“Pe Faoa e le Tagata Mea a le Atua?”
Afai e te totogia ma ou totogia ia sefuluai faamaoni ma le sa’o i le Alii, o le a tatalaina mai e le Alii pupuni o le lagi.
Ou te fia talanoaina le tulafono o le sefuluai. I le tusi a Malaki, o loo fesili ai le Alii,
“Pe faoa e le tagata mea a le Atua? A o outou, ua outou faoa a’u mea. A ua outou fai mai, Ni a ea au mea ua matou faoa? O sefuluai ma taulaga.
“Ua matua faafanoina outou, o le nuu uma lava: aua ua outou faoa a’u mea.
“Ina aumaia mea e sefulu a’i a outou mea uma lava i le fale e tuu ai mea; ina ia i ai mea e ‘ai i lo’u fale; ma ia outou tofotofo mai ai ia te au i lenei mea, ua fetalai mai ai Ieova o ‘au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.”1
O le sefuluai o se poloaiga taua tele, lea ina ua faaali atu le Alii i le konetineta o Amerika ina ua mavae Lona Toetu, na Ia toe fetalai tonu ai foi i na lava upu.2 Ma ua fetalai mai le Alii i o tatou aso, “O i latou ua faapea ona totogiina sefuluai o le a totogi atu le tasi vaesefulu o a latou mea uma e maua i tausaga taitasi.”3
I le tusi o Levitiko, e tolu taimi eseese o loo fetalai mai ai le Alii, o le sefuluai ua “paia lava ia Ieova.”4
Ua fetalai mai le Alii, “Tofotofo mai ia te au [po o le suesue mai au i le taimi nei] i lenei mea, pe ou te le toina atu pupuni o le lagi.”5 O le toatele o i tatou ua tofotofo i le Alii i le ala sa’o; ae o nisi o i tatou e leai.
Mafaufau, mo se faataitaiga, e sefulu apu. Ia, o nei apu uma e sefulu o apu moni lava a le Alii, ae o lea ua talosaga mai e toe faafoi atu ia te ia tau lava o le tasi vaesefulu, po o le apu e tasi.
Pe e te ofoina atu ea na o sina u laitiiti o lena apu ae tuu le 90 pasene? Pe e te naunau ea e ofo atu i le Alii lena vaega itiiti?
Pe e te maasiasi ea pe e te taumafai e toe faaleleia le vaega ua u ona ofoina atu lea o lena mea i le Alii?
Tatou te mananao e ofoina atu ni taulaga atoatoa, ma mama. Ua aoaoina i tatou: “Faauta, e ao ina ave i le Alii le loto ma le mafaufau matala; ma o e gaua’i ma usiusitai o le a aai i mea lelei o le laueleele o Siona i nei aso e gata ai.”6
I nai tausaga ua mavae, na ou maua ai le tofiga e toe faatulaga ai le Siteki a Carey Idaho. Na tulaueleele le vaalele i Twin Falls ma sa faatali au e Peresitene Roy Hubert, o le sa matua lelei lana auaunaga, ona ma tietie ai lea i lona fale. A o alu le ma taavale, sa ou fesili atu ia te ia, “E ese mai le toe faatulagaina o le au peresitene o le siteki, e i ai se mea e mafai ona ou faia mo oe ma lau Au Paia?”
Sa fai mai o ia, “Oi, na matuai matautia lava se lamala na matou oo i ai i nai tausaga ua tuanai. Ae peitai, o le tausaga lenei, ua faateteleina atu le leaga o le lamala ma ua toatele le au faifaatoaga ua malaga ese mai le nuu e saili galuega i se isi mea.”
Sa matuai ootia lava au mo o tatou tagata faamaoni o le Ekalesia o e alolofa tele i le Alii ma le Ekalesia, ae o lea ua leai ni a latou faatoaga.
Na valaauina se epikopo talavou, o R. Spence Ellsworth, e avea ma peresitene fou o le siteki. I le taimi o le sauniga aofai i le Aso Sa, na matuai mamafa lava i lo’u mafaufau ia taunuuga o le lamala. A o o’u lauga, na oo mai se uunaiga malosi, sa uunaia a’u e talosaga atu ia i latou ina ia faia mea nei:
-
Totogi faamaoni se sefuluai, o e laiti ma e matutua.
-
Faia ma le faamaualalo e le aunoa ia tatalo a le tagata lava ia ma faaleaiga.
-
Suesue ma le naunautai ia tusitusiga paia e le tagata lava ia ma faaleaiga.
-
Tausia ma le faafetai le aso Sapati ia faapaiaina.
-
Ia o soo ma le lotofaafetai i le maota o le Alii, tuu atu le faafetai ma faia tapuaiga i le malumalu.
-
Lagolago ma le loto i ai ma mulimuli i taitai fou.
-
Faia se anapogi i le siteki atoa, ma faaaofia ai tagata uma i nuu ua aafia, o e mananao e fia auai.
I ni nai aso na sosoo ai, ina ua mavae le konafesi a le siteki, e toatele tagata sa toto a latou faatoaga ma le faatuatua atoatoa, e ui lava e le’i i ai se tala o le tau faapea o le a timuga.
I le Aso Lulu, i lalo o le taitaiga a Peresitene Ellsworth, na anapopogi ai le siteki atoa. O le vaiaso lava lena, na malaga atu ai le toatele o tagata o le Ekalesia faatasi ma le toatele o taitai ma o latou taitoalua i le Malumalu o Boise Idaho ma ava’e ai la latou faafetai. A o i ai nei Au Paia faamaoni i totonu o le malumalu, sa amata ona toulu timuga i le nuu atoa, e ui sa faailoa mai i le tala o le tau e leai ni timuga mo ni nai vaiaso. O le Aso Toonai na sosoo ai, na toe pau ai foi timuga mo ni nai aso. Na tupu lenei mea i le faaiuga o le masina o Aperila. Sa tetele le kiona i luga o mauga, ma sa lava ai le susu na maua mo lena vaitau atoa o le totoina o faatoaga. I nuu o Dietrich ma Richfield, o le latou faatanoa vai sa i lalo o le 30 pasene, ae ina ua uma le anapogi a tagata, sa toetoe lava a tumu le faatanoa. O le sapalai o le vai i Carey sa faateleina mai le 44 pasene i le silia ma le 100 pasene o le mea e masani ai. I le vaitau atoa o le totoina o faatoaga, a o faateleina foi e tagata o le Siteki o Carey lo latou faatuatua, e ala i le anapopogi faafia, totogi se sefuluai faamaoni, ma auai soo atu i le malumalu ma—sa faafofoga ma tali mai e le Alii a latou tatalo. Na tuai ona toulu le kiona i lena tausaga, o lea na mafai ai foi e le au faifaatoaga ona toe seleseleina ia fatu o laau, pateta suamalie, alafafa, pateta, ma isi fua o faaeleeleaga. Mai lena aso, o tausaga taitasi talu mai lena taimi, latou te ofoina atu ai pea lava tatalo o le faafetai, “ona o … Lona alofa tele,”7 o loo faaauau ai pea ona faamanuia i latou e le Alii.
I le Tusi o Nofoaiga Tupu, o loo fetalai mai ai le Alii: “Afai e faamaulalo lo’u nuu e ua ta’ua i lo’u igoa, ma latou tatalo, ma sailiili mai ia te au, ma liliuese i o latou ala leaga; ona ou faalogo ai lea mai le lagi, ma faamagalo i a latou agasala, ma faaolaina lo latou nuu.”8
O le totogiina o se sefuluai faamaoni atoatoa e agavaa ma taitai atu ai i tatou i le malumalu. Ou te talitonu, o le sefuluai, o se tasi o faamuamua faaperofeta a Peresitene Hinckley.
I le vaiaso ua tuanai, sa saunoa ai Peresitene Hinckley i le sauniga a Tamaitai Talavou e faapea, “E ui ina totogi le sefuluai i tupe, ae o le mea e sili ona taua o le totogi ma le faatuatua.”9
Na ia saunoa foi i se isi taimi: “E le o se mataupu e uiga i mea tau tupe a o se mataupu e uiga i le faatuatua… . Ou te uunaia outou … o outou uma lava, ina ia outou faalogo i le afioga a le Alii e uiga i lenei mataupu taua.”10
O se mataupu e uiga i le tautinoga. O le Alii e ana le lalolagi—lea e aofia ai o tatou lava ola. Ua Ia faatagaina i tatou e faaaoga mea uma o i luga o lenei fogaeleele. Ua Ia talosaga mai ina ia faafoi atu na o le tasi vae sefulu. O le sefuluai o se faailoga o le loto talisapaia, usiusitai, ma le faafetai—o se faailoga o lo tatou naunautai ma lo tatou loto faamaoni. O le totogi o le sefuluai, ma le naunautai, e fesoasoani ai ia i tatou e atiina ae se loto faamaoni ma se loto mama. O le totogi o le sefuluai e faatupuina ai lo tatou alofa mo le Alii.
Ua fetalai mai le Alii, “O le aso o le taulaga, ma o le aso e sefuluai ai lo’u nuu.”11
Uso e ma tuafafine, ia tatou faatinoina lo tatou faatuatua. Ia tatou faaalia lo tatou naunautai e usiusitai. Ou te folafola atu ia te outou, i le suafa o le Alii o Iesu Keriso, afai e te totogia ma ou totogia ia sefuluai faamaoni ma le sa’o i le Alii, o le a tatalaina mai e le Alii pupuni o le lagi.
Ou te iloa o loo soifua le Tama Faalelagi. O le mea lea, o le a faamanuiaina outou e Ia. O Iesu Keriso o lo tatou Faaola. Na vaai Iosefa i le Tama Faalelagi ma Lona Alo Pele, o Iesu Keriso. O Lana Ekalesia lenei. O Peresitene Gordon B. Hinckley o le perofeta soifua a le Atua. Ua ia talosagaina outou ina ia outou o mai soo i le malumalu. O la’u tatalo faamaulalo lea i le suafa o Iesu Keriso, amene.