Ia Manatua Ina Ia e le Fano
O le manatua i le auala ua fuafuaina e le Atua, o se mataupu faavae taua ma le faaola o le talalelei.
Ua ou lagona le faamamaluina i le sosoo atu ma Sister Parkin. O lana tautua ma aoaoga, faapea foi ma ona fesoasoani ua faamanuiaina ai i tatou uma. Pe tusa o le taimi lava lenei i le 18 1/2 tausaga talu ai, sa ou tutu ai i tafatafa o lenei pulelaa e faatalitali le maea o le pese a le faapotopotoga, ona ou laa atu lea i luma e tuuina atu la’u uluai lauga o le konafesi aoao. Atonu sa iloagofie lo’u popole i lena taimi. O Elder L. Tom Perry, sa tu i o’u tua, sa punou mai i luma, ma musumusu mai i lo’u taliga i se auala manaia ma le faamalosiau. “To’a,” na ia fai mai ai, “e leai lava se isi ua maliu i lena pulelaa talu mai tausaga e tele!”
O na upu faamalosiau ma i ni nai minute na sosoo ai lea sa ou lauga atu ai mo le uluai taimi i le aofia o le Au Paia o Aso e Gata Ai i le lalolagi atoa, o se mea e pele ou te manatuaina pea. E pei o outou uma, o loo ou faaputuputuina pea se faatanoa o mea e manatuaina, pe afai e manatuaina, e maua ai se vaega aoga ma sili ona olioli ai o lo’u malamalama. Ma, e ui i faaiuga sa ou faia o se alii talavou e ‘aua ne’i faamamafa i isi i le faamatalaina lea o ni mea e manatuaina pe a ou matua, ou te fia faaaogaina nei lena avanoa e faasoa atu ai ni mea ou te manatuaina e toetoe lava o faatasiga uma. Peitai, o le aso ou te fia talanoa atu ai i se matafaioi taua o le tomanatu ma le manatua i le talalelei a Iesu Keriso nai lo le na o le manatuaina o mea ma le olioli ai i faamatalaga.
Afai tatou te silasila totoa i aoga o le upu manatua i totonu o tusitusiga paia, o le a tatou iloaina ai o le manatua i le auala ua fuafuaina e le Atua, o se mataupu faavae taua ma le faaola o le talalelei. E mafua ona o loo faamanatu mai pea e le aunoa i apoapoaiga ina ia manatua e faatino: ia faalogo, ia vaai, ia fai, ia usitai, ia salamo.1 Afai tatou te manatuaina i le auala a le Atua, tatou te faatoilaloina lo tatou lagona faaletagata soifua e na ona saunia mo le taua o le olaga ae tau ai i le taua lava ia, ia faia mea uma i lo tatou malosi e tetee atu ai i faaosoosoga ma aloese ai mai le faia o le agasala.
Na talosagaina e le Tupu o Peniamina lea ituaiga o mataala ia manatua ai e lona nuu:
“O le iuga lenei, ou te le mafai ona ta’u atu ia te outou mea uma e mafai ona outou agasala ai ma ua tele ala ma togafiti eseese e faapea ona tele ou te le mafai ona faitau ai.
“A e peitai, ou te mafai ona fai atu lenei mea ia te outou, afai tou te le leoleo ia te outou lava, ma o outou manatu, ma a outou upu, ma a outou galuega, ma tausi i poloaiga a le Atua, ma tutumau i le faatuatua i mea ua outou faalogoina e uiga i le afio mai o lo tatou Alii, e oo lava i le iuga o outou olaga, e fano lava outou. O lenei foi, le tagata e, ia manatua, ina ia e le fano.”2
I le iloaina o le matafaioi taua o le manatua e faia i o tatou olaga, o a la isi mea e ao ona tatou manatuaina? I le tali atu i ai, i le faapotopoto ai e pei ona tatou i ai i le aso e manatua ma toe faapaiaina lenei Tapeneko logologoa, ou te fautua atu e ao ona tatou manatuaina le talafaasolopito o le Ekalesia a Iesu Keriso ma ona tagata. Ua tuuina atu e tusitusiga paia le faamuamua maualuga i le talafaasolopito o le Ekalesia. O le mea moni lava, o le tele o tusitusiga paia o le talafaasolopito o le Ekalesia. I le aso tonu lava na faavaeina ai le Ekalesia, na poloaiina ai Iosefa Samita e le Atua, “Faauta, o le a i ai se tala tusia faamauina e tausia e outou.”3 Na gaoioi Iosefa e tusa ai ma lenei poloaiga e ala lea i le tofiaina o Oliva Kaotui, le toeaina lona lua i le Ekalesia ma o lona fesoasoani sili, e avea ma uluai tausi talafaasolopito o le Ekalesia. Tatou te tausia faamaumauga ina ia fesoasoani ia i tatou e manatua, ma o se faamaumauga o le amataga ma le alualu i luma o le Ekalesia sa tausia lava mai le taimi o Oliva Kaotui e oo mai i le taimi nei. O lenei talafaasolopito ofoofogia e faamanatu mai ai ia i tatou na toe tatalaina e le Atua le lagi ma faaali mai upumoni lea ua valaauina lo tatou tupulaga ina ia faatinoina.
Mai mea uma lava na aoina, faasaoina, ma tusia e le au tusi talafaasolopito i le tele o tausaga, e leai se mea e faaalia ai le taua ma le mana o le talafaasolopito o le Ekalesia e sili atu nai lo le tala faamaoni ma le faigofie a Iosefa Samita i le faaali atu o le Atua le Tama ma Lona Alo o Iesu Keriso ia te ia lea ua ta’ua nei i a tatou tusi o talafaasolopito o le Uluai Faaaliga. I upu na tautino atu ai augatupulaga o faifeautalai ina ia manatuaina ma faasoa atu i e na sailia le upumoni i le lalolagi atoa, na faamatalaina ai e Iosefa le auala ofoofogia na ia maua ai se tali i lana fesili po o le fea Ekalesia e sao:
“Na ou vaai i se malamalama faaniutu i luga ae tonu o lou ulu, e sili atu le pupula nai lo le la, ua alu ifo malie lava seia oo mai ia te au.
“… Ina ua oo ifo le malamalama i ou luga, sa ou vaaia ni Tagata se toalua e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia tau lou igoa ma fetalai mai a o tusi ane lona aao i le tasi—O Lou Atalii Pele lenei—Faalogo ia te Ia!”4
Na faalogo Iosefa ia te ia! Ma ua fia miliona ua faalogo pe faitau ma talitonu i lana tala ma ua taliaina le talalelei a Iesu Keriso sa ia fesoasoani e toefuatai. Ou te talitonu ia Iosefa Samita ma iloa o ia o se perofeta moni a le Atua. O le manatuaina o lona aafiaga o le Uluai Faaaliga e le mafai ona faatoilaloina ai le musuia o lo’u tagata ina ia matuai tautino atu ma faatinoina.
E leai se tasi e sili atu lona talisapaiaina o le talafaasolopito o le Ekalesia nai lo Peresitene Gordon B. Hinckley. Tatou te fiafia i ona uiga malie, ae o lona lagona i le talafaasolopito e matuai mamana lava. O tala musuia ma tala faatatau mai aso ua mavae e tumu ai ana tusitusiga ma ana saunoaga. I le avea ai ma o tatou perofeta soifua, na te faamamafaina mai ai aso ua tuanai ma le lumanai ina ia fesoasoani ia i tatou e ola amiotonu atili i le taimi nei. O ana aoaoga ua tatou malamalama ai o le manatuaina e mafai ai ona tatou vaaia le taitaiga a le Atua i aso ua tuanai, e pei lava ona vavalo mai ma le faatuatua e faamautinoa mai ia i tatou le taitaiga a le Atua i le lumanai. Ua faamanatu mai e Peresitene Hinckley ia i tatou le ala na feagai ai uluai tagata o le Ekalesia ma o latou luitau e faapea foi i tatou, e ala i le alofa tunoa o le Atua, e mafai atili ai ona tatou feagai ma le faamaoni ma o tatou lava luitau. O le faaolaolaina o o tatou taimi ua tuanai, na te faafesootai ai i tatou i tagata, o nofoaga, ma mea na tutupu lea e afua mai ai lo tatou tofi faaleagaga, ma o le faia faapea, e uunaia ai i tatou ina ia faateleina le auauna atu, faatuatua, ma le agalelei.
I se auala lelei o faataitaiga na faasoa faalauaitele mai ai foi e Peresitene Hinckley mai lana lava talafaasolopito faapea ma lona aiga. E anoanoai faifeautalai fou o e ua faamafanafanaina i le iloaina lea i popofou o lana lava misiona, na faalotovaivaiina ai foi Peresitene Hinckley ia ma tautino atu i lona tama. Na ia faasoa mai foi ma le lototele le tali puupuu a lona tama: “Le pele Gordon, ua ou maua lau tusi talu ai. E na o le tasi lava la’u fautuaga: faagalo oe ae alu e galue.”5 I le silia ma le 70 tausaga mulimuli ane, o i tatou uma lava o ni molimau i le auala na taliaina ai ma le loto e Peresitene Hinckley lena fautuaga. O lona uiga faatupumanatu ma lana faautautaga faaperofeta ua tuuina mai ai se faamaoniga faatauanau mo le aoga o le manatuaina o le talafaasolopito o le Ekalesia e faapea foi ia te oe lava.
E tele naua mea e tautalagia e uiga i mea e manatua ma le manatuaina i le talalelei a Iesu Keriso. E masani ona tatou talanoa i le manatuaina o a tatou feagaiga paia ma poloaiga a le Atua, ma le manatuaina ma le faatinoina o sauniga faaola mo o tatou tuaa ua maliliu. O le mea e sili ona taua, tatou te talanoa e uiga i le manatuaina o lo tatou Faaola o Iesu Keriso ae le seiloga o taimi talafeagai, ae o taimi uma, e pei ona Ia fetalai mai.6 Tatou te molimau atu ina ia manatua pea o ia pe a tatou taumamafa i le faamanatuga. Afai e faapea, ua folafola mai o le a faatasi pea Lona Agaga ma i tatou. O le mea e maofa ai, o le Agaga lava lenei e tasi na auina mai e lo tatou Tama Faalelagi ina ia “faamanatu mai foi ia i [tatou] i mea uma.”7 O lea, o le taliaina ma le agavaa o le faamanatuga, e faamanuiaina ai i tatou e le Agaga ina ia ulu atu i se siosiomaga matagofie o le manatuaina, e toe foi mai pea lava pea i o tatou mafaufau ma tuuto atu ia Keriso ma Lana Togiola.
O le o mai ia Keriso ma faaatoatoaina ia te Ia, ou te talitonu, o le faamoemoega autu lava o mea uma e manatuaina.8 O lea, ou te tatalo ai ina ia faamanuia pea i tatou e le Atua ina ia manatua, aemaise lava Lona Alo atoatoa, ma ia lē fano lava. Ou te molimau atu ma le agaga faafetai i le paia o Keriso ma lona mana faaola. I le suafa o Iesu Keriso, amene.