O Afafine o le Tama Faalelagi

Susan W. Tanner

Peresitene Aoao o Tamaitai Talavou

E silafia oe e le Tama Faalelagi ma e alofa ia te oe. O oe o Lona afafine faapelepele. Ua i ai Lana fuafuaga mo oe.

Sa ta’u atu e le toalua o la’u tama teine i lona afafine o Eliza e tolu tausaga, o le a fai se latou lesona faapitoa i le latou afiafi faaleaiga. Sa ataata fiafia o ia ma taumafai e mate le faaiteite. “Ai e faatatau ia te au,” o lana tala lea, “aua e taua tele au!” E manatua e Elisa lona faasinomaga—o se afafine e matuai faapitoa lava o le Atua. Sa aoaoina e Elisa lenei mea mai lona tina, o lē sa usuusuina le “O A’u se [Afafine] o le Atua” (Viiga, nu. 184), o se pese faamoepepe.

I le lalolagi atoa ma e toetoe lava o gagana uma, e tautino atu ai foi e tamaitai talavou ua ta’i 12 tausaga e oo atu i le 18 le mea lava lea e tasi: “O i matou o afafine o lo matou Tama Faalelagi, e alofa ia i matou, ma e matou te alolofa foi ia te Ia” (“Autu a Tamaitai Talavou,” Alualu i Luma o le Tagata Lava Ia [tamaitusi, 2001], 5). Ae a o latou tuputupu ae, e masani ona mou ese atu le iloa mautinoa lea e iloa e Eliza e tolu tausaga, faapea e matuai faapitoa lava i latou. E masani ona feagai le autalavou ma se tulaga matautia o le faasinomaga e taumanatunatu ai pe o ai moni lava i latou. O tausaga o le talavou, ou te faamatalaina o le “gaoi faasinomaga,” o lona uiga o manatu faalelalolagi, o filosofia, ma faa’ole’ole e faafenumia’i ai i tatou, e faamafatia ai, ma taumafai ai e faoa lo tatou iloa o lo tatou faasinomaga moni.

Sa fai mai se tasi tamaitai talavou lelei ia te au, “O nisi taimi ou te le mautinoa ai po o ai au. Ou te le lagonaina le alofa o le Tama Faalelagi. E foliga mai e faigata lo’u olaga. E le taunuu i le mea sa ou manao ai, faamoemoe i ai, ma moemiti i ai.” O la’u tala sa fai atu i ai, lea o le a ou fai atu ai foi i tamaitai talavou uma i soo se mea: Ou te iloa ma le manino lelei, o oe o se afafine o le Atua. Na te silafia oe, e alofa o Ia ia te oe, ma ua i ai Sana fuafuaga faataatia mo oe. Ou te iloa o se savali lenei ua finagalo le Tama Faalelagi ou te faasoa atu ia te outou.

Ua tautino mai e perofeta ma aposetolo o aso e gata ai o tatou natura paia. O loo faapea mai le folafolaga i le lalolagi e uiga i aiga: “O i [tatou] taitoatasi o se atalii po o se afafine faaleagaga faapelepele a ni matua faalelagi, ma, o lea ua tofu ai i tatou taitoatasi ma se natura ma se taunuuga paia” (Liahona, Oke. 2004, 49). Ma sa saunoa mai foi Peresitene Hinckley:

“E le faaluaina lava outou. O outou o afafine o le Atua.

“Ua ia te oe se tofi, matagofie ma le paia ma faalelagi. Ia aua lava nei galo lena mea. O lou Tama Faavavau o le Alii sili o le atulaulau. Na te pulea tagata uma, ae e faafofoga mai foi ia te oe pe a e talanoa atu ia te Ia. E tali mai o Ia i au tatalo. Na te le tuulafoaiina lava oe” (“Tumau ai i le Ala Tanu,” Liahona, Me 2004, 112–115).

A’o e faamautuina i le ta’ele o lou loto le iloa o oe o se afafine o le Atua, o le a faamafanafanaina ai oe, faamalosi ai lou faatuatua, ma ta’a’ina ai lau amio. Afai e te faatagaina lenei upumoni faaleatua e teuteu ai ou manatu i le mama e le aunoa, o le a e maua le lagona mautinoa i luma o le Atua, e pei ona folafola mai la tatou autu o le Mutuale (tagai MFF 121:45).

E mafai faapefea e i tatou taitoatasi ona iloa ma lagona o i tatou o afafine o le Tama Faalelagi? O loo i ai se pupuni i le va o le lagi ma le lalolagi, “o se moe ma se faagaloina” (William Wordsworth, “Ode on Intimations of Immortality from Recollections of Early Childhood,” fuaiupu 5, laina 58) pe a tatou fananau mai. E tatau lenei mea mo i tatou ina ia “maua ai tomai faalelalolagi latou te maua ai le atoatoaga ma iloa tino ai [o tatou] taunuuga paia o [ni suli] o le ola e faavavau” (Liahona, Oke. 2004, 49). E alofa le Tama Faalelagi ia i tatou ma e finagalo e fesoasoani ia i tatou ina ia manatua o Ia, o lea Na te saunia ai mo i tatou ni vaaiga pupuu i le faavavau. Sa aoao mai e le Aposetolo o Paulo “O loo molimau mai lea lava Agaga i o tatou agaga, o fanau i tatou a le Alii” (Roma 8:16). E tuu mai e le Agaga ia i tatou ni nai vaaiga pupuu i lo tatou faasinomaga. E masani ona tautala mai le Agaga ia i tatou pe a tatou tatalo, faitau tusitusiga paia, mafaufau loloto i le alofa mutimutivale o le Alii ia i tatou, mauaina faamanuiaga o le perisitua, auauna atu i isi, pe lagonaina foi le alofagia ma lagolagoina e isi.

Sa iloa e Mose ia lava e ala i se aafiaga mamana faaleagaga. Sa talanoa faafesagai i la’ua ma le Atua ma sa ia aoaoina ai o ia o se atalii o le Atua, ma o loo i ai se misiona faapitoa na te faataunuuina. Ina ua maea lenei aafiaga faaleagaga ofoofogia, sa feagai o ia ma tu’iga a Satani. Ae talu ai sa lagona e Mose le mamalu o le Atua, o lea na ia iloa ai e leai se mamalu o i a Satani. Ona sa iloa e Mose o ia o se atalii o le Atua ma e i ai se misiona a le Atua mo ia, o lea sa i ai ia te ia le mana ma le gafatia e teena ai Satani, e faia ai faamasinoga amiotonu, e saili atu ai i le Atua mo le malosi, ma faaauau ai pea ona ia maua Lona Agaga la te mafuta. (Tagai Mose 1.)

E faatatau foi lena lava mamanu ia i tatou. A oo ina tatou iloa ma lagonaina po o ai moni lava i tatou, ua mafai ona tatou iloaina le eseesega o le lelei ma le leaga, ma tatou maua le malosi e tetee atu ai i faaosoosoga. O se tasi o auala e mafai ona tatou malamalama ai i le misiona faalelagi na tofia ai i tatou e Ia, o o tatou faamanuiaga faapeteriaka. O ni savali e matuai ma’oti ma patino, e mafai e i tatou uma taitoatasi ona maua e ala i le mana o le perisitua.

O se tasi auala e maua ai le malamalamaaga faaleagaga e uiga i o tatou lava natura faavavau, e mai i se matua po o se taitai o lē e mafai ona faamautinoaina i tatou e uiga i o tatou lava natura faavavau, ona o vaaiga musuia pe o ai tonu lava i tatou. Sa matua patino le musumusu mai o le Agaga ia te au i se taimi e uiga i le faasinomaga moni o la’u fanau. Ou te manatua le po a’o lumanai le fanau mai o se tasi o a ma’ua pepe, sa matua maoti le uunaiga na ou maua, o lenei pepe o se uo silisili ma se fesoasoani i nai ona tei. Ua faamaonia le matuai moni a’ia’i o lenei mea. I se tasi taimi sa matua le fiafia ai se tasi o le ma fanau talavou ona sa aafia i se faalavelave tau taavale, sa manino lo’u faalogoina o nei upu i lo’u mafaufau: “Ou te alofa i lo’u afafine lena, ma o le a ou taialaina lona olaga.” Ma sa Ia faia lava. Ua fo’i mai faafia ia te au na vaaiga. A latou manaomia le faamalosiauga, e faamanuiaina lava au i le malamalama i agaga silisili ma le tamalii o la’u fanau.

Pe ua faamanatu atu ea e lou tina po o lou tama ia te oe pe a e tuua le fale ina ia “manatua po o ai oe”? O le a le uiga o lena tala? “Ia manatua o oe o se itutino o lenei aiga o loo i ai se uiga tauleleia e tatau ona tausisia.” Ae, e sili atu foi ona taua, “Ia manatua foi o oe o se afafine o le Atua ma e tatau ona e amio ai faapena.” E tauave e faifeautalai se pine e avea o se faamanatu i taimi uma o i latou o sui O Le Ekalesia a Iesu Keriso o le Au Paia o Aso e Gata Ai. E faamanatu atu ai foi i faifeautalai ina ia laei talafeagai ma fai faalelei, ia latou taulimaina ma le faaaloalo tagata, ma taumafai ina ia i ai i o latou mata foliga o Keriso. E tatau ona latou faia nei mea aua o loo latou faaaogaina lena pine o le igoa, o se faailoga vaaia o lo latou faasinomaga. E ala i feagaiga, ua tatou tauaveina ai i o tatou luga uma le suafa o Keriso. E ao ona tusia Lona suafa i totonu o o tatou loto. E faapena foi, ua faamoemoeina i tatou e amio ai o ni fanau agavaa a le Tama Faalelagi, o lē na auina mai i tatou i le lalolagi ma se apoapoaiga “Manatua po o ai oe!”

Ina ua tofia au e auauna atu ia te outou, tamaitai talavou o lenei Ekalesia, sa ou iloa e tatau ona fai lelei la’u amio. I se tasi aso na sala ai se tasi o la’u fanau teine ona o le tu o lana taavale i le aualatele, ma se laisene ua uma le aoga. Ou te lei toe faatali ae ou laa loa ma lo’u mateletele i le fale o le malo e faamatala i ai, o la e lafo mai pepa o le laisene i le taimi lena i le meli. A o ou savali mateletele atu i le faitotoa, sa fai mai se tasi ia te au, “Ou te iloa oe.” O le mea lena na taofia ai au ma sa faamanatu mai ai, e tatau foi ona ou manatua a’u—ua le na o se peresitene aoao o Tamaitai Talavou, ae e sili ona faapitoa o se afafine o le Atua.

I mafutaga e tatau ona tatou manatua o isi [tagata] o fanau foi a lo tatou Tama Faalelagi. Ina ua ma faatoa faaipoipo, e tele lava taimi e fai mai ai lo’u toalua ia te au, “Ou te lei faaipoipo ia te oe ona o ou foliga.” Na iu ina ou taufaalili laitiiti foi i ai i lo’u fai atu, “E le se taufaasee tele foi lena mea.” Sa ia faamatala maia le mea ua uma foi ona ou iloa, o lea tala sa faia ma le faamoemoe o le faaviivii aupito maualuga lea e mafai ona ia faia mo au. Fai mai a ia, “Ou te alofa ia te oe i lou lava tulaga faalenatura ma le faavavau.” Na fetalai mai le Alii: “Aua e te vaai i lona tino, po o le maualuga o lona tino; … aua e le vaai Ieova pei o le vaai o tagata; aua e vaai tagata i le tino, a e vaai Ieova i le loto” (1 Samuelu 16:7). I totonu o aiga, faigauo, tafaoga faamasani ma faaipoipoga, e tatau ona tatou faatauaina e le gata i le lalelei ma tomai faigaluega, ae o le amio, uiga lelei, ma isi natura paia e ola mai ma le tagata.

I se siteki i Chile sa faia ai e tamaitai talavou lenei mea e ala i le taufai tausia o se api e tusi ai uiga lelei o le tasi tagata e le isi. O aso taitasi, e faasolosolo ai ona masani lelei ma tusitusi i lalo natura lelei latou te aoaoina e uiga i isi tagata taitoatasi. Ina ua uma le tolauapiga, sa latou fetufaai o latou mafaufauga, ma fesoasoani i tagata taitasi ina ia faateleina lana vaai i lona lava paia. Fai mai lo latou taitai, “Na matuai faatumulia i matou i lenei agaga matagofie o le agalelei ma le lotoalofa. E mafai ona ou fai atu ma le faamaoni, ou te lei faalogo lava i se upu faitio mai teineiti! Sa lauolaola lo latou agaga lelei o le taliaina ma le faamaoni, lea e le masani ona maua i tupulaga a nei teineiti. Sa leai se faatautava, leai se feitagai. Sa avea le matou tolauapiga o si lagi itiiti” (tusi a le tagata). Sa toe faatulaga ma toe faamanatu e teineiti ia natura paia o le tasi ma le isi, ma sa faatumulia i le Agaga le tolauapiga a o fefaaalia’i o latou mafaufauga mama.

Sa ta’ua ma le poto e C. S. Lewis: “O se mea matautia le ola i se sosaiete o ni atua ma ni atua fafine, ia manatua o le tagata e aupito sili ona valea ma lē amanaia e mafai ona e talanoa i ai, e ono i ai se aso e avea ai ma se tasi, pe afai e te vaai nei i ai, o le a matua faaosoosoina lava oe e te ifo i ai… . E leai ni tagata noa… . O lou tuaoi o se mea aupito paia lea ua tuuina atu i ou lagona” (The Weight of Glory,” in Screwtape Proposes a Toast and Other Pieces, (1974), 109–110).

O tamaitai talavou uma i soo se mea, o ē ua iloa o i latou ma isi foi o afafine o se Tama Faalelagi alofa, latou te faaalia lo latou alolofa ia te Ia e ala i ni olaga amioatua, ola tautua, ma avea ma ni faataitaiga. Sa matua faagaeetia lava au i tamaitai talavou o ē sa fai o latou laei e tausaafia ai i se vaega e ese le vevela ma susū o Pasila. Sa latou fai mai, “O le tausaafia e le faatatau i le tau. E faatatau i le loto.” Sa iloa e nei tamaitai talavou o i latou o afafine o le Atua.

Sa ootia lava au ina ua ou iloa le lelei o tamaiti aoga talavou e toalima o le AAG mai Idaho sa malelemo talu ai nei i se faalavelave matuia. Sa lauiloa i latou e a latou paaga ma o latou nuu i le ola ai i tulaga faatonuina o le amiotonu ma o ni faataitaiga maoae o le amio mama ma le atoatoa. Sa iloa e nei talavou o i latou o ni atalii ma ni afafine o le Atua.

Sa faagaeetia lava au i se faataitaiga a se tasi tamaitai talavou ua tetea ona matua. E lei manao o ia e lagona e lona tuagane laitiiti ma ona uso faapea ua le alofagia i latou, o lea sa latou tatalo faatasi ai i po uma ma sa ia ta’u atu i ai e alofa o ia ia te i latou. E iloa e lenei tamaitai talavou o ia o se afafine o se Tama Faalelagi e alofa ia te ia, ma e alofa foi o ia ia te Ia e ala lea i lona alofa i nai ona tei.

Sa faagaeetia foi au ina ua ou faalogo e uiga i aga a ni tamaitai talavou i se eria o le lalolagi ua mafatia i le mativa ma sauaga faaupufai. E ui i o latou lava faigata, sa feiloai nei tamaitai talavou i se tolauapiga ma latou fuafuaina ai ni auala e siitia ai isi. Sa latou faia ni pusa faasoifua maloloina mo fafine o loo manaomia. Sa latou faia ni auaunaga faaopoopo i le nuu, o falemai, ma fale. Ua tatou iloa i a latou faatinoga, ua malamalama nei tamaitai talavou i lo latou faasinomaga o ni afafine o le Atua. Ua matua faatumulia lo’u loto i le alofa i nei tamaitai talavou ma tamaitai talavou i soo se mea. Ou te iloa o outou o afafine o le Atua o lē e alofa ia te outou.

I le faaiuga, ou te fia faasoa atu ai se aafiaga e pele ma e paia foi ia te au. Ina ua faatoa tofia au ou te galue o se peresitene aoao o Tamaitai Talavou, sa ou lagona le atuatuvale ma le le agavaa. E tele po ou te le moe ai i lo’u popole, salamo, ma ou te tagi. Ina ua mavae ni nai po o lenei faiga, sa oo mai se aafiaga loloto ia te au. Sa amata ona ou mafaufau i nai o’u tei tamaitai talavou, ona ou mafaufau ai lea i tamaitai talavou o o’u tuaoi ma le uarota, sosoo atu ai ma tamaitai talavou e masani ona ou vaai i ai i le aoga maualuga, ona ou mafaufau ai lea i tamaitai talavou o le Ekalesia i le lalolagi atoa, lea ua silia ma le afa miliona. Sa amata ona lofituina au i se lagona mafanafana ofoofogia, ma sa siomia ai au. Sa ou lagonaina se alofa matalasi mo tamaitai talavou o le Au Paia o Aso e Gata Ai i soo se mea, outou uma taitoatasi, ma sa ou iloaina o le mea lea sa ou lagonaina, o le alofa o le Tama Faalelagi mo outou. Sa mamana ma matuai lofituina. O le taimi muamua lea sa ou lagonaina ai le filemu, aua sa ou iloaina le mea na finagalo le Tama Faalelagi ou te faia. Sa finagalo o Ia ou te molimau atu ia te outou i Lona alofa tele mo outou. Ma o lea ou te toe tautino atu ai foi ia te outou ou te iloa e aunoa ma se masalosalo, e silafia oe e le Tama Faalelagi ma e alofa ia te oe. O oe o Lona afafine faapelepele. Ua i ai Lana fuafuaga mo oe, ma o le a i ai pea o Ia iina e taitai oe, taiala oe, ma savali i ou tafatafa (tagai “O Au o se [Afafine] o le Atua”). Ou te tatalo faatauanau ina ia e iloa lenei mea ma ia e lagonaina, i le suafa o Iesu Keriso, amene.