Ua Faaiuina le Konafesi; Ua Maua mo se Aofia Tele Naua

Faatasi ai ma vaega o le Konafesi Aoao Lona 177 Faaletausaga sa faaliliuina tuusao mai i gagana e 90 ma faasalalauina ai i le satelite i le silia ma le 6,000 nofoaga o le Ekalesia i atunuu e 85, ua toatele atu tagata o le Ekalesia na mauaina sa’o faasalalauga o upu a o latou taitai i a latou lava gagana nai lo se isi taimi muamua.

I lana saunoaga i le aofia i le lalolagi atoa i sauniga taitasi sei vagana ai le taeao o le Aso Toonai, sa ta’u mai ai e Peresitene Gordon B. Hinckley ua 96 nei tausaga o lona soifua, “O loo lelei lava lo’u ola maloloina, e ui lava i tala feavea’i fai mai ua le o lelei,” ma sa vave ona saunoa i ana agamalie masani, “O loo faamautinoa lava e fomai atamamai ma tamaitai tausimai o loo ou faia le mea sa’o [mo lo’u ola maloloina]. Atonu e i ai nisi o outou e muamua ia te au.”

I le sauniga i le afiafi o le Aso Toonai, sa toe faapaiaina ai e Peresitene Hinckley le Tapeneko i Sate Leki i le Lotoa o le Malumalu, lea sa faia ai se sauniga o le konafesi mo le uluai taimi talu mai ona faaaoga le Maota Autu mo Konafesi ia Aperila 2000. Sa tapunia le Tapeneko mo le lua tausaga ina ia faia se faafouga ia mafai ai ona tatalia faatama’iga a mafuie ma toefuatai ai (tagai i le tala tusia o loo avatu ai).

Sa lagolagoina taitai fou i le Aso Toonai e aofia ai le Au Pulega Aoao e toalima, e o mai uma i atunuu i fafo atu o le Iunaite Setete, o le au peresitene aoao o le Aualofa, ma fesoasoani i le au peresitene aoao o Tamaitai Talavou (tagai i le itulau e 4 mo suiga i le au taitai o le Ekalesia ma le itulau e 24 mo faamatalaga o talaaga o taitai fou).

E miliona ma miliona tagata o le Ekalesia i le salafa o le lalolagi na auai i faasalalauga faasatelite i nofoaga o le Ekalesia faapea foi i o latou lava fale, o isi ala o faasalalauga faasatelite, ma le Initoneti.