O Perofeta— i Aso o Paionia ma Aso Nei
O Peresitene Polika Iaga ma Peresitene Gordon B. Hinckley o perofeta ua taitaia le Ekalesia e ala i musumusuga ma faaaliga.
Ou uso e ma tuafafine, a o ou tulai atu i le pulelaa o lenei Tapeneko tuai ma ua fou, ua lofituina au i se manatu e uiga i le talafaasolopito ua ou lagonaina i lenei taimi. A o ou mafaufau i le taimi ua tuanai ma vaavaai atu i le lumanai, ou te faafetaia ai perofeta ma aposetolo i aso o paionia ma aso nei, o e na i ai ma o loo i ai pea le tofamamao e faatuina ma faalautele atu i le lumanai lenei fale matagofie.
Ou te fia talanoa i le toalua o na tamalii o e na i ai lea tofamamao: o Polika Iaga ma lona sui i le taimi nei.
O Polika Iaga o le perofeta lona lua lea O Le Ekalesia a Iesu Keriso o le Au Paia o Aso e Gata Ai. Sa ia taitaia le Ekalesia mo le 33 tausaga. Na ia fausia lenei Tapeneko ma pulefaamalumalu ai i lona faapaiaga i le taimi o le konafesi aoao ia Oketopa i le 1875, ua silia i le 131 tausaga talu ai.
E tele isi mea na ia ausia, ae na o ni nai mea na ausia ou te ta’ua.
O ia o se paionia, o lona uiga o se tasi e tatalaina pe saunia le ala mo isi e mulimuli atu i ai. Na tusia e se tasi tusitala e uiga ia Polika Iaga: “Sa ia taitaia se vaega o tagata le atoatoa ma matitiva, na aveesea toetoe o a latou mea uma o le olaga nei, i se nofoaga e le mailoa. Na taua e ona fili ma le au tusitala o lona soifuaga e faapea, e tulaga ese le alii i taitai uma i le talafaasolopito o ona po nei, aua na o ia lava le tagata, na aunoa ma se fesoasoani faaupufai ma tautupe, ma amataina mai le leai o se mea, na faatulagaina ma taitaia se nuu maelega, na leai lava se isi pule nai lo le perisitua ma le malosi faaleagaga lea na ia tuuina atu ai ana aoaoga. E ala i aoaiga ma aoaoga fai soo, na ia aumaia faatasi ai lona nuu ma musuia i latou i le faataunuuina o le poloaiga faalelagi ina ia fausia le malo o le Atua i luga o le fogaeleele.”1
O le taimi muamua na taunuu ai Polika Iaga i le vanu Tele o Sate Leki, na ia tautino ai e faapea, “O le nofoaga tonu lenei.”2 Sa ia saunoa mulimuli ane e faapea:
“Ua faaali mai e le Atua ia te au, o le nofoaga lenei e faamautu ai lona nuu, ma o iinei o le a latou manuia ai; o le a ia faamaluina elemene mo le manuia o le Au Paia; o le a ia faatonuina le malulu ma le le fua mai o le eleele, ma o le a fua tele mai le fanua, … ma o le a tatou fausia se aai ma se malumalu mo le Atua silisili i lenei nofoaga.”3
O le aso, e mafai ona tatou molimau uma i le moni o lenei valoaga. E moni lava, o le laueleele toafa ma vanu o Mauga Papa, ua o se laueleele faamanuiaina ma tauia o folafolaga ma valoaga.
Na ia fausia malumalu. Na ia amataina le Malumalu o Sate Leki, lea e 40 tausaga na faamaeaina ai. Na ia amataina foi Malumalu o Manti ma Logan. Na ia faapaiaina le Malumalu o St. George, e 4 1/2 masina ae maliu o ia.
O ia o se tasi o tagata faato’a nofoaga maoae a Amerika. E oo atu i le taimi o lona maliu, ua toetoe lava 400 nuu na faatuina.
Na ia faatulagaina le Tupe Faaagaga mo Femalagaaiga e aapa atu ai ia i latou e lima vaivai, e fesoasoani ai ia i latou na utiuti seleni e malaga atu ai mai atunuu Europa.
Na ia faatuina iunivesite. O le Iunivesite o Deseret ua taua nei o le Iunivesite o Iuta. O le Kolisi o le Au Paia o Aso e Gata Ai ua taua nei o le Kolisi Faapisinisi a le Au Paia o Aso e Gata Ai. Ma, ioe, na ia faatuina foi le Iunivesite o Polika Iaga.
Sa alofa o ia i le Ekalesia ma ona tagata. Na i ai se auala tulaga ese a Polika Iaga na te faatatau atu ai i le Ekalesia:
“O le Atua o loo tu i le foe. O le sa tele lenei o Siona. Ia e pipii i le sa ma faamamalu i ai, ma ia mautinoa o loo e tasi ma le sa o Siona, ma e te le tau popole ai i se isi mea… .
“… Na te taitaia le sa, ma o le a ia aumaia i tatou ma le saogalemu i le uafu. Na pau le mea tatou te mafaufau i ai, o le tausia faalelei lea o i tatou lava ma vaai ia tatou faia le mea sa’o. Ia tatou galulue i le sa ma le lototetele, ia tutu tagata uma ma le faamaoni ma le mausali i lona tulaga, ma o le a sao o ia mai matagi uma ma aveina atu i tatou ma le saogalemu i le uafu o le olioli tele faaselesitila.”4
Na alofa o ia i le autalavou a le Ekalesia, e pei ona manino i le aafiaga a Heber J. Grant. O le lona iva o aso talu ona fanau Heber, ae maliu lona tama o Jedediah M. Grant, o le sa Fesoasoani Lua ia Peresitene Polika Iaga. Mo le 21 tausaga na sosoo ai, sa faapitoa lava le mataituina e Polika Iaga o le taulealea o Heber J. Grant.
Na tusia e Heber J. Grant:
“Na toeitiiti lava pei lou masani i fale o Peresitene Polika Iaga, o lou i ai i le fale o lou lava tina. I se tasi o fale … afai sa ou fiaai, sa ou lagona lava le saoloto e alu atu i totonu ma fesili mo se meaai e pei lava o totonu o lou lava fale… . Ua faafia ona ou tootuli i totonu o lona fale i le Maota Leona i tatalo faaleaiga, a o ou laitiiti ma a o ou talavou.”5
Sa alofa o ia i le Perofeta o Iosefa Samita. Na ia saunoa e uiga i lenei tulaga:
“O mea ua ou mauaina mai le Alii, na ou mauaina lea mai ia Iosefa Samita.”6
“Ou te fiafia i ana aoaoga… . Sa ou lagona le fia alaga atu Aleluia, i taimi uma, pe a ou manatu sa ou iloaina Iosefa Samita.”7
E ese lou alofa ia Polika Iaga. O lona sui i aso nei o Peresitene Gordon B. Hinckley, o se perofeta pele ma le faaaloalogia.
O se ata vali matagofie lava o loo faaalia ai Peresitene Hinckley o loo tulimatai atu i le lumanai, o loo i ona luma se seti o ata faataatitia. O le itu i tua o loo i ai se ata o Polika Iaga, e foliga mai o loo tilotilo ifo Peresitene Iaga i luga a’e o le tauau o Peresitene Hinckley.
O le ata o Polika Iaga o loo faaalia i lenei ata vali, o loo tautau moi i totonu o le ofisa o Peresitene Hinckley, ma e masani lava ona saunoa o ia e uiga i ai. I se konafesi aoao e le’i mamao atu, sa ia saunoa ai:
“I le faaiuga o se tasi aso faigata, sa ou tilotilo a’e ai i le ata o Polika Iaga o loo tautau i le puipui o lo’u ofisa. Sa ou fesili atu i ai, ‘Uso Polika, o le a le mea e tatau ona matou faia?’ Sa ou manatu na ou vaaia o ia o soisoi, ona pei lea sa foliga o loo fai mai: ‘I o’u foi taimi, sa lava ma totoe foi a’u faafitauli sa taulimaina. Aua e te fesili mai pe o le a le mea e fai. O le taimi lenei o lau leoleoga. Fesili i le Alii, aua o Lana galuega moni lava lenei.’”8
O nei perofeta maoae e toalua, o Peresitene Polika Iaga ma Peresitene Gordon B. Hinckley, e fesootai i lo laua tofamamao faaperofeta faifaatasi, e oo mai i le vaaia o le lumanai ma le i ai o le faatuatua e faatinoina ai lena tofamamao i le taimi nei.
O Peresitene Hinckley, e pei foi o Polika Iaga, o se paionia ma se faufale. Ua femalagaai o ia i le lalolagi, ua feiloai atu i tupu, tupu tamaitai, ma peresitene. Na faatalanoaina o ia e tusitala o le lalolagi. O loo faaauau pea ona ia aumaia le Ekalesia “nai le mea lilo ma le pogisa.”9 E sili atu ma le 75 malumalu na fausia i le 12 tausaga ua mavae. Ma na ia mauaina foi le musumusuga ina ia fausia le Nofoaga Autu mataina mo Konafesi.
O Peresitene Hinckley, e pei foi o Polika Iaga, ua faasalalauina le talalelei ma faatauaina aoaoga. O le faitau aofai o le Ekalesia i le taimi nei ua oo atu i le 13 miliona i malo, teritori ma atunuu e 176. E silia ma le 53,000 faifeautalai o loo faataamilo i le kelope. O lenei konafesi o loo faasalalauina i gagana e 90. O loo faaauau pea ona ia lagolagoina iunivesite ma aoga a le Ekalesia. E silia ma le 26,000 tagata o le ekalesia o loo sapi nei i faamanuiaga o le Tupe Faaagaga mo Aoga.
O Peresitene Hinckley, e pei foi o Polika Iaga, e alofa i le autalavou ma tagata uma o le Ekalesia. O le autalavou a le Ekalesia e faapitoa lava le aapa atu ia Peresitene Hinckley mo fautuaga faaperofeta.
E alofa Peresitene Hinckley i le Perofeta o Iosefa Samita. I nai tausaga ua mavae, sa ia saunoa mai ai:
“Ou te tapuai i le Atua o le lagi o lou Tama lea e Faavavau. Ou te tapuai i le Alii o Iesu Keriso, o lou Faaola ma lou Togiola. Ou te le tapuai i le Perofeta o Iosefa Samita, ae ou te faaaloalo ma alofa i lenei talifaaaliga maoae, o ia ua ala mai ai le vavega o le toefuataiina mai o lenei talalelei. O lenei ua faasolo ina ou matua, ma ua ou iloa i le ala faalenatura o mea e tutupu i luma atu o ni tausaga se tele, o le a ou laasia ai le faitotoa e tulai i luma o lou Foafoa ma lou Alii, ma tuuina atu se faamatalaga o lou olaga. Ma ou te faamoemoe o le a ou maua le avanoa e opoina ai le Perofeta o Iosefa Samita e faafetai atu ia te ia, ma tau atu lou alofa ia te ia.”10
E tuuina atu lau molimau ma le agaga maualalo o Peresitene Polika Iaga ma Peresitene Gordon B. Hinckley o perofeta ua taitaia le Ekalesia e ala i musumusuga ma faaaliga. I le suafa o Iesu Keriso, amene.