Vaega Tonu o le Toe Foi Saogalemu
O le meaalofa o le Togiola a Iesu Keriso, tatou te maua ai i taimi uma ma nofoaga uma faamanuiaga o le salamo ma le faamagaloga.
I le taimi o a’u aoaoga faatino ina ia avea ma se kapeteni o vaalele, sa ou aoao pe faapefea ona faafoeina se vaalele i malaga mamao. O malaga e laasia ai vasa tetele, o toafa tetele, ma malaga mai lea konetineta i lea konetineta e manaomia ai lava le fuafuaina ma le faaeteete, ina ia mautinoa ua taunuu saogalemu i le taunuuga sa fuafuaina. O nisi o nei malaga e leai se malolo e mafai ona oo atu i le 14 itula ma e toetoe lava atoa le 9,000 maila e aofia ai.
E i ai se itu taua o se faaiuga i le taimi o ni malaga uumi e masani ona iloa o le itu o le toe foi saogalemu. E oo atu i le itu lea o loo lava lelei le suauu o le vaalele e toe liliu ai ma toe foi saogalemu i le malaevaalele na amata mai ai. O le pasia o le vaega tonu o le toe foi saogalemu, ma ua le mau fetuunaiga ai le kapeteni ma e tatau ona faaauau pea. O le mafuaaga lena e masani ona ta’ua ai le vaega tonu lenei o le vaega tonu o le le toe foi mai.
Pe o I Ai Ea ni Vaega Tonu o le Le Toe Foi Mai i o Tatou Olaga?
O Satani, “o le tama o pepelo uma” (2 Nifae 2:18), “o le tama o finauga” (3 Nifae 11:29), “o le pogai o agasala uma” (Helamana 6:30), ma o “lē ita i le Atua” (Moronae 7:12), na te faaaogaina malosiaga o le amioleaga e faatalitonu ai i tatou o le vaega tonu lenei e faaaoga pe a tatou agasala. Ua ta’ua o ia i mau o “lē na molia” aua e manao o ia ia tatou lagona faapea ua le mafai ona toe faamagaloina i tatou (tagai Faaaliga 12:10). E manao Satani ia tatou mafaufau faapea a tatou agasala, ua tatou pasia se “vaega tonu o le le toe foi mai”—ua tuai tele ona toe suia lo tatou ala. I lo tatou lalolagi matagofie ae e pagatia foi, o se tulaga moni faanoanoa ona o lenei uiga o le faapogai o le tiga tele, faanoanoaga, ma le atuatuvale o aiga, ulugalii, ma olaga o tagata taitoatasi.
E taumafai Satani e faaa’oa’o pepelo le galuega a le Atua, ma o le faia o lenei mea e ono faasese ai le toatele. Ina ia tatou lafoai lo tatou faamoemoe, lagona le faanoanoa e pei o ia lava, ma talitonu ua le mafai ona toe faamagaloina i tatou, e mafai e Satani ona faaaoga sese upu mai tusitusiga paia lea e faamamafa ai le faamasinoga tonu a le Atua, ina ia faauiga ai faapea e leai se alofa tunoa.
O Le A Le Fuafuaga a le Alii mo Lo Tatou Toe Foi Atu Saogalemu?
O le puipuiga mai i faatosinaga a le tiapolo, e maua mai i le talalelei a Iesu Keriso. O le tala lelei ua faia e Iesu Keriso se Togiola atoatoa mo le tagata. O le savali o le alofa, faamoemoe, ma le alofa mutimutivale, o loo i ai se togiola o le tagata i le Atua.
O le agasala o le solia lea ma le loto i ai o le tulafono paia. O le Togiola a Iesu Keriso, o le meaalofa a le Atua i Lana fanau e faasa’o ma faatoilalo ai taunuuga o le agasala. E alofa le Atua i Ana fanau uma, ma o le a le uma lava Lona alofa ma le faamoemoe mo i tatou. E manino lava le fuafuaga a lo tatou Tama Faalelagi, ma e maoae foi Ana folafolaga: “Aua e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi …” (Ioane 3:17).
Na afio mai Keriso e laveai i tatou. Afai na tatou uia se ala sese, e mafai e le Togiola a Keriso ona aumaia ia i tatou le faamautinoaga faapea o le agasala e le o se vaega tonu o le le toe foi atu. E mafai ona toe foi saogalemu pe afai tatou te mulimuli i le fuafuaga faataatia a le Atua mo lo tatou faaolataga.
Ua tatou mauaina lenei fuafuaga mai le pule silisiliese i le atulaulau, o le Atua, lo tatou Tama Faalelagi. Na saunia lenei fuafuaga a o lei faavaeina le lalolagi. O se fuafuaga sili o le fiafia, o se fuafuaga o le alofa mutimutivale, o se fuafuaga o le togiola, o se fuafuaga o le faaolataga. O lenei fuafuaga e mafai ai e i tatou ona maua se olaga faaletino, e aofia ai le faitino, se taimi e faata’ita’i ai, ma toe foi atu ai i le afioaga o le Atua ma ola ai i le fiafia faavavau ma le mamalu. O loo faamatalaina mai i aoaoga faavae o le talalelei toefuataiina a Iesu Keriso.
O le mulimuli i lenei fuafuaga o loo i ai ni taunuuga matagofie faavavau mo i tatou taitoatasi, o o tatou aiga, o tupulaga o le a oo mai, e oo lava i tupulaga na muamua atu. O le fuafuaga e aofia ai le faaleleiga paia ma le faamagaloga.
E Mafai Faapefea le Faamagaloga Paia?
Ua tatou malamalama “ua agasala tagata uma lava, ma ua le oo i le viiga mai le Atua” (Roma 3:23), ae tatou te tautino atu foi ma le maumaututu o le salamo ma le faamagaloga e mafai foi ona moni e pei lava o le agasala.
O le Togiola a Iesu Keriso e afua ai ona faamasinoina tagata taitoatasi mo a latou lava agasala. Tatou te faatoilaloina aafiaga o agasala taitasi e ala i lo tatou taliaina o faamanuiaga ma aoga o le Togiola.
Na saunoa Peresitene Tavita O. MaKei, “O mataupu faavae uma ma sauniga o le talalelei a Iesu Keriso e maoae ma taua … , peitai e leai se mea e sili atu ona taua mo le faaolataga o le aiga tagata nai lo le mataupu faavae paia ma le faavavau [o le] salamo” (Gospel Ideals 1953, 13).
“Aua e le oo le olataga i se tasi … seiloga ona o le salamo ma le faatuatua i le Alii o Iesu Keriso” (Mosaea 3:12).
Ua le na o le salamo e faaolaina ai le tagata. O le toto o Iesu Keriso e faaolaina ai i tatou. Ua le na o le suiga faamaoni ma le loto o amioga e faaolaina ai i tatou ae “o le alofa tunoa pe a uma ona faia mea uma tatou te mafaia” (2 Nifae 25:23). Peitai, o le salamo moni, o le tulaga lea e manaomia ina ia mafai ai ona oo mai le faamagaloga a le Atua i o tatou olaga. O le salamo moni e mafai ai ona “faamalamalamaina le ao mai le pogisa” (Spencer W. Kimball, O Le Vavega o le Faamagalo Atu [1969], 362).
O a Mea e Aofia ai i le Salamo Moni?
Tatou te manaomia se faatuatua malosi ia Keriso ina ia mafai ai ona salamo. O lo tatou faatuatua e tatau ona aofia ai se “manatu sa’o i le [Atua] lava ia, atoatoaga, ma uiga” (Lectures on Faith [1985], 38). Afai tatou te talitonu e silafia e le Atua mea uma, e alofa, ma e alofa mutimutivale, o le a mafai ona tatou tuu atu lo tatou faatuatuaga ia te Ia mo lo tatou faaolataga e aunoa ma le fefo’ifo’ia’i. O le faatuatua ia Keriso o le a suia ai o tatou mafaufauga, talitonuga, ma amioga ia e le tusa ai ma le finagalo o le Atua.
O le salamo moni e toe aumaia ai i tatou e faia le mea sa’o. Ina ia salamo moni, e tatau ona tatou iloa a tatou agasala ma ia lagona le faanoanoa, po o le tiga faaleatua, ma ta’uta’u atu na agasala i le Atua. Afai e matuia a tatou agasala, e tatau ona ta’uta’u atu i lo tatou taitai perisitua ua faatagaina. E tatau ona tatou ole atu i le Atua mo se faamagaloga ma faia mea uma tatou te mafaia ina ia faasa’o ai soo se faaletonu ua mafua ona o a tatou faatinoga. O le salamo o lona uiga o se suia lea o le mafaufau ma le loto—tatou te tuu le faia o mea e sese, ma amata ona tatou faia mea e sa’o. E aumaia ai ia i tatou se uiga faaalia fou i le Atua, o le tagata lava ia, ma le olaga lautele.
O a Fua o le Faamagaloga?
O le salamo moni e faamanuia ai o tatou olaga i aafiaga o le Togiola: tatou te lagonaina le faamagaloga a le Atua ma Lona filemu, ae aveese lo tatou tausalaina ma le faanoanoa; o le a matua tele atu lo tatou olioli i le ta’a’iga a le Agaga; ma tatou saunia lelei ai e ola ma le Tama Faalelagi.
Sa aoao mai e Peresitene Spencer W. Kimball: “O le ute o le vavega o le faamagaloga na te aumaia le filemu i le agaga atuatuvale, le maua se toafilemu, le fiafia, atonu o se agaga ua nutimomoia… . O le a soloieseina e le Atua … loimata o le tiga, ma le faanoanoa, … atoa ai ma le fefe, ma le tausalaina” (O Le Vavega o le Faamagalo Atu, 363, 368).
Na folafola mai e Iesu, “Ou te tuuina atu ia te outou le manuia, o lo’u manuia ou te avatu ai ia te outou… . Aua le atuatuvale o outou loto, aua foi tou te matatau” (Ioane 14:27).
Na tautino mai e le perofeta o Alema, o le na toefaatuina mai le agasala i le fiafia e ala i le faamagaloga a le Atua, “O le amioleaga e le o le fiafia lea” (Alema 41:10). Sa ia molimauina le tiga oona matuitui o le agasala, peitai sa ia tautala foi ma le fiafia e uiga i le fiafia e o mai faatasi ma le salamo moni ma le faamagaloga: “Ioe, ou te fai atu ia te oe, … e le mafai ona silisili ma malie se tasi mea e tusa ma lo’u olioli” (Alema 36:21). Na faaiu le tala a Alema i se fautuaga mamana ma le poto mo i latou uma o e saili atu i le faamagaloga: “O lenei foi, … ou te loto ina ia e le toe tuu atu i nei mea e faaatuatuvale ia te oe, a ia na o au agasala e te atu ai i lena atuatuvale e mafai ona faamaulaloina ai oe e oo i le salamo” (Alema 42:29).
E Mafai Faapefea Ona Tatou Iloa Ua Faamagaloina i Tatou e le Atua?
Na saunoa mai Peresitene Harold B. Lee, “A uma ona e faia mea uma i lou malosi e faatoilalo ai au mea sese, ma ua tonu i lou loto o le a e le toe faia lava, ona … [mafai lea ona oo mai ia te oe] le filemu o lou mafaufau, lea o le a e iloa ai ua faamagaloina au agasala” (i le “Law of Chastity Vital, Girls Told,” Church News, Sept. 2, 1972, 7).
O le taimi lava tatou te salamo moni ai, o le a aveese e Keriso le avega o le tausalaga ona o a tatou agasala. E mafai ona tatou iloa mo i tatou lava ua faamagaloina i tatou ma ua faamamaina. O le a faamaonia mai ia i tatou e le Agaga Paia lena mea; O Ia o le Faapaiaina. E leai se isi molimau o le faamagaloga e mafai ona sili atu.
Na fetalai mai le Alii, “O le salamo ma faia poloaiga a le Alii o le a faamagaloina” (MFF 1:32; ua faaopoopo le faamamafa). Ma sa Ia fetalai mai, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28), “Ia faamaoni ma filiga … ma o le a ou fusia oe i lo’u alofa” (MFF 6:20).
Sa Ia tautino mai foi, “Faauta, o le ua salamo i ana agasala, e faamagaloina o ia, ma o a’u le Alii, ou te le toe manatua lava” (MFF 58:42).
O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O le a avea lena ma vaega o le faagasologa o le faamalologa ma le faapaiaga o loo manaomia. Na molimau mai Alema ina ua uma ona ia alaga atu mo le alofa tunoa o Iesu, sa mafai lava ona ia manatuaina ana agasala, peitai o le manatuaina o ana agasala sa le toe faaatuatuvale ma pagatia ai o ia, aua sa ia iloa ua faamagaloina o ia (tagai Alema 36:17–19).
O lo tatou tiutetauave le aloese mai soo se mea e toe aumaia ai le manatua o agasala ua leva. A faaauau pea lo tatou maua o se “loto momomo ma le agaga salamo” (3 Nifae 12:19), e mafai ona tatou talitonuina o le a le “toe manatuaina lava [a tatou agasala] e le Atua.”
E Fesoasoani Faapefea lo Tatou Faamagalo Atu Tatou Te Maua Ai le Faamagaloga a le Atua?
Na aoao mai e Iesu upumoni faavavau ina ua Ia aoao i tatou ina ia tatalo: “Ia e faamagalo mai ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou… . Aua afai tou te faamagaloina atu tagata i a latou agasala, e faamagaloina foi outou e lo outou Tama o i le lagi; ae afai tou te le faamagaloina atu … e le faamagaloina foi e lo outou Tama a outou agasala” (3 Nifae 13:11, 14–15).
O lea, o le faamagalo atu o se tulaga muamua lea e tatau ai ina ia maua ai le faamagaloga.
Mo lo tatou lava lelei, tatou te manaomia ai le lototele mama e faamagalo atu ai ma ole atu mo le faamagaloga. E leai lava se taimi e sili atu ai ona tamalii le agaga ma sili atu ona lototoa nai lo le taimi tatou te faamagalo atu ai ma faagalo. E aofia ai le faamagaloina o i tatou lava.
Ua tofu i tatou ma se matafaioi ona o le afioga a le Atua, e aapa atu ai ma le loto faamagalo ma le alofa mutimutivale e faamagalo atu e le tasi le isi. O loo matua manaomia tele lenei uiga faaKeriso i o tatou aiga, o a tatou ulugalii, o a tatou uarota ma siteki, o o tatou nuu, ma o tatou atunuu.
O le a tatou maua le olioli o le faamagaloga i o tatou olaga, pe a tatou naunau e tuuina atu atoatoa lena olioli i isi. E le lava le na o le tautala ae le faia. E manaomia le faamama o o tatou loto ma mafaufau mai lagona ma mafaufauga o le feitaga’i ae faaulufale mai i totonu le malamalama ma le alofa o Keriso. O le taunuuga, o le a faatumulia e le Agaga o le Alii o tatou agaga i le olioli ma maua le filemu faalelagi o o tatou loto fuatiaifo (tagai Mosaea 4:2–3).
O’u uso e ma tuafafine pele, ma a’u uo talavou e, afai e pasia e le kapeteni o se vaalele tele le vaega tonu e toe foi saogalemu ai, ma ua malolosi foi matagi o loo i luma atu po o le maualalo foi o le vaega ua lele ai, e mafai ona faamalosia o ia e afe i se malaevaalele nai lo lona taunuuga na fuafuaina. E le faapena la tatou malaga e toe foi atu ai i lo tatou aiga faalelagi. Po o fea lava o e i ai i luga o lenei malaga o le olaga, po o a lava faigata tou te feagai, e i ai pea lava se tulaga e toe foi saogalemu ai; e i ai pea lava le faamoemoe. O oe o le kapeteni o lou olaga, ma ua faia e le Atua se fuafuaga e toe aumai saogalemu ai oe ia te Ia, i lou taunuuga faalelagi.
O le meaalofa o le Togiola a Iesu Keriso, tatou te maua ai i taimi uma ma nofoaga uma faamanuiaga o le salamo ma le faamagaloga. Ona o lenei meaalofa, ua maua ai e i tatou uma le avanoa e toe foi saogalemu atu ai mai le ala matautia o le agasala.
Ou te faafetai atu i lo tatou Tama Faalelagi mo lena mea, ma ou te molimau atu ai foi faatasi ma lo’u loto ma le agaga atoa, i le suafa o Iesu Keriso, amene.