2007
Salamo ma le Liuaina
Me 2007

Salamo ma le Liuaina

Elder Russell M. Nelson

O Le Korama a Aposetolo e Toasefululua

O se agaga ua salamo o se agaga lea ua liua ma o se agaga ua liua o se agaga lea ua salamo.

Ata

I le tausaga ua tuanai a o ma tietie atu ma Elder David S. Baxter i se konafesi a le siteki, sa ma afe ai i se faleaiga. Mulimuli ane ina ua ma toe foi i le taavale, na alu atu se tamaitai ma tauvalaau atu ia i ma’ua. Sa ma fememeai ona o ona foliga vaaia. O ana teuga (po o le leai foi) e mafai ona faaupuina faaaloalo o le “soona fai.” Sa fesili mai pe o ma’ua o ni faifeau o le Ekalesia. Sa ma tali atu ioe. Sa toetoe a le taofiofia, lona faamatalaina o le tala i lona olaga matautia, ua matuai lofituina i le agasala. O lenei, i le na o le 28 o tausaga, ua matuai faanoanoa lava o ia. Sa ia lagonaina lona le aoga ma le leai o se faamoemoega e ola ai. A o ia tautala, sa amata ona ma matauina le manaia o lona agaga. Sa ia aioi mai ma loimata pe i ai lava se isi faamoemoe mo ia, se isi auala e sola ese ai mai lona pagatia o loo i ai.

“Ioe,” sa ma tali atu ai, “o loo i ai le faamoemoe. O le faamoemoe e fesootai atu i le salamo. E mafai ona e suia. E mafai ona e ‘sau ia Keriso ma ia faaatoatoaina ia te ia.’”1 Sa ma uunaiina o ia ina ia aua ne’i tolopoina.2 Sa ia masusu ma le faamaulalo ma faafetai faamaoni mai ia i ma’ua.

A o faaauau le ma malaga ma Elder Baxter, sa ma mafaufau loloto i lena mea na ma oo i ai. Sa ma toe manatuaina le fautuaga sa tuuina atu e Arona i se agaga ua leai se faamoemoe, ma faapea atu, “afai e te salamo i au agasala, ma faasifo atu i luma o le Atua, ma valaau atu i lona suafa i le faatuatua, … ona e maua lea o le mea ua e manao i ai.”3

O lenei, i lenei sauniga faaiu o le konafesi aoao, ou te talanoa atu ai i le salamo. Ou te faia aua ua poloaiina e le Alii Ana auauna ina ia talai atu le salamo i nuu uma.4 Ua toefuatai mai e le Matai Lana talalelei ina ia aumaia ai le olioli i Lana fanau, ma o le salamo o se vaega taua lea o lena talalelei.5

O le aoaoga faavae o le salamo ua loa ona i ai e pei o le talalelei lava ia. O aoaoga faatusipaia mai tusi o Kenese6 e oo i le Faaaliga7 o loo aoao ai le salamo. O lesona mai ia Iesu Keriso i le taimi o Lana galuega faaletino e aofia ai lapataiga nei: “Ua latalata mai le malo o le Atua: ina salamo ia, ma talitonu i le talalelei,”8 ma “Afai tou te le salamo, e faapena lava ona fano outou uma.”9

O faamatalaga faamaonia i le salamo o loo sili atu ona tuuina soo mai i le Tusi a Mamona.10 I tagata o Amerika anamua, na tuuina atu ai le poloaiga lenei a le Alii: “Ou te toe fai atu foi ia te outou, e tatau ona outou salamo, ma papatisoina i lo’u igoa, ma liua ia pei o se tamaitiiti, a leai, e le mafai lava ona fai mo outou tofi le malo o le Atua.”11

Faatasi ma le toefuataiga o le talalelei, ua toe faamamafa mai ai e le Faaola lenei aoaoga faavae. O le upu salamo i soo se faaaogaga e faa-47 ona vaaia i le vaega e 138 o le Mataupu Faavae ma Feagaiga!12

Salamo mai Agasala

O le a le uiga o le salamo? Tatou te amata i se faauigaga a le lolomifefiloi e faapea o le salamo “o le liliuese mai le agasala … lagonaina le faanoanoa [ma le] tiga.”13 O le salamo mai le agasala e le faigofie. Ae o le taui e taua nai lo le tau. O le salamo e auauai ona laasaga e faia. O le tatalo faamaualalo o le a faaosofia ai ia laasaga taitasi taua uma. I le avea ai ma tulaga manaomia mo le faamagaloga, e tatau ona muamua iloa e le tagata ua agasala, faanoanoa, ona tautau atu lea.14 “Tou te iloa faapea se ua salamo i ana agasala—faauta, na te tautau atu ma lafoaia.”15 O le tautau atu e tatau ona faia i le tagata na sese i ai. O le tautau atu e tatau ona faamaoni ae le na o se tautino atu o le tausalaga ina ua mavae ona maua se faamaoniga. Afai e toatele ni tagata na afaina, e tatau ona tautau atu i tagata uma na aafia. O gaoioiga e ono aafia ai le agavaa o se tasi i le Ekalesia po o le aia i ona avanoa, e tatau ona vave ona tautau atu i le epikopo, o le ua valaauina e le Alii o se faamasino ia Isaraelu.16

O le isi laasaga o le toe totogi—ia toe faaleleia mea ua faaleagaina—pe afai e mafai. A mavae lena o loo i ai ia laasaga o le matuai tautino atu ina ia faia le lelei ma aloese mai le toe faia o le agasala—ia salamo “ma le loto faamaoni.”17 Talu ai ona o le tau na totogiina e le Togiola a Iesu Keriso, ua tuuina atu ai le faamagaloga atoatoa i le tagata agasala, o le salamo ma tumau saoloto ai mai le agasala.18 Fai mai Isaia i le agaga ua salamo, “e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe.”19

O le matuai faatauaina lava e le Alii o le salamo ua matuai manino lava a o tatou faitau mai le vaega e 19 o le Mataupu Faavae ma Feagaiga: “Ou te poloai atu ia te oe ia salamo—salamo, ne’i ou taia oe i la’u upu, i le tiga tele o lo’u loto, ma lo’u ita, ma e faigata tele ou puapuaga—o le tiga e te le’i iloa, ma o le uiga ese o le tiga e te le’i iloa, ioe, o le faigata ona onosai e te le’i iloa.

“Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“A e peitai, afai latou te le salamo, e ao ina latou tiga e pei o a’u.”20

E ui o loo tausisi mai le Alii i lo tatou salamo, o le toatele o tagata latou te le o lagonaina se manaoga malosi faapena.21 Latou te manatu o i latou o nisi o e o loo taumafai ia lelei. 22 E leai ni o latou faamoemoega leaga. Ae peitai o loo matuai manino lelei le Alii i Lana savali e faapea e moomia e tagata uma ona salamo—e le gata mai agasala o le faia, ae faapea foi i agasala o le le faia. E faapena le tulaga i Lana lapatai atu i matua: “Afai e maua fanau e matua i Siona … e le aoao atu ia te i latou ia malamalama i le mataupu o le salamo, faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia … o le a pau lea agasala i matua.”23

Uiga Lautele Atu o le Upu Salamo

O le aoaoga faavae o le salamo e lautele atu nai lo le faauigaga a se lolomifefiloi. Ina ua fetalai Iesu “salamo,” sa tusi faamaumau e Ona soo lena poloaiga i le gagana Eleni faatasi ai ma le veape metanoeo.24 O lenei upu mamana e tulaga ese lona taua. O le sope i luma o le meta o lona uiga o le “suia.”25 O le sope i tua e faatatau lea i ni upu Eleni taua se fa: nous, o lona uiga “o le mafaufau”26; gnosis, o lona uiga o le “iloa”27; pneuma, o lona uiga o le “agaga”28; ma le pnoe, o lona uiga o le “manava.”29

O lea la, ina ua fetalai Iesu “salamo,” ua Ia poloaiina i tatou ina ia sui—sui o tatou mafaufau, iloa, ma le agaga, e oo i la tatou manava. Na faamatalaina e se perofeta o se suiga faapea i le manava a se tasi, o le manava lea ma le loto faafetai ia te Ia o le na tuuina atu le manava. Fai mai le Tupu o Peniamina, “Afai tou te auauna atu i Le na faia outou … ma o loo faasaoina foi outou i lea aso ma lea aso, ua tuuina mai foi ia te outou le manava … i lea itula ma lea itula—ou te fai atu, afai tou te auauna atu ia te ia ma o outou agaga atoa, e fai pea outou ma auauna le aoga.”30

Ioe, ua poloai mai le Alii ia i tatou ina ia salamo, ia suia o tatou ala, ia o mai ia te Ia, ma ia avea atili e faapei o Ia.31 O lenei mea e matuai moomia ai se suiga atoa. Na faapea ona aoaoina e Alema lona atalii: “Ia e aoao i le poto ina o e taulealea;” na ia fai atu ai, “A o e taulealea, ia e aoao e tausi i poloaiga a le Atua… . Ia liliu atu ou manatu i le Atua, ioe, ia e tuuina atu e faavavau le alofa o lou loto i le Atua.”32

Ina ia salamo atoatoa o le liuaina atoatoa lea i le Alii o Iesu Keriso ma Lana galuega paia. Na aoaoina e Alema lena manatu ina ua ia fesiligia ia fesili nei: “Ou te fai atu ia te outou, o’u uso e o le ekalesia, po ua fanauina ea outou faaleagaga i la le Atua? Po ua outou maua ea lona foliga i o outou mata? Po ua outou lagona ea lenei liliu tele i o outou loto?”33 O lena suiga e oo mai pe a tatou “toe fanauina,” liuaina ma taulai atu i le tatou faigamalaga i le malo o le Atua.34

Fua o le Salamo

O fua o le salamo e suamalie. O tagata liliu mai ua salamo latou te iloaina o upumoni o le talalelei toefuataiina ua pulea ai o latou mafaufauga ma mea e fai, suia ai o latou mausa, ma aoaia ai o latou tagata. Ua sili atu ona latou mafaia ona tumau ma mafaia ona teena le amioletonu uma.35 Ae o le mea sili, ua matuai aveeseina atoatoa manaoga faaletino e le puleaina,36 o le mausa o ponokalafi ma fualaau faasaina,37 o tuinanauga e le mataofiofia,38 o le manao i mea o le lalolagi,39 ma le fiasili amioletonu40 ona o le liuaina i le Alii ma se naunautaiga ina ia auauna atu ia te Ia ma mulimuli i Lana faataitaiga.41 Ua teuteuina o latou manatu e le mama, ma ua malosi le faatuatua fai ifo.42 Ua vaaia le sefuluai o se faamanuiaga e olioli ma puipuia ai, e le o se tiute po o se osigataulaga.43 Ua sili atu ona faatosina le upumoni, ma ua sili atu ona naunau i mea lelei.44

O le salamo o le auala lea a le Alii mo le alualu i luma faaleagaga. Na faamatalaina e le Tupu o Peniamina e faapea “o le tagata o le lalolagi o le ita lea i le Atua, ma ua faapea talu le pau o Atamu, e faapea foi e oo i le faavavau, faavavau lava, a e afai e gauai o ia i galuega alofa a le Agaga Paia, ma ua tuu ese le tagata o le lalolagi ma ua avea o ia ma tagata amiotonu ona o le togiola o Keriso le Alii, ma ua avea foi o ia e pei o le tama itiiti ua fia usiusitai, ma agamalu, ma faamaulalo, ma onosai, ma ua tumu i le alofa, ma le fia gauai i mea uma ua silafia e le Atua e tatau ona faatiga ai o ia, e pei lava ona gauai le tamaitiiti i lona tama.”45 Uso e ma tuafafine, o lona uiga o lena mea o le liuaina! O le salamo o le liuaina! O se agaga ua salamo o se agaga lea ua liua ma o se agaga ua liua o se agaga lea ua salamo.

Salamo mo i Latou o e ua Maliliu

O tagata ola uma lava e mafai ona salamo. Ae faapefea i latou o e ua maliliu? Latou te maua foi avanoa e salamo ai. Ua folafola mai e tusitusiga paia e faapea “o toeaina faamaoni o lenei augatupulaga, pe a mavae atu ma lenei olaga faaletino, e faaauau a latou galuega i le talaiina o le talalelei o le salamo … ia i latou o e … noatia i le agasala i le lalolagi tele o agaga o e ua oti.

“O e ua oti e salamo o le a togiolaina, e ala i le usiusitai i sauniga o le maota o le Atua,

“Ma pe a mavae foi ona totogi e i latou le faasalaga mo a latou solitulafono, ma faamamaina, [latou] te maua se taui e tusa ma a latou galuega.”46

Na toe faaalia mai e le Perofeta o Iosefa Samita e faapea “o le a taia le lalolagi i le fetuu sei iloga e i ai se ituaiga o sootaga i le va o tama ma fanau… . E le mafai ona faaatoatoaina i tatou e aunoa ma [o tatou tagata ua oti]; po o latou foi e aunoa ma i tatou e le mafai lava ona faaatoatoaina… . [O lenei] augatupulaga ua amata nei ona oo mai, ina ia faataunuuina ma faaalia se fesootaiga ma faatasiga atoa, mae’a ma maopoopo o augatupulaga ma ki, ma mana, ma mamalu.”47

“E manao Iesu ia ou fai ma sulu?” 48 Ioe! Ma oe foi! E finagalo o Ia ina ia avea i tatou ma tagata e faamauina o tatou aiga e faavavau—ia faia ni sootaga faaselesitila—ina ia taofiofia le fetuu49 lea e oo mai i le faataapeapeina o le aiga. Na foafoaina le lalolagi ma fausia malumalu ina ia mafai ai ona faatasia aiga e faavavau.50 O le toatele, a leai o le toatele o i tatou, e mafai ona salamo ma liuaina ina ia faia ni galuega se tele o le malumalu ma talafaasolopito o le aiga mo o tatou tuaa. O lea la, e moomia ai lo tatou salamo ma e taua mo lo latou salamo.

Mo o tatou aiga uma ua maliliu, i le tamaitai ua 28 tausaga le matua o loo lopala i le agasala, faapea i tatou uma taitoatasi, ou te folafola atu faapea e mafai ona maua faamanuiaga matagofie o le salamo. E oo mai e ala i le liuaina atoatoa i le Alii ma Lana galuega paia.

Ou te iloa o loo soifua le Atua. O Iesu o le Keriso. O Lana Ekalesia lenei. O Lana perofeta i aso nei o Peresitene Gordon B. Hinckley, ou te molimau atu ai, i le suafa o Iesu Keriso, amene.

Faamatalaga

  1. Moronae 10:32.

  2. Tagai Alema 13:27; 34:33. Na faamatalaina e Peresitene Spencer W. Kimball le tolopo o “se le naunau lea e taliaina le tiutetauave faaletagata i le taimi nei” (Aoaoga a Peresitene o le Ekalesia: Spencer W. Kimball [2006], 4).

  3. Alema 22:16. Tatou te manatuaina foi ia tagata agasala o e sa i lalo o le tausiga a lo latou taitai popole, o Mamona, o le na tusia: “Ua leai so’u faamoemoe, aua ua ou iloa faamasinoga a le Atua e oo mai ia te i latou, aua ua latou le salamo i a latou amioletonu, a ua tau mo latou ola ae le valaau atu i Le na faia i latou” (Mamona 5:2).

  4. Aemaise lava i aso nei e gata ai; tagai MFF 18:11–12, 14; 19:21; 34:5–6; 43:20; 133:16–17.

  5. “O uluai mataupu faavae ma sauniga o le Talalelei o le: muamua, Faatuatua i le Alii o Iesu Keriso; lona lua, Salamo; lona tolu, Papatisoga i le faatofuina mo le faamagaloina o agasala; lona fa, o le Faaee atu o lima e maua ai le mea foaifua o le Agaga Paia” (Mataupu Faavae o le Faatuatua 1:4). Tagai foi MFF 39:6; 84:27; 138:19.

  6. Tagai Faaliliuga a Iosefa Samita o le Kenese 4:8.

  7. Tagai Faaaliga 2:16.

  8. Mareko 1:15; tagai foi Mataio 4:17.

  9. Luka 13:3.

  10. O le upu salamo i soo se ituaiga (i le aoao atu o le mataupu o le salamo) i soo se foliga (ia salamo, salamo, ua salamo,salamoina, ma isi) e faa-72 ona vaaia i le Lomiga o le King James o le Tusi Paia ae faa-68 i le Faaliliuga a Iosefa Samita o le Tusi Paia. I le Tusi a Mamona, o le upu salamo i soo se ituaiga e faa-360 ona vaaia ai.

  11. 3 Nifae 11:38. O le isi faataitaiga o le “Ua ou tuuina atu ia te outou le tulafono ma poloaiga a lo’u Tama, ina ia outou talitonu ia te au, ma ia outou salamo i a outou agasala, ma o mai ia te au ma le loto momomo ma le agaga salamo” (3 Nifae 12:19).

  12. Tagai i le MFF 1; 3; 5–6; 10–11; 13–16; 18–20; 29; 33–36; 39; 42–45; 49–50; 53–56; 58; 63–64; 66; 68; 75; 84; 90; 93; 98; 104; 107; 109; 117; 124; 133; 136; 138.

  13. Lolomifefiloi a Webster’s Ninth New Collegiate Dictionary, (1987), “repent” 999.

  14. Tagai 1 Ioane 1:9; Mosaea 26:29; MFF 61:2; 64:7.

  15. MFF 58:43. Afai e leai se isi tagata na tiga ai, e tatau ona ta’uta’u atu e ala i le agaga tatalo i le Atua. O Le silafia i le mea lilo na te avatu faaaliali se taui (tagai Mataio 6:4, 6, 18; 3 Nifae 13:4, 6, 18).

  16. Tagai MFF 107:73–74.

  17. 2 Nifae 31:13; Iakopo 6:5; Mosaea 7:33; 3 Nifae 10:6; 12:24; 18:32.

  18. Tagai Mosaea 4:2–3.

  19. Isaia 1:18.

  20. MFF 19:15–17.

  21. I mafaufau o nisi o tagata, o le upu salamo e oo mai ai foi upu e pei o le sala ma le faasala, lea e faauigaina o le “faasalaga.” Afai e le tausalaina i latou i agasala e faasalaina ai, e mafai ona latou faauigaina faapea e le moomia ona latou salamo.

  22. Na saunoa Peresitene Spencer W. Kimball: “O loo i ai foi se lagona taatele ma atonu foi e le o mautinoa lelei e i latou e faapea ua saunia e le Alii le salamo mo na o i latou e fasioti tagata pe mulilua pe gaoi po o isi solitulafono matuia. O le mea moni lava e le sa’o lena manatu. Afai tatou te lotomaulalo ma naunau atu e ola ai i le talalelei, o le a faapea ona tatou manatu o le salamo ua faatatau tonu lava lea i soo se mea lava tatou te faia i lenei olaga e tusa lava pe o se mea faaleagaga po o le faaletino. O le salamo ua faatatau tonu lava mo agaga uma o e latou te lei maua le tulaga atoatoa” (Aoaoga a Peresitene o le Ekalesia: Spencer W. Kimball, 42). Tagai foi 1 Ioane 1:8; Mosaea 4:29–30.

  23. MFF 68:25; ua faaopoopo le faamamafa.

  24. O le upu metanoeo, μετανοεω sa faaaogaina i le gagana Eleni i fetalaiga a le Alii o loo i le Mataio 4:17; Mareko 1:15; ma le Luka 13:3. O le faaupuga lava lea sa faaaoga e Peteru i le Galuega 2:38; 3:19; ma le 8:22.

  25. I le Mataio 17:2 ma le Mareko 9:2 o le upu liua sa faaliliuina mai le upu metamorphoo, o lona uiga “suia le tulaga.”

  26. I le Efeso 4:23 o le upu loto sa faaliliuina mai le upu Eleni o le nous.

  27. I le Luka 1:77; Roma 2:20; ma le 2 Korinito 6:6, o le upu iloa sa faaliliuina mai le gnos po o le gnosis. O le gnos, afai e muamua ai i luma se faafeagai o le a-, o lona uiga o le “le lava le iloa,” e pei ona i ai i le agnostic. I le Galuega 17:23 o le Atua e le iloa ma le tapuai ma le le iloa sa faaliliuina mai le pogai o le agnos.

  28. I le Mataio 12:18 ma le Roma 8:5, o le upu agaga sa faaliliuina mai le upu Eleni o le pneuma.

  29. I le Galuega 17:25 o le upu manava sa faaliliuina mai le upu Eleni o le pnoe.

  30. Mosaea 2:21.

  31. Tagai 3 Nifae 27:21, 27.

  32. Alema 37:35–36.

  33. Alema 5:14.

  34. Tagai Ioane 3:3, 7; Mosaea 27:25; Alema 5:49; 7:14; Mose 6:59.

  35. Tagai Moronae 10:32.

  36. Tagai Kalatia 6:7–8.

  37. Tagai Faamasino 13:7; Luka 1:15; MFF 89:5, 7–9.

  38. Tagai Mataio 5:27–28; Alema 38:12; 3 Nifae 12:27–28; MFF 42:23.

  39. Tagai Roma 8:5–6.

  40. Tagai Alema 38:11; MFF 121:37.

  41. Tagai Ioane 13:15; 1 Timoteo 4:12; 1 Peteru 2:21; 2 Nifae 31:16; 3 Nifae 18:16; Mamona 7:10.

  42. Tagai MFF 121:45.

  43. Tagai MFF 85:3.

  44. Tagai Filipi 4:8; Mataupu Faavae o le Faatuatua 1:13.

  45. Mosaea 3:19.

  46. MFF 138:57–59; tagai foi fuaiupu 30–34.

  47. MFF 128:18.

  48. Tusipese a Tamaiti (1989), 60.

  49. Tagai MFF 27:9; 110:14–15; 128:18; 138:48.

  50. Tagai MFF 2:2–3; 132:19; 138:47–48; Talafaasolopito—Iosefa Samita 2:39.