley i le konafesi aoao ia Aperila o le 1973.
Faatoa ou foi mai lava mai la’u misiona. E tele naua mea sa foliga mai sa i o’u luma. Pe o le a mafai ea ona ou faia pea faaiuga sa’o i lo’u olaga atoa?
Sa saunoa Elder Gordon B. Hinckley i lena taimi e uiga i se aliivaa talavou mai Asia. E le’i avea le aliivaa ma se Kerisiano, ae o le taimi o aoaoga i le Iunaite Setete, sa aoao ai o ia e uiga i le Ekalesia, ma sa papatisoina ai. Ua sauni nei o ia e toe foi atu i lona atunuu moni.
Sa fesili atu Peresitene Hinckley i le aliivaa: “O ou tagata e le o ni Kerisiano. O le a se mea o le a tupu pe a e toe foi atu i lou atunuu o oe o se Kerisiano, ae, o le mea e sili atu ona tulaga ese ai, ona o oe o se Kerisiano Mamona?”
Na pei e faanenefu foliga o le aliivaa, ma ia tali atu: “O le a le fiafia lo’u aiga… . O lo’u lumanai ma la’u galuega, o avanoa uma e mafai ona aveeseina mai ia a’u.”
Sa fesili Peresitene Hinckley, “O e naunau la e totogi se tau tele naua mo le talalelei?”
Faatasi ai ma ona mata ua susu i loimata, sa ia tali mai ai i se fesili: “E sa’o, a ea?”
Sa tali atu Peresitene Hinckley. “Ioe, e sa’o.”
Lea na tali atu loa i ai le aliivaa, “O le a la se isi mea e sili atu ona taua?”1
I le gasologa o tausaga, ou te toe tomanatu ai lava i nei upu: “E sa’o, a ea? O le a la se isi mea e sili atu ona taua?” O nei fesili ua fesoasoani ia te au e faatulaga ai nisi o mataupu faigata i se tulaga lelei.
O le galuega o loo tatou galulue ai e moni. Tatou te faaaloalogia talitonuga o a tatou uo ma tuaoi. O i tatou uma o atalii ma afafine o le Atua. E tele mea e mafai ona tatou aoaoina mai isi alii ma tamaitai o le faatuatua ma le lelei, e pei ona aoaoina lelei ai i tatou e Peresitene Faust.
Ae peitai ua tatou iloa o Iesu o le Keriso. Ua toetu o Ia. Na toefuataiina mai le perisitua a le Atua i o tatou aso, e ala mai i le Perofeta o Iosefa Samita. Ua ia i tatou le meaalofa o le Agaga Paia. O le Tusi a Mamona e tonu lava e pei ona tatou faailoaina atu. O folafolaga o le malumalu e mautinoa. Ua faailoa mai e le Alii lava Ia le tulagaese ma le tupito o le misiona a le Ekalesia a Iesu Keriso o le Au Paia o Aso e Gata Ai ina ia avea ma se “malamalama i le lalolagi,” ma se “avefeau e teuteuina le ala i [Ona] luma”2 e pei ona “alualu i luma le talalelei i tuluiga o le lalolagi.”3
E sa’o, a ea? O le a la se isi mea e sili atu ona taua?
E moni, mo i tatou uma, e i ai isi mea e taua. Ina ua ou faalogo i le saunoaga a Peresitene Hinckley i le 21 o o’u tausaga, sa ou moomia ai ona faataua a’u suesuega; sa ou moomia ona ou faigaluega ina ia ou aoga ai pea; sa ou tau fuafuaina pe faapefea ona faatalitonu se tamaitai talavou faapitoa e tatau ona ma uo; ma sa ou olioli i isi gaoioiga taua.
E faapefea ona tatou mauaina lo tatou ala i le tele o mea e taua? Tatou te faafaigofie ma faamamaina o tatou manatu. O nisi mea e leaga ma e tatau ona aloese mai ai; o nisi mea e manaia; o nisi mea e taua; o nisi mea e matuai talafeagai lava. Na fetalai le Faaola: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”4
O le faatuatua e le na o se lagona; ae o se faaiuga. Tatou te fausia ma faamalosia lo tatou faatuatua e ala i le tatalo, suesue, usitai ma feagaiga. O le a avea lo tatou talitonuga i le Faaola ma Lana galuega i aso e gata ai ma tioata malolosi lea e mafai ai ona tatou faamasinoina mea uma lava. Ma, afai tatou te iloaina lo tatou i ai i faigata o le olaga, e pei ona faamatala mai e Elder Oaks, tatou te maua lava le malosi e ui ai i le ala sao.
Na faaupuina faapenei e Peresitene Hinckley: “Afai e uunaia se [tagata] e le mana tele ma le malosi o le upumoni, ona ia pulea lea o ia lava, e le mafua mai ona o poloaiga e faia e le Ekalesia ae ona o le malamalama ua i totonu o lona loto.”5
Pe ua lava ea ona uunaia i tatou e le “talitonuga maoae ma le mamana o le upumoni”? Pe o atagia mai ea i a tatou filifiliga lenei uunaiga? Pe o avea ea i tatou ma tagata na tatou mananao ia avea ai? E sa’o, a ea? O le a la se isi mea e sili atu ona taua?
Ua tatou iloa le mea e sa’o. I nai tausaga ua mavae sa faatasi ai lo’u toalua, o Kathy, ma le fanau a le ma fanau a o malaga ese o latou matua. Sa tulei e le tama a le ma tama e fa-tausaga-le-matua lona uso laitiiti. Ina ua uma ona faana le tagi a le alii laitiiti, sa ia faliu atu loa i le fa tausaga ma fesili atu i ai, “Aisea na e tuleia ai lou uso laitiiti?” Sa ia tilotilo atu i lona tinamatua ma tali atu, “Mama, ua ou iloa lo’u sese ua leiloa la’u mama FMT, ma ua le mafai ai ona ou filifili mea tonu.” E moomia ona tatou faaeteete, aua o ‘alofaga e mafai ona taofiofia ai lo tatou alualu i luma.
“O talitonuga maoae ma le mamana o le upumoni” o loo maua i loto o le Au Paia o Aso e Gata Ai i le salafa o le lalolagi. O lenei malosiaga o le faatuatua o loo tauaveina ai i luma le galuega o le malo.
I le tele o tausaga ua mavae sa ma tutu ai ma lo’u toalua i autafa o se tuafafine lototele i Farani, a o sopoia atu e lana tane, sa 30 ma ona tupu ona tausaga ia le veli. O le tiutetauave o le aoaoina ma le amiotonu ma taialaina na o ia lana fanau laiti e toafa na foliga mai e lofituina ai. Ae peitai i le 16 tausaga mulimuli ane, na toe taliu uma mai ai lana fanau tama e toatolu mai misiona ma ua faamauina lana tama teine i le malumalu.
Ou te iloa se uso i Pasila o le sa auai i le Ekalesia i le 16 o tausaga, e na o ia le tagata o lona aiga e auai i le Ekalesia. Ina ua oo i le taimi o lana misiona, sa tetee ona matua. E le’i toe iloa e ia se mea e uiga ia i laua i le taimi o lana misiona, ma na toe taliu mai ina ua uma lana misiona i le aiga o lana epikopo. Ae peitai, o le tala, na i ai sona taunuuga fiafia aua ua maua nei e ia se aiga lelei, o loo faigaluega o se fomai nifo, ma o loo moomoo ona matua maimau pe ana mafai ona ia faatosina mai ona uso i le Ekalesia.
Ou te iloa se uso i se atunuu Amerika Latina o le, na fuafua ina ua uma lona papatisoga, e faapea o le a le gata ina totogi faamaoni lana sefuluai, ae o le a totogi atoa foi ana lafoga, o se mea e le’i faia e ana paaga sa latou tauva. Sa faamanuiaina o ia e le Alii mo lona faamaoni.
E tele osigataulaga e faataunuuina e aunoa ma se leo: o faifeautalai e taliu mai le galuega e le tolopoina le tiutetauave o le sailia o ni a latou soa e faavavau; o tamaitai amiotonu e mananao i ni fanau ma faaaluina o latou olaga i le tausiga o i latou i le alofa ma le upumoni; o aiga e faasaina ma le faaeteete ia aafiaga o ala o faasalalauga ma le Initoneti lea e mafai ona pisipisia ai o latou agaga; o tane ma ava ua mauaina le tele o le taimi e faatasia ai i totonu o le malumalu.
E mafai foi e fanau ona atiina ae lenei tioata o le faatuatua. Sa ou feiloai atu talu ai nei lava i talavou i Seoul, Korea, o e, e taunuu atu i aiga i aso taitasi ua tuneva le po ona o le mamafa o polokalama a le aoga, ae peitai latou te auai i le seminare i le taeao po i le 6:00 a.m. i aso e lima o le vaiaso. Ou te iloa se alii taalo peisipolo e valu tausaga le matua, o se tagata iloga o le ‘au, na ia faamalamalamaina atu i lona faiaoga faapea e le mafai ona ia auai i le taaloga o le sailiga siamupini ona sa faia i le Aso Sa.
O le tele o gaoioiga le leoa o le faatuatua loloto e na o le Atua o loo silafiaina. Ae o loo tusi faamaumauina i le lagi. E sa’o, a ea? O le a la se isi mea e sili atu ona taua?
Na fetalai le Faaola, “A ia outou muai saili le malo o le Atua, ma lana amiotonu, ona faaopoopoina atu lea o ia mea uma ia te outou.”6
Ou te molimau atu e moni, ma e sili atu ona taua. I le suafa o Iesu Keriso, amene.