Pe E Te Iloa?
O’u uso e ma tuafafine talavou, ou te valaaulia outou ina “ia tofotofo i a’u upu.” Pe o le a outou faitau ea ma tatalo e uiga i le tala ia Iosefa Samita?
I se taimi ua mavae sa ou maua ai se talatalanoaga manaia lava ma se tamaitai talavou tulagaese e 16- tausaga-le-matua. Sa ou iloaina ai e na o ia le tagata o le Ekalesia i lana aoga maualuga. Sa ou fesili i ai, “O le a le luitau aupito faigata o loo lua feagai ona e na o oe le tagata o le Ekalesia?”
Sa mafaufau loloto o ia ma tuu mai ai se tali atamai: “O le talitonu e moni se mea ae o loo talitonu isi tagata uma e sese, ma le talitonu e sese se mea ae o loo talitonu tagata uma o loo lelei.”
Sa ou tuuina atu ia te ia se fesili lona lua: “Pe e te iloa o Iosefa Samita o se perofeta a le Atua?” O lana tali o le, “O lo’u manatu lena, ae ou te le o mautinoa.”
O lenei taeao ou te fia fesili atu ai i talavou uma o le Ekalesia, “Pe e te iloa?”
O le taimi muamua na ou iloa ai e i ai sa’u molimau ina ua faatoa 11 o’u tausaga ma sa ave a’u e o’u matua i le Lotoa o le Malumalu i le Aai o Sate Leki.
O le gaoioiga ou te fiafia lava i ai o le ao mai lea o mea uma e avefua. Sa ou matuai lelei lava i le aveina o mea e maua fua. Ou te fesili, “E avefua le mea lea?” A uma ona tuu mai se tali lelei ona aapa atu lea o lo’u lima e 11 tausaga le matua ma faapea atu, “Faafetai lava. E avefua foi le mea la le? Faafetai!” E i ai taimi e fai mai ai se tasi, “Leai, e faamalie atu, e ta’i limasene le tau o mea la.” E punou lo’u ulu ma le lotovaivai, ma faaalia le matuai le fiafia ma faapea atu, “Ae, sa ou manao lava e faitau le tamaitusi le la, ae e leai sa’u tupe. Faafetai lava!” O taimi uma lava e ave fua ai ma a’u le tamaitusi. O le mea moni, ou te lei faitauina lava. Sa na ona ou aoina lava.
Ae peitai, i le malaga faapitoa lenei, sa na o a’u lava i totonu o le matou taavale Sievi [Chevrolet] o le 1948, sa ou faatalitali mo o’u matua ma sa oo ina ua manino le le mālie. Ona o le matua le mautonu lava, sa ou tilotilo ifo ai i lalo i la’u faaputuga o mea na maua fua. Sa ou aumaia se tamaitusi e ta’ua o le Ua Faamatala e Iosefa Samita Lana Lava Tala, ma amata loa ona faitau.
Sa ou maofa, ma sa faatumulia lo’u loto i le olioli. Ina ua maea ona faitauina atoa, sa ou vaaia lo’u ata i le faata i autafa o le taavale, ma sa ou te’i, ona sa ou tagi. Ou te lei malamalama i lena taimi, ae ua ou malamalama nei. Sa ou lagonaina se molimau a le Agaga. E lei i ai o’u matua iina. E lei i ai iina lo’u tuafafine. E lei i ai iina lo’u faiaoga o le Peraimeri. Sa na o au lava ma le Agaga o le Agaga Paia.
O lea, e mafai ona tupu lenei mea ia te oe, ma atonu ua i ai foi se mea faapea ua tupu.
Afai e sailia se molimau, e outou na o e sa fananau mai i le Ekalesia atonu o loo outou vaavaai mo ni lagona faaleagaga maoae e ese mai i se mea sa e lagonaina muamua. Atonu ua outou faalogo i tagata liliu mai o molimau mai i lo latou liua ma e mafaufau ai pe o i ai se mea ua e misia. O se tasi o mafuaaga e matua maoae ai lava ia i latou ona e fou.
Sa outou maua ia lagona lava na e tasi i o outou olaga atoa i taimi o afiafi faaleaiga, o sauniga molimau a le autalavou, vasega seminare, faitauga o tusitusiga paia, ma le tele lava o isi taimi.
Ua aoaoina a tatou faifeautalai faamisiona e fesoasoani i tagata sailiili ina ia latou iloa le taimi latou te lagonaina ai le Agaga. E tele taimi ou te manatua ai le taofi i le ogatotonu o se talanoaga loloto, faaleagaga ma faapea atu, “Se’i o tatou malolo lava mo sina minute ae talanoa e uiga i mea ua outou lagonaina i le taimi nei. Ua outou lagonaina e pei o lea ua matou toe faamanatuina atu mea ua galo ia te outou. Ua outou lagonaina o lea matou te ta’uina atu mea moni. Ua outou lagonaina le filemu. Ua outou lagonaina le Agaga Paia.”
Ou te manatua le aoaoina o se fafine e matuai maoae le poto o lē e matua faigata lava ona ia taliaina se mea sei vagana ua taliina uma lava soo se ituaiga o fesili. Ae peitai, ina ua mavae se taimi umi sa i’u ina matou faalogo atu o fai mai o ia, “Ua le mafai ona ou toe faafitia lenei lagona.”
Sa auai o ia i le Ekalesia ma sa matua fiafia i ni nai tausaga na sosoo ai, ae sa faifaimalie lava ona ia toe faatagaina ona masalosaloga faaleatamai e toe foi mai ma sa i’u ai ina ia tuua le Ekalesia.
Na mavae tausaga e sefululima, ma sa asiasi mai o ia i lo matou aiga. Sa matou aveina o ia i le Lotoa o le Malumalu. A o matou amata savalia le ala faataamilomilo e agai i le faatagata o le Faaola, sa tu o ia ma fai mai ma loimata, “Ua toe oo mai foi lena lagona. O loo faananau atu pea lo’u loto i mea e le taliaina e lo’u mafaufau!”
E te lagonaina loa, e le mafai lava ona e toe faagaloina.
E oo mai molimau faaleagaga i le vaitau o le talavou ia i latou e i ai ni aafiaga faaleagaga. I le avea ai o ni matua, faiaoga, ma taitai, ua fai lava si o matou lelei i le faamautinoaina lea ua outou malamalama i tulafono ma poloaiga. E mafai ona faaleleia la matou fesoasoani atu ia te outou ia maua se molimau e uiga i mataupu faavae ma aoaoga faavae. Atonu e mafai ona faatele ona outou malolo ae fesoasoani atu ina ia outou iloa ona matauina le Agaga.
O le taimi lava tou te iloaina ai na lagona ma o latou uiga, o le a faateleina lo outou faatuatua i ai. E le pine ae outou iloa ua outou atiina ae se sane faaleagaga lona ono lea e le mafai ona sese ai.
I le 11 o tausaga, na ou iloa ai o Iosefa Samita o se perofeta a le Atua. Ou te lei faalogo i ni leo, vaai i ni agelu, po o soo se mea faapena. O le mea na ou lagonaina sa matua mautinoa lava. Sa ootia lo’u sane faaleagaga. Sa ou lagonaina le fiafia silisili o totogo a’e mai le vaega tutotonu o lo’u tagata, lea e puipuia mai taufaasese uma. O lenei sane faaleagaga seiloga ua galueaiina e le Agaga Paia ona faatoa gaoioi lea.
O le a se lagona o lenei molimau faaleagaga? E faigata ona faamatala e faapei foi o se manogi o se rosa po o se pese a se manulele po o se matagofie o se fanua ua totoina. Ae ui i lea, e te iloa pe a e lagonaina.
Ua tuuina mai e tusitusiga paia nisi o malamalamaaga e uiga i nei lagona:
“E moni, e moni, ou te fai atu ia te oe, ou te tuuina atu ia te oe se vaega o lo’u Agaga, o le a faamalamalamaina ai lou mafaufau, e faatumuina foi lou agaga i le olioli; ma o le a e iloa ai” (MFF 11:13–14).
O nisi taimi e pei le lagona o se mea e manatua. Sa tatou muai aoaoina le talalelei i lo tatou aiga faalelagi. Ua tatou o mai i lenei lalolagi ma se ufimata o le faagaloina. Ae e tumau lava i o tatou agaga na mea e manatuaina o loo natia. E mafai e le Agaga Paia ona susu’e le ufimata ma aumaia na mea mai le mea o loo natia ai. E tele taimi o la’u tali atu i se mea faapea o se mea moni fou faatoa maua o le “Oi, lea ua ou manatuaina!”
“O le Fesoasoani, o le Agaga Paia lea … (o le a) faamanatu mai foi ia te outou i mea uma” (Ioane 14:26).
O’u uso e ma tuafafine talavou, ou te valaaulia outou ina “ia tofotofo i a’u upu” (Alema 32:27). Pe o le a outou faitau ea ma tatalo e uiga i le tala ia Iosefa Samita?
O le mea ofoofogia e uiga i le iloaina e moni o le iloa ai foi lea o loo soifua le Atua le Tama ma Iesu Keriso ma o loo tutu i le ao o lenei Ekalesia i ona po nei. Sa ou mauaina lena malamalama ina ua 11 o’u tausaga, a o lenei ua ou tulai atu i o outou luma o se molimau faapitoa ua faauuina a Iesu Keriso ma molimau atu e moni. Ou te tautino atu foi e finagalo le Alii ina ia outou iloa e moni, ma o le a Ia “faaalia le tonu ia te outou, i le mana o le Agaga Paia” (Moronae 10:4). I le suafa o Iesu Keriso, amene.