Pilia ang Kahayag
“Kon ang inyong katuyoan usa ngadto sa akong himaya, ang inyong tibuok kalawasan mapuno sa kahayag, ug walay kangitngit diha kaninyo” (D&P 88:67).
Sa gamay pa ko, usahay mahadlok ko sa ngit-ngit. Kasagaran makadungog ko og lain nga mga tingog inig kagabii. Sa dili pa ko matulog, akong kandaduhan ang tanang pultahan ug susihon ang ilawom sa akong higdaanan. Tan-awon sab nako ang akong kabinet. Dili ako sigurado unsay akong gikahadlokan, apan usahay mobati gihapon ko og kahadlok.
Dihang nakakat-on ko sa pag-ampo, mibati ko og dakong kahupayan ug kalinaw. Duna koy namatikdan nga pagbati sa kahayag, ug nahibalo ko nga luwas ko og maayo ra.
Usa sa akong pinakauna nga mga panumduman may kalabutan usab sa kahayag. Sa gamay pa ko, ang akong igsoong lalaki ug ako nabugkos ngadto sa among inahan ug amahan didto sa Templo sa Salt Lake. Akong nahinumduman ang akong pamilya ug ang uban nga nagsul-ob og puti, ang talagsaong kahayag sa Templo, ug ang kalinaw nga akong gibati nianang adlawa.
Bisan og kini nga mga panumduman sa dugay na nga katuigan, akong mahinumduman unsay bation nga mahadlok diha sa kangitngit ug sa kalipay nga akong gibati diha sa kahayag sa templo. Kon magtinguha kita sa pagpuyo sa ebanghelyo, mapuno kita sa kahayag, ug walay kangitngit diha kanato. Ang kahayag ug ang pagtuo dili modungan sa kangitngit ug kahadlok. Kon mapuno kita sa kahayag, atong bation ang kalipay ug kamalinawon ug pagkalayo sa peligro. Manghinaut ako nga kanunay kitang mopili sa kahayag.
Paghulagway pinaagi ni Greg Newbold