O Le Toe Faapaiaina o le Tapeneko i Sate Leki

Peresitene James E. Faust

Fesoasoani Lua i le Au Peresitene Sili

Ou te faafetai ona ua faamalosia ma toe faafou lenei maota ofoofogia, ina ia mafai ai ona saga faaaoga pea e aoao ai ma faamalamalamaina le fanau a le Atua.

O se faamamaluga tele ma se avanoa le avea ai ma se tasi o le sauniga o le toe faapaiaina o lenei maota maoae, le Tapeneko i Sate Leki, lea o loo tu i sisifo o le Malumalu o Sate Leki. Matou te faalauiloaina aloaia soo se tasi ma i latou uma sa i ai sona sao i le galuega tele sa faia i lenei fale. E faapitoa la matou faafetai i le Au Epikopo Pulefaamalumalu—Epikopo H. David Burton, Epikopo Richard C. Edgley, ma Epikopo Keith B. McMullin —i le mae’u o la latou taitaiga i le faafoeina o le galuega i le toefaafouina ma le toefuataiina o le Tapeneko i Sate Leki.

E i ai mea ou te faamama’i i ai ma ou te manatua pea pe a ou sau i lenei Tapeneko a o ou laitiiti. Sa ou papatiso iinei. Ina ua avea au o se tiakono, sa aumai au e lo’u tama iinei e auai i le sauniga soao a le au perisitua. E 15 minute na ma vave taunuu mai ai, ma sa faigofie ona maua so ma’ua nofoaga i le poletito i luga.

I le popofou o le Ekalesia, na pau fale e lua na fauina faapitoa mo tapuaiga o malumalu i Katelani ma Navu. Sa fausia uma e tusa ai ma faaaliga. O le uluai fale o loo tusi faamaumauina na fausia e le Ekalesia e fai ma se falelotu, sa faamoemoeina foi e faaaoga o se faleaoga. Sa fauina i ogalaau i Misuri i le 1831.¹

E oo mai i le taimi na faapaiaina ai le Malumalu o Katelani i le 1836, ua matua le ofi ai le Au Paia sa mananao e auai i le faapaiaga. Sa tusia ma le faanoanoa e le Perofeta o Iosefa Samita, o le a le ofi nisi tagata i le fale.² Peitai, ina ua faateleina sauaga e faasaga i le Au Paia ma o latou taitai i Katelani, o lea sa masii atu ai le toatele o le Ekalesia i Misuri i le 1838, ae tuua ai lenei maota faapelepele.

Na sosoo atu ai ma le Malumalu o Navu i le mamanu lava e tasi e pei o le Malumalu o Katelani, vagana ai potu mo potopotoga i fogafale muamua ma le lua. Peitai, a o lei maea le Malumalu o Navu i le 1846, sa tauaofia ia le Au Paia i fafo, e masani lava i tafatafa o le malumalu, e faalogologo ai i saunoaga a Iosefa ma isi taitai o le Ekalesia. O nisi taimi e faitau afe ma afe i latou e auai i na sauniga.

E pei ona matauina e Siaosi A. Samita i se ala malie, “I ona po o le Perofeta o Iosefa … ‘e sili ona tupuolaola le ‘Faamamona’ i fafo.” E mafua ona “Ua le mafai ona tatou fausiaina se fale e lava lona tele e ofi ai le Au Paia a o lumanai le maliu o le Perofeta.”³

O nisi taimi e faalavelaveina ai e le leaga o le tau ia na sauniga i fafo, ma taufai faaletonu ai le aofia ma failauga. Na saunoa Peresitene Iosefa F. Samita, o lē sa manatuaina lelei le le manuia o na sauniga i fafo i tafatafa o le malumlau i Navu:

“O le mea muamua lava ou te manatua i se nofoaga o le tapuaiga, o Navu. O se pupu laau i tafatafa o le tulaga o le malumalu. Faatasi ai ma lo’u tina, ou te faalogologo ai iinei i tamalii e pei o Polika Iaga, Heber C. Kimball, Orson Hyde, Parley P. Pratt, o le Perofeta o Iosefa ma le Peteriaka o Ailama. Ou te manatuaina lelei lo’u auai i se tasi o sauniga i lalo o nei laau, na sau ai se taavale solofanua i luma o le aofia ma sa tulai le Perofeta o Iosefa i le pusa o le taavaletoso ma saunoa mai, ina ua amata ona timu. Sa tutu a’e pe toatasi pe toalua ni tagata ma u’u ni faamalu i ona luga, e faamalumalu ai o ia mai le susu. O le toatele o tagata e lei i ai ni faamalu, ma sa le manuia ma le lelei le nofo ai iina, peitai ou te manatua lelei, e ui lava ina ua na o au o se tamaitiiti, sa leai se tasi na tuua le sauniga a o ia saunoa.⁴

A o lei maliu o ia, sa faatonu e le Perofeta ina ia fausia se tapeneko tapoleni e faamalumalu ai le Au Paia i le taimi o sauniga tetele. I le 1845, ina ua lata ina maea le malumalu, sa toe auina atu Elder Orson Hyde o le Korama a le Toasefululua i Sasae [o le Iunaite Setete] e fai se suegatupe ma faatau ai “iata pe tusa ma le fa afe” o tapoleni e fau ai le mea lea na ta’ua e Polika Iaga o “le Tapeneko o le potopotoga i Siona.”⁵

Sa faamatala e Uso Orson Pratt le tulaga faamoemoeina ma le mamanu o le tapeneko tapoleni i se tusi na tusia i le aso 30 o Aokuso, 1845:

“Ua faamoemoe e faatu se tapeneko tapoleni i luma o le Malumalu, ma sosoo atu ai i le itu i sisifo. O foliga o lenei fale e faaofuofu; … O le vaega o lona faavae o le a lava ma totoe e ofi ai le valu pe sefulu afe tagata; o le a faasolosolo agai i luga nofoa e foliga mai ai o le ogatotonu o se malae faaEleni mo faaaliga ma taaloga.”⁶

Sa amata e le usoga i le aso na sosoo ai ona faamama le laufanua mo le fausiaina o tapeneko tapoleni. Peitai, talu ai le ogaoga o sauaga mai o latou fili, o lea na tatau ai ona tuua e le Au Paia ia Navu, ma o lea e lei fausiaina ai le tapeneko tapoleni. Na “utaina ai e [Orson Hyde] ia tapoleni i taavale solofanua i le 1846 ma malaga atu ai i sisifo”⁷ Sa taumatemate nisi “sa faaaoga lelei ia tapoleni i ni faleie, o fale i tua o taavale solofanua ma ufiufi” mo le Au Paia i le malaga umi i le Vanu o Sate Leki.⁸

O le Tapeneko ua mae’a i le Lotoa o le Malumalu i le Aai o Sate Leki, e talitutusa lava lona tele ma le tapeneko tapoleni lea na fuafuaina mo Navu, ma e faapei foi o le tapeneko i Navu o loo tu foi i le itu i sisifo o le malumalu. E faapei foi o isi mataupu, e pei o le malaga tele i Sisifo, sa silasila faalemafaufau Iosefa Samita i se tapeneko tele; ma sa faatinoina e Polika Iaga.

O lea, o le tapeneko sa fuafuaina mo Navu, e ui lava ina e le’i fauina iina, a o le ata faataitai mo lenei fale faasolopito. A o ou tamaitiiti, matou te faalogologo i le konafesi aoao i le leitio; o le taimi nei ina ua faaaoga satelite ma masini faaeletonika, ua tatou faasalalau atu mai le Aai o Sate Leki i atunuu uma i le lalolagi atoa i le taimi e tasi—e pei ona tatou faia ai i le taimi nei—e faaaoga ai laina fesootai i fale i le lalolagi atoa. Ua oo mai nei mea ona o musumusuga na oo mai i le Usoga e faafetaiai ai tulaga manaomia o tagata i o tatou aso ma taimi. O se faataitaiga lelei lenei o le auala ua saunia e le Alii ina ia mafai ai ona taulima manaoga o tagata o le ekalesia. Ou te molimau atu o le a faaauau pea e le Alii ona faaalia mai i Lana perofeta, o Gordon B. Hinckley, ia auala ma mea e taulima ai manaoga o tagata uma o se Ekalesia ua matua faatupula’ia naua.

Ou te faafetai ona ua faamalosia ma toe faafou lenei maota ofoofogia, ina ia mafai ai ona saga faaaoga pea e aoao ai ma faamalamalamaina le fanau a le Atua. I le suafa o Iesu Keriso, amene.