O Mea ua Ou Iloa

Peresitene Gordon B. Hinckley

Ou te fia tuuina atu ia te outou la’u molimau o upumoni faavae o lenei galuega.

O’u uso e ma tuafafine pele, ua ou fiafia lava i le avanoa ou te tautala atu ai ia te outou. Ou te faafetai atu ia te outou taitoatasi mo a outou tatalo. Ou te matua faafetai tele atu lava ia te outou. I le 49 o tausaga o avea au ma se Pulega Aoao, ua silia mamao ma le 200 taimi ua ou lauga atu ai i konafesi aoao. O lea ua ou i ai i le lona 97 lenei o o’u tausaga. O loo agi pea le matagi, ma ua ou lagona ua pei o le toe lau i luga o le laau.

O le mea moni o loo lelei lava lo’u ola maloloina, e ui lava i tala feavea’i uma fai mai ua le o lelei. O loo faamautinoa lava e fomai atamamai ma tamaitai tausimai o loo ou faia le mea sa’o (mo lo’u ola maloloina). Atonu e i ai nisi o outou e muamua ia te au. Peitai, i lo’u matua ua i ai ma lo’u mafaufau, ou te fia tuuina atu ia te outou la’u molimau o upumoni faavae o lenei galuega.

Ou te ta’utino atu ou te le iloaina mea uma, peitai e i ai nisi mea ua ou mautinoa. Ou te tautala atu i lenei taeao, e uiga i mea ua ou iloa,

Ina ua liua le kaisa o Kosetatino e avea ma Kerisiano, na amata ona ia iloa le fevaevaea’i o faifeau e faatatau i le natura o le Atua. I se taumafaiga e faatoilalo fevaevaea’iga, sa ia faapotopotoina ai le au faitofa lauiloa i mataupu tau lotu i na ona po i Nicaea i le tausaga e 325. Sa tuuina atu i tagata uma sa i ai le avanoa e faamatala mai ai ona manatu. Sa na ona atili ai ona vevela le finauga. Ina ua le mafai ona maua se faauigaga, sa faia loa se fetuutuunaiga. Na lauiloa o le Faavae Aloaia a Nicene, ma o elemene faavae ia e taulotoina e le toatele o le au faatuatua Kerisiano.

Ia te au lava ia, ou te le mafai ona ou malamalama ai. E fenumiai ia te au lea faavae.

E maeu le loloto o lo’u lotofaafetai ona o i tatou i lenei Ekalesia e le faalagolago i ni faaupuga a se tagata e faatatau i le natura o le Atua. O lo tatou iloa e aumai sa’o lava mai se mea na oo patino i ai Iosefa Samita, o lē ao tamaitiiti lava, sa talanoa ma le Atua le Tama Faavavau ma Lona Alo Pele, le Alii Toetu. Sa tootuli o ia i o La’ua luma; sa faalogo o ia i o La’ua siufofoga; ma sa ia tali atu i ai. O i la’ua o ni peresona mavaevae. E le o se mea e ofo ai lona ta’uina atu i lona tina, ua ia iloa e le moni lana lotu. Ma o lea, o se tasi o aoaoga faavae lautele o lenei Ekalesia, o lo tatou talitonuga i le Atua le Tama Faavavau, o Ia o le tagata, e moni ma e toatasi lava Ia. O Ia o le Pule sili o le atulaulau, ae o Ia foi o lo tatou Tama, ma o i tatou o Ana fanau.

Tatou te tatalo ia te Ia, ma o na tatalo o se talanoaga lea i le va o le Atua ma le tagata. Ou te mautinoa Na te faafofogaina a tatou tatalo ma tali mai i ai. E le mafai ona ou faafitia lena mea. Ua matua tele naua mea ua ou oo i ai ua tali mai ai tatalo.

Sa aoao e Alema lona atalii o Helamana, ma faapea atu: “Ia oulua filifili ma le Atua i au mea uma e te faia, na te faatonu foi ia te oe i mea lelei. Ioe, pe a e taoto i le po, ia taoto ona o le Atua, ina ia leoleo o ia ia te oe i lou moe. Pe a e ala i le taeao, ia tumu lou loto i le faafetai i le Atua. Afai foi e te faia ia mea, e faaeaina oe i le aso gataaga” (Alema 37:37).

O le mautinoa sili lona lua lea ou te talitonu e i ai lona faavae i le faaaliga a le Perofeta o Iosefa. O le talitonu o loo soifua Iesu. O Ia o le Keriso Soifua. O Ia o le Ieova o le Feagaiga Tuai ma le Mesia o le Feagaiga Fou. I lalo o le taitaiga a Lona Tama, o Ia o le Foafoa o le lalolagi. O loo amata lava le talalelei a Ioane i upu ofoofogia nei: “Sa i le amataga le Upu, sa i le Atua le Upu, o le Atua foi le Upu.

“O ia lava sa i le Atua i le amataga.

“Na ia faia mea uma lava; e leai foi se mea e tasi na faia e lei faia e ia” (Ioane 1:1–3).

Ia matau patino lena fuaiupu mulimuli, “Na ia faia mea uma lava; e leai foi se mea e tasi na faia e lei faia e ia.”

O Ia o le Foafoa sili. O Lona aao na tusia ai poloaiga i luga o le Mauga. O Ia lea na tuua Lona nofoalii i luga ae afio mai i lalo nei, soifua i tulaga aupito maualalo. I le taimi o Lana galuega puupuu, sa Ia faamaloloina e mamai, faapupula i e tauaso, faatutu mai e na oti, ma aoai le au tusiupu ma le au Faresaio. Sa na o Ia lava le tagata atoatoa na femaliuai i le lalolagi. O nei mea uma o se vaega o le fuafuaga a le Tama. I le Togalaau i Ketesemane, sa matua puapuagatia ai o Ia ma sa afutoto ai a o faatoga atu o Ia i Lona Tama. Peitai, o se vaega uma lena o Lana taulaga sili o le togiola. Sa aveina o ia e le motu o tagata, ma sa tu i luma o Pilato a o alalaga le motu o tagata ina ia fasiotia o Ia. Sa Ia amoina le satauro, o le meafaigaluega o Lona maliu. I luga o Kolokota, na Ia tuuina atu ai Lona soifua, ma alaga atu, “Lo’u Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).

Sa faataoto ma le faaeteete lona tino i le tuugamau o Iosefa le Arimataia. Peitai e tolu aso mulimuli ane, i le taeao o le uluai Eseta, sa avanoa le tuugamau. Sa talanoa Maria le Makatala ia te Ia, ma sa Ia fetalai atu foi ia te ia. Sa faaali o Ia i Ana Aposetolo. Sa latou savavali faatasi ma ni soo se toalua i le ala i Emau. Ma ua ta’ua mai foi ia te i tatou, sa iloa o Ia e le isi 500 o tagata (tagai 1 Korinito 15:6).

Na fetalai o Ia, “Ua ia te au foi isi mamoe e le o i lenei lotoa; e tatau ona ou taitaiina mai o i latou foi, e faalogo foi i latou i lo’u leo; ona tasi ai lea o le lafu mamoe, ma le leoleo mamoe e toatasi” (Ioane 10:16). O lea, na Ia afio atu ai ia i latou na potopoto i le laueleele i Nuumau i le Lalolagi i Sisifo. O iina, na Ia aoao atu ai tagata e pei ona sa Ia aoao o i latou i le Lalolagi Tuai. O loo tusi faamauina auiliili nei mea uma i le Tusi a Mamona, lea o lo tu o se molimau lona lua i le paia o lo tatou Alii.

E toe fai atu foi, na faaali o Ia ma Lona Tama i le taulealea o Iosefa, ma sa faailoa atu e le Tama le Atalii, ma faapea atu: “O Lo’u Atalii Pele lenei. Faalogo ia te Ia!” (Talafaasolopito—Iosefa Samita 2:17).

O lenei, o le isi mea ua ou mautinoa, ma o lena mea ou te molimau ai, o le Togiola a le Alii o Iesu Keriso. A aunoa ma lena, e leai se uiga o le olaga. O le maa’au’au o lo tatou olaga. E faamautinoa ai sa tatou ola muamua ae tatou te lei fananau mai i le olaga faitino. O le olaga faitino o se laasaga i se olaga e sili atu ona mamalu i le lumanai. Ua faamafanafanaina le faanoanoa i le oti, i le folafolaga o le Toetu. E leai se Kerisimasi pe a leai se Eseta.

O le a ou tautala nei i faamautinoaga sili ua aumaia e le Toefuataiga o le talalelei a Iesu Keriso. Ua i ai le toefuataiga o le perisitua, po o le pule na tuuina mai i le tagata e tautala ai i le suafa o le Atua. O lenei perisitua e aofia ai faatulagaga e lua: o le maualalo, lea ua faaigoa o le faa-Arona, sa toefuatai mai e ala mai i aao o Ioane le Papatiso. O le faatulagaga maualuga o le perisitua, o le faa-Mekisateko, na toefuatai mai e ala i aao o Peteru, Iakopo, ma Ioane.

I le toefuataiina mai o le Perisitua Arona, na faaee ai e Ioane le Papatiso toetu ona lima i luga o ulu o Iosefa Samita ma Oliva Kaotui ma faapea atu, “I luga o oulua o’u uso a auauna e, i le suafa o le Mesia ou te tuuina atu ai le Perisitua o Arona, o loo i ai ki o asiasiga ma galuega a agelu, ma le Tala Lelei o le Salamo, ma le papatisoga i le faatofuina mo le faamagaloina o agasala” (MFF 13:1).

Sa saunoa Peresitene Uilifoti i le taimi ua pulapula lagoto lona soifua i alii talavou o le Ekalesia ma faapea atu: “Ou te manao e faamautu atu i o outou luga le mea moni, e leai se eseesega pe o se alii o se Ositaulaga po o se Aposetolo, pe afai na te faalauteleina lona valaauga. E umia e se Ositaulaga ki o galuega a agelu. E leai se taimi i lo’u olaga a o avea o se Aposetolo, o se Fitugafulu, po o se Toeaina, na tele atu ai ona ou maua le puipuiga a le Alii nai lo le taimi na ou umia ai le tofi o se Ositaulaga” (in Millennial Star, Oct. 5, 1891, 629).

O le Perisitua Mekisateko po o le Perisitua Maualuga, e tuuina atu ai i alii le pule e faaee o latou lima i luga o isi ma tuuina atu faamanuiaga. Latou te faamanuiaina e mama’i. E pei ona tautino mai e Iakopo i le Feagaiga Fou: “Ua ma’i ea so outou? Ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suauu i le suafa o le Alii” (Iakopo 5:14).

Ma le mea mulimuli, ou te ta’ua faamanuiaga o le maota o le Alii, lea ua oo mai ona o le Toefuataiga mai o le talalelei anamua.

O nei malumalu, ia ua tatou matua faateleina lava i tausaga na sei mavae atu, ua aumaia ai faamanuiaga e leai lava se isi mea e maua mai ai. O mea uma e faia i nei maota paia, e i ai le faia i le natura faavavau o le tagata. O iina, e faamau ai faatasi tane ma ava ma fanau o ni aiga mo le faavavau atoa. O le faaipoipoga e le “seia faate-te’aina e le oti.” E faavavau, pe afai e ola agavaa itu e lua mo le faamanuiaga. O le mea e sili ona ofoofogia o mea uma, o le pule e faia ai galuega mo isi i le maota o le Alii. O iina, e faataunuuina ai sauniga mo e ua maliliu, o e lei maua le avanoa e mauaina ai mo i latou lava a o soifua.

Sa faamatalaina mai talu ai nei ia te au e uiga i se tamaitai i Idaho Falls, ua oti lana tane. Ua silia ma le 15 tausaga o fai o ia ma sui e tuuina atu faaeega paia mo tagata e 20,000 i le Malumalu o Idaho Falls. Sa ia faamaeaina le lona 20,000 o faaeega paia i se Aso Faraile ma sa toe foi atu i le Aso Toonai e fai le isi toalima. Sa maliu o ia i le vaiaso na sosoo ai.

Sei manatu lava i le mea na faia e lenei tamaitai? Sa ia faataunuuina faaeega paia mo isi e pei lava o le toatele o tagata o loo potopoto i lenei taeao i le Maota Autu mo Konafesi. Manatu i le faataliga mai o ia i le isi itu.

O lenei, o’u uso e ma tuafafine, o la’u molimau lenei, lea ua ou tuuina atu ma le paia i o outou luma.

Ia faamanuia le Atua ia te outou, outou uma lava, outou le Au Paia faamaoni o Aso e Gata Ai. Ia i ai le filemu ma le alofa i o outou aiga faatasi ai ma le faatuatua ma tatalo e taialaina ai outou i mea uma tou te fai, o la’u tatalo ma le lotomaulalo lea i le suafa paia o Iesu Keriso, amene.