Savali i Atalii o La’u Fanau
Ou te faamoemoe ia avea outou taitoatasi ma se tagata o le Atua. O le a avea oe ma se tagata o le Atua e ala i galuega amiotonu.
Uso e, o le afiafi nei ou te fia talanoa atu ai ia te outou e pei ona ou talanoa atu i atalii o la’u fanau. Ou te faamoemoe o mea o le a ou talanoa atu ai o le a faatatau i perisitua talavou uma i soo se mea. A o o’u mafaufau atu i lenei potopotoga tele faapea foi ma le fia afe isi o e o loo faatasi ma i tatou e ala i le satelite, ua faamanatu mai ai ia te au e faapea, o faamanuiaga silisili o le umiaina o le perisitua a le Atua ua faapolopoloina lea mo na o sina vaega toaitiiti, pe a faatusatusa atu i le fia piliona o tagata i le lalolagi. O le umiaina o le perisitua o se faamamaluga faapitoa lea; ae peitai o loo mafai ona mauaina e soo se alii po o se tama agavaa ua 12 tausaga ma sili atu i totonu o le Ekalesia.
O le perisitua o le pule lea ua tuuina mai i le tagata e galue ai i le suafa o le Atua. O se mana e le mafaia e se tasi ona mauaina i lana lava fuafuaga. E pei ona fai mai Paulo, “E le fai fua foi e se tasi lenei faiva mamalu, tau o le ua filifilia e le Atua, e faapei o Arona foi.”1 O se pule e sili atu nai lo le mana uma e foafoaina e le tagata.
O Pita, o se ositaulaga talavou, na tusia se aafiaga na aoaoina ai o ia e faapea, o le perisitua e matuai moni lava. O se talavou liliu mai i lana uarota i Ontario, Kanata, sa lagolagoina e avea o se aoao i le Perisitua Arona, ma sa talosagaina ia Pita e avea ma “fofoga” i le faauuga. Na tusia e Pita, “Ou te le’i faaeeina muamua lava o’u lima i luga o se ulu o se tasi, ma sa ou lagona le le mautonu. Ona faamautinoa mai lea e le Agaga ia te au faapea o le a leai se afaina pe a ou faia… .
“Sa nofo i luga o le nofoa le alii talavou o le a faauuina, ma sa ou tu tonu lava i ona tua. [O le matou peresitene o Alii Talavou] na taitaiina a’u i le tatalo ma sa ou faataitai i upu uma na ia faia. Ina ua uma ona matou faia le faauuga ma faapea atu, ‘… matou te fia tuuina atu se faamanuiaga i luga o lou ulu i le taimi nei …’ na tilotilo mai [le peresitene o Alii Talavou] ia te a’u ma faailoa mai o a’u e faia.
“O le taimi lena, na matuai suia atoa ai lava le uiga o le perisitua mo au. Sa le toe avea faapea ua na o se igoa, ae o le pule moni lava e galue ai i le suafa o le Atua, ma sa ou tuuina atu lena pule i se isi. Sa ou taofi ma faatali mo le Agaga e musuia a’u i mea ou te tautala atu ai. E faigata ia te a’u ona faamatala ia lagona na ia te a’u i lena aso i le taimi o le faamanuiaga, ae e mafai ona ou fai atu ua ou maua nei se molimau malosi e moni le mana o le perisitua.”2
O outou alii talavou e le masalomia le tulimatai atu i le mauaina o le Perisitua maualuga po o le Mekisateko. Na saunoa le Perofeta o Iosefa Samita e uiga i lenei perisitua maualuga, “O lona faatuina na muamua a o ‘le’i faavaeina lenei lalolagi, a o le’i pepese faatasi fetu o le taeao, po o le alalaga foi atalii o le Atua i le olioli,’ ma o le Perisitua maualuga ma le paia, e tusa ma le faatulagaga a le Alo o le Atua.”3
I le avea ai ma e ua umia le perisitua ua avea ai i tatou ma sui o le Alii. Na fetalai le Alii e uiga i lenei sui paia i toeaina o le Ekalesia i Katelani i le 1831: “O le mea lea, ona o oulua o sui, ua oulua i ai i le feau a le Alii, ma soo se mea lua te fai e tusa ma le loto o le Alii o le galuega lava lea a le Alii.”4
E masani ona faamanatu mai e Peresitene Hinckley ia i tatou e faapea, o le galuega faafaifeautalai o se tiutetauave taua faaleperisitua. O se tiutetauave ma se faamamaluga maoae le tofia e auauna i le Alii i le galuega talai. O lenei auaunaga e aumaia ai le olioli tumau e ui lava e mafai ona i ai taimi e luitau ma faalotovaivaiina ai. O la’u misiona na suia ai le ala o lo’u olaga. O se tasi o aafiaga silisili na ou mauaina. O le auauna atu i se misiona e saunia ai i tatou mo galuega uma o le olaga ma la tatou galuega e faavavau.
Ou te faamoemoe ia avea outou taitoatasi ma se tagata o le Atua. O le a avea oe ma se tagata o le Atua e ala i galuega amiotonu. O le a e faamamaluina ma faalauteleina lou perisitua, ma, e pei ona fai mai le Aposetolo o Paulo, “ia tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu.”5
E le faigofie pea ona mulimuli i se fuafuaga amiotonu ma usiusitai i tulafono a le lalolagi ma tulafono a le Alii. Ae peitai, o lona taunuuga, o le tausisi i tulafono o le ala sili lea e maua ai mea uma ua folafola mai e le Alii.
E faamasinoina i tatou uma mo a tatou mea e fai. O lo’u aafiaga i le avea ai ma se loia na aoaoina ai a’u e faapea, o i latou o e tausisi i se olaga o solitulafono latou te tuuaia pea lava o latou tama po o tina po o nuu pe a faafalepuipuiina i latou. Ae peitai sa latou filifili ma le loto i ai e “o ese ai mea a le Atua” ma iu atu ai “i se tofi e le i ai se fiafia.”6 O nisi o i latou e faapea mai, “O le tiapolo na faaosoina a’u!” O le upumoni i lena faamatalaga e faapea na faaosooso i tatou e le tiapolo ina ia faia le leaga.7 O le mea e sese ai ona ua i ai la tatou faitalia. E le mafai e le tiapolo ona faaosoina i tatou e faia soo se mea ua tatou filifili e le faia.8
E mafai ona oo mai mailei ma faigata ia i tatou uma, e tusa lava po o le talavou, po o le faamatuā tagata, po o le toeaina. E pei ona matauina e se tasi, “I le talavou tatou te o e su’e faigata, ae a oo ina matutua ua o mai faigata e su’e i tatou!”9 O le faateleina o le taliaina o amioga lē talafeagai i lo tatou lalolagi o le a moomia ai ona tatou matuai pipiimau i le ai uamea o le amiotonu ina ia maua ai faamanuiaga ma le puipuiga a le Alii. O loo i ai se tulaga matautia tele i le faaleano i faaosoosoga a Satani. O le a tatou manaomia ona puipui e tetee atu i soo se ituaiga amioleaga i aso uma o o tatou olaga.
O outou alii talavou uma o e o loo umia le perisitua ua i ai le tiute e faaaloalo ai i tamaitai. A o e tafao faamasani i tamaitai talavou lalelei o le Ekalesia, ua ia te oe le tiute e puipuia ai lo latou saogalemu faaletino ma lo latou mama. O le perisitua o loo e umia ua tuu atu ai ia te oe le tiutetauave sili o le vaai lea o loo tausisia pea ia faatulagaga maualuluga o amioga mama a le Ekalesia. Ua e iloa lelei lava e le tatau ona e lalata atu i le siui o faatosinaga o feusuaiga. O le a aveesea mai ia te oe lena mea e paia e uiga ia te oe lava pe afai e te sopoia atu le siui ma faaaoga sese ai mana silisili o le foafoaga. E mafai faapefea e soo se tasi o i tatou ona faamoemoe e i ai sana matafaioi tele i aso nei po o le faavavau pe afai e leai so tatou mana o le lotopulea? O le faaipoipo atu i se tamaitai amiotonu o le e alofa i le Alii, alofa ia te oe, ma faaaloalo i le perisitua o se tasi lea o faamanuiaga silisili o le olaga ma le faavavau. Ua ou aoaoina lenei mea mai le silia i le 60 tausaga o le faaipoipo atu i lo’u toalua o Ruth.
O uo ma e masani e tele ni mea e faaopoopoina atu i le tamaoaiga o le olaga, ae o nei sootaga e mafai ona le tumau. E leai se tasi e sili atu lona alofa ia te oe pe sili atu ona popole mo lou soifua solo lelei nai lo ou matua. E mafai ona e fesiligia mea la te ta’uina atu ia te oe ae le mafai ona e fesiligia lo la alolofa mo oe ma le naunau i lou lelei.
O le a oo mai le taimi o le a maua ai e outou alii talavou le tiutetauave e tausia ai se ava ma se fanau, o e o le a faalagolago atu ia te oe. Afai e te faaipoipo, o le a e nafa ma le soifua solo lelei o lou toalua faapea le soifua solo lelei o lau fanau a o e amataina se aiga. O le faaipoipoga ma le avea ma se tama e mafai ona aumaia ai le fiafia ma le olioli sili e faavavau. E pei ona saunoa Peresitene Iosefa F. Samita, o le “olaga faaleaiga o loo faavae ai le puleaina ma le faaauauina o le Ekalesia.”10 Ina ia maua le faamalieina atoatoa i le aiga, e moomia e paaga uma le matuai tautino atoatoa i le faaipoipoga. Na saunoa Peresitene Tavita O. MaKei i se tasi taimi, “Afai e faamuamua e se tasi le pisinisi po o mea e fiafia i ai nai lo le aiga, o le taimi foi lena ua amata ai ona faasifo le vaivai o le agaga.”11
O nisi o outou ua matuai lelei lava ma faamanuiaina i le ausiaina o nisi o au sini i le olaga. Matou te mitamita ia te outou. Na ta’u mai e lo’u tama ia te a’u faapea a ia ua ia maua le faamanuiaina ina ua ia faauu mai le aoga faaloia. Na ia fai mai o le mea moni lava, o lona faauuga ua na o le amataga lea o ni luitau sili atu. Tatou te le ausiaina le faamanuiaina silisili, tatou te le saoloto foi mai luitau faalelalolagi i lenei olaga.
O loo tatou ola i se augatupulaga o tomai faapitoa. A o’u laitiiti, e toatele tagata sa i ai le ituaiga taavale o le Model T Fords. A faatusatusa i taavale i nei ona po, e matuai faigofie lava ona totoga. E toatele tagata sa mafai ona fai e latou a latou lava taavale e ala lea i le faalamolemoleina o faagaau, sui mama o pisi, tuu i ai ni taofi fou, ma le faaaogaina o ni uaea se tele e saisai ai. O taavale i aso nei ua faigata atu lea ua oo lava i se tagata atamai ua laitiiti sona iloa e lipea ai. Ua faaaoga e enisinia o nei aso se komepiuta e saili ai faafitauli o afi. Ua ou ta’ua lenei faataitaiga e uunaia ai outou alii talavou ina ia maua ni aoaoga ma ni a’oga e tulituliloa ai le atamai. O aoga o matata eseese e matuai taua lava, ma e faamaonia e faapena foi i vaega o aoaoga e maualuluga atu. Soo se ituaiga tomai lava e moomia ai ni aoaoga faapitoa.
Ou te le popole po o le a le galuega e te filifilia i le olaga ae ia faamamaluina ai. O le auala e te tausia ai lou aiga o lau faaiuga lena. O le mauaina o se tomai o se auala lelei lena e totogi ai pili, ae ao ona i ai se mea ia matuai aafia ai le tagata lava ia. Aua e te popole tele i mea faaletino o le olaga lea e aveesea ai le faamoemoega o lou tagata. E mafai ona e manatuaina le tama autu a Dickens o Jacob Marley, o le na tagiaue i lana galuega ina ua ia folafola mai; “Pisinisi? O la’u pisinisi o tagata! O lo latou soifua solo lelei o la’u pisinisi lea.”12 E ao ia i tatou taitoatasi ona faatinoina sina faatinoga i le faamalosia o le lalolagi, aemaise lava i le faiga o le galuega a le Atua.
Ua ou iloaina o i tatou o e o loo umia le perisitua, o le fua faatatau sili mo le faamanuiaina o le “A ia outou muai saili le malo o le Atua, ma lana amiotonu; ona faaopoopoina atu lea o ia mea uma ia te outou.”13 O le a le vave ona oo mai le manuia aua e moomia ai sauniuniga ma le galue malosi. E matuai leai lava ni auala pupuu i le manuia.
O i tatou uma taitoatasi o se foafoaga tupito a lo tatou Tama Faalelagi. E leai ni tagata se toalua e tutusa lelei. E leai se tasi o i ai tonu meaalofa ma taleni ia ua tuuina mai ia i tatou. E tatau ona tatou faateleina na taleni ma meaalofa ma faaaoga lelei ina ia avea ai i tatou ma tagata tulaga ese. Mo se faataitaiga, a o o’u tuputupu a’e, sa i ai se alii talavou lelei lava i lo matou vaiaai e le o se tagata atamai ae sa gaosia ni meaafale mananaia i ona lima. Na taliaina uma i ma’ua i le militeli i le aso e tasi. Sa le mafai ona ia teuina lona moega ina ia pasia e le asiasiga, ae sa mafai ona ia tuufaatasia ni fasi laupapa i se galuega taulima maoae. E pei ona saunoa Peresitene Howard W. Hunter: “O nisi tagata o loo i ai le manatu e faapea o le taleni, limalima, tulaga lelei i amioga, po o le maoae e le o maua i le autalavou, ae ua faapolopoloina mo i latou o e matutua atu. E le o le tulaga lena.”14
O outou alii talavou o loo i ai se lumanai ma se folafolaga silisili. O outou ua faamanuiaina i le malamalama e le’i iloaina muamua e le lalolagi. O lenei malamalama o le a faatagaina ai outou ina ia tuuina atu so outou sao i le lumanai o pisinisi faaonaponei, falegaosimea, faatoaga, ma galuega. E mafai ona avea outou ma nisi o e o le a puipuia le ala o le olaga i malae o taua. O le a avea outou ma nisi o e faasalalauina atu mataupu faavae o le talalelei i le lalolagi ma fesoasoani i le Ekalesia ina ia ola.
O lenei, atalii pele e o la’u fanau ma alii talavou faapitoa uma o e o loo lagona mai lo’u leo, ia agai i luma. Ia agai i luma i le faatuatua ma le amiotonu, i le mulimuli i le taitaiga a lo tatou perofeta, o Peresitene Gordon B. Hinckley. Afai tou te faia o le a faamalosia ma faalauteleina outou e le Alii ina ia outou faataunuuina mea tetele. Ou te molimau atu i le maoae ma le faamaoni o aafiaga o le perisitua ua i ai i lo’u olaga. I le umi talu ona ou ola ou te le’i taumafai e nana po o ai a’u ma mea ou te talitonu i ai. Ou te le manatuaina lava se taimi se tasi na afaina ai la’u galuega pe na leiloloa atu ai ni a’u uo faapelepele i lo’u faailoa atu i ai ma le faamaulalo o a’u o se tagata o lenei Ekalesia. Ou te tuuina atu la’u molimau ma la’u faamanuiaga ia te outou i le aso i le suafa o Iesu Keriso, amene.