Julie B. Beck
Peresitene Aoao a le Aualofa

I lona papatisoga ma i totonu o le malumalu, na saunoa ai Julie Bangerter Beck e faapea, o se vaega o le osia o ana feagaiga, na ia “folafola atu ai i le Alii e mafai ona Ia faaaogaina au i Lona malo.” O fea ma e faapefea foi ona Ia faaaogaina o ia, sa le taua ia te ia. A o avea ma fesoasoani muamua i le au peresitene aoao a Tamaitai Talavou, na ia saunoa ai, i totonu o le Ekalesia “e oo i tagata uma le suia o tofiga. E le afaina po o fea e te auauna atu ai. O le galuega a le Alii, ma o loo tatou galulue ma fanau a lo tatou Tama Faalelagi.”

Na soifua mai ia William Grant Bangerter, lea ua avea nei o se tagata faamalolo faamamaluina o le Korama Muamua a le Au Fitugafulu, ma Geraldine Hamblin Bangerter i le aso 29 o Setema, 1954, na auai o ia i le Kolisi o Dixie ma le Iunivesite o Polika Iaga, ma faauu mai ai ma se tikeri i le saienisi faaleaiga. Na faaipoipo atu o ia i a Ramon P. Beck i le aso 28 o Tesema, 1973, i le Malumalu o Sate Leki. E toatolu o laua alo, ma a latou fanau e toavalu.

Na auauna atu Sister Beck o se peresitene o Tamaitai Talavou ma le Peraimeri i le uarota, ma se fesoasoani i le au peresitene o le Aualofa a le siteki. A o le’i valaauina o ia e auauna atu i le tulaga aoao a le Ekalesia.

Ina ia pulea lona taimi, na te vaevaeina ai mea e ave i ai le faamuamua i ni vaega se tolu—“[o mea] e tatau ona fai,” “e ao ona fai,” ma le “e lelei ona fai.” O tatalo patino, suesueina o tusitusiga paia, auai i le malumalu, ma le aiga, o loo i lana lisi “e tatau ona fai.” “Ou te le iloaina se tamaitai e le i ai ni [ana] mea se tele e fai, nai lo mea e mafai ona ia faia,” na ia fai mai ai, ae o le faatulagaina o mea e faamuamua “e tuuitiitia ai le tausalaina. Ou te te’i i le tele o mea ‘e lelei ona fai’e uma ona ou faia.”

Ua faamanuiaina o ia e le Alii i ona manatu i auala e avea ai ma se tinamatua e nofo taumamao, e aofia ai le faitau atu i le fanau a lana fanau i luga o le telefoni.

“Na i ai lava ia te au i taimi uma se fiafiaga tele mo le Aualofa. I tausaga o lou talavou ma faaipoipoina, ina ua tofia ou matua i se nofoaga e mamao, na avea uso o le Aualofa ma ‘ou tina.’ A o ou malaga solo i le lalolagi, na ou lagonaina se alofa moni ma faamemelo mo tamaitai o le Ekalesia.”