Elder Erich W. Kopischke
O Le Au Fitugafulu

Afai e i ai se mea se tasi ua maua ai se molimau a Elder Erich Willi Kopischke, o le silafia lea e le Alii o le mea e aupito sili mo tagata taitoatasi.

Na te manatuaina si ona le fiafia laitiiti ina ua tofia o ia e faamisiona talai i lona lava atunuu o Siamani. “Sa ou manao e aoao se isi gagana,” o lana tala lea. Peitai, e lei pine ae fiafia e aoao ona lava tagata. Ma ina ua tofia o ia i le ofisa o le misiona mo le iva masina e fai ma failautusi, o lea sa tatau ai ona ia aoaoina le faaPeretania.

Sa oo ina silafia e Elder Kopischke o lana misiona, o le fuafuaga moni lava lea a le Alii mo ia, aua o iina na saunia ai o ia.

“Ua silafia e le Alii lau misiona i le olaga—o la’u molimau silisili lena,” na ia saunoa ai. “Na te silafia le mea o loo teuina mo oe.”

Na soifua mai Elder Kopischke i le aso 20 o Oketopa, 1956, i Elsmshorn, Siamani, lea na tausia ai o ia e ni matua faamaoni o le Au Paia o Aso e Gata Ai, o Helga Haupt Kopischke ma Kurt Kopischke.

Na maua le tikeri o Elder Kopischke i mea tau pisinisi. Ina ua maea lana misiona, sa tautua o ia i le militeli a o lei faaauauina ana aoaoga i mea tau matata eseese. O le taimi lena na ia feiloai atu ai i le ua avea ma ona faletua, o Christiane Glück, o le sa aoga faatamaitai tausimai. Sa faaipoipo i la’ua i le Malumalu o Bern Suitiselani i le aso 19 o Tesema, 1978, ma e toafitu o laua alo.

Sa faigaluega o ia i le kamupani inisiua a o lei faigaluega i le Ofisa o Aoga a le Ekalesia i le 1996, lea na tofia ai e avea ma faatonu i le Eria a Europa Tutotonu i le 2000.

I le 2003 na tofia ai o ia e avea ma peresitene i le misiona a Perelini, o se aafiaga na matua fiafia i ai o ia ma lona faletua.

A o lei valaauina o ia i le Korama Muamua a le Au Fitugafulu, sa avea Elder Kopischke o se fesoasoani i le epikopo, fautua maualuga, peresitene o le itu, peresitene o le siteki, peresitene o le misiona, Fitugafulu Eria, ma le Fesoasoani Lua i le Eria a Europa Tutotonu.