Elder Octaviano Tenorio
O Le Au Fitugafulu

Ua silafia e Elder Octaviano Tenorio Domínguez o le mauaina o sauniga o le malumalu e suia ai olaga. Na suia ai lona olaga, ma na i ai i tulaga ua ia vaaia ai le suia o isi’. “Tu faalatalata i le malumalu,” na ia uunaia ai.

Na soifua o ia i le aso 31 o Oketopa, 1942, i ona matua o Octaviano Tenorio ma Flora Domínguez de Tenorio i Tilapan, Veracruz, Mekisiko, ma sa auai o ia i le Ekalesia ina ua malaga lo latou aiga i Rio Bravo i Mekisiko i matu.

Ina ua maua lona tusipasi i le faatausitusi ma pisinisi, sa la feiloai ma Rosa Elva Valenzuela González i le Aai o Mekisiko, lea o loo nonofo ai nei. Sa faamauina i laua i le aso 4 o Ianuari, 1974, i le Malumalu o Mesa Arizona Temple ma e toalima o laua alo.

I le popofou o lona soifua faigaluega, sa faafesootaia Elder Tenorio e uiga i se tulaga e avea ma pule i le Nofoaga Autu o Gafa a le Ekalesia i le Ofisa Autu i Mekisiko. Talu ai ona sa lelei tele lana galuega i le kamupani lomitusi, sa le mautinoa ai pe na te taliaina le galuega fou. Peitai, ona o ni mea musuia na tutupu, sa ia iloa ai o se galuega lea e tatau ona ia talia.

“Sa suia ai le ala o lo’u olaga,” o lana tala lea. Na taitai atu ai i se olaga e milo faatasi ma galuega o talafaasolopito o le aiga ma le malumalu.

Ina ua mavae tausaga e fitu i lena galuega, ma o le taimi foi lea sa avea ai o ia ma se peresitene o le siteki, sa valaauina ai o ia e avea ma uluai tusi faamautala i le Malumalu o le Aai o Mekisiko, ma se fai faamauga. Na tuua e ia le malumalu ina ia pulefaamalumalu i le Misiona a Mekisiko Tuxtla Gutierrez. Mulimuli ane, sa avea o ia ma pule i le vaega o Pepa Faamaumau, Pule o Faletusi ma Mea e Faaaoga, ma Matagaluega o le Tautua faaUelefea, ma o le taimi foi lea sa avea ai ma se sui risone ma Fitugafulu Eria.

Na toe avea mulimuli ane Elder Tenorio ma tusi faamautala o le Malumalu o le Aai o Mekisiko, ina ua litaea lona sui.

“O le malumalu o se vaega tele lea o lo’u olaga,” na ia saunoa ai. “Ou te talitonu o sauniga o le malumalu o le a tatou maua ai le fiafia moni.” E matua faafetai Elder Tenorio i le Alii ma ua ia manatu o se faamanuiaga tele le mafai ona auauna nei i le Korama Muamua a le Au Fitugafulu.