Unsaon Nato nga Makadawat sa Pinakamaayong Benipisyo sa Pagtambong sa Templo?

Ni Elder Richard G. Scott

Sa Korum sa Napulog Duha ka mga Apostoles

Gikan sa Abril 2009 nga pakigpulong sa kinatibuk-ang komperensya.

Ang matag miyembro sa Ang Simbahan ni Jesukristo sa mga Santos sa Ulahing mga Adlaw napanalanginan nga mopuyo sa usa ka panahon diin ang Ginoo midasig sa Iyang mga propeta sa paghatag og paagi nga molambo ang paggamit sa balaan nga mga templo.

Tungod kay ako nahigugma kaninyo, ako kinasingkasing nga makigsulti kaninyo, nga walay paglipudlipod. Akong nakita nga sa daghang mga higayon ang mga indibidwal mihimo og dakong mga sakripisyo sa pag-adto sa lagyo nga templo. Apan kon ang usa ka templo natukod na sa duol, sulod sa mubo nga panahon, daghan ang dili kanunay nga mobisita niini. Ako adunay sugyot: Kon ang templo duol na kaayo, ang gagmay nga mga butang mahimo nga mobalda sa inyong mga plano sa pag-adto sa templo. Paghimo og piho nga mga tumong, hunahunaa ang inyong mga kahimtang, kon kanus-a kamo makaapil sa mga ordinansa sa templo. Dayon ayaw itugot nga may bisan unsang butang nga makabalda niana nga plano. Kini nga sundanan makasiguro nga kadtong kinsa nagpuyo duol sa templo mahimo nga mapanalanginan sama niadtong kinsa nagplano nang daan ug mihimo og taas nga biyahe aron makaadto sa templo.

Ako moawhag kaninyo sa paghimo sa inyong kaugalingon og tumong kon unsa ka makanunayon kamo makaapil sa mga ordinansa nga gitanyag diha sa atong mga templo. Unsa man ang anaa nga mas importante kay sa pagtambong ug pag-apil sa mga ordinansa sa templo? Unsa man nga kalihokan ang may mas dako pa nga epekto ug mohatag og labaw nga kamaya ug hingpit nga kalipay kay sa pag-adto sa templo?

Karon ako mopakigbahin og pipila ka dugang nga mga sugyot kon unsaon sa pag-angkon og dugang kaayohan tungod sa pagtambong sa templo.

Pagsabut sa doktrina nga may kalabutan sa mga ordinansa sa templo, ilabi na ang kamahinungdananon sa Pag-ula ni Jesukristo.¹
Paghunahuna inyong relasyon ngadto ni Jesukristo ug sa Iyang relasyon ngadto sa atong Langitnong Amahan, samtang nag-apil sa mga ordinansa sa templo. Kining yano nga buhat mosangput ngadto sa mas dako nga pagsabut sa balaanong kinaiyahan sa mga ordinansa sa templo.
Pagmainampoon nga magpahayag og pasalamat sa kanunay alang sa dili ikatandi nga mga panalangin nga midagayday gikan sa mga ordinansa sa templo. Pagpakabuhi sa matag adlaw aron sa paghatag og ebidensya ngadto sa Amahan sa Langit ug sa Iyang Pinalanggang Anak kon unsa gayud kamakahuluganon kadto nga mga panalangin nganha kaninyo.
Pag-iskedyul og regular nga mga pagbisita sa templo.
Paggahin og igong panahon nga dili magdali-dali sulod sa templo.
Pagtangtang sa inyong relo kon kamo mosulod sa balay sa Ginoo.
Pagpaminaw og maayo sa pagpresentar sa matag elemento sa ordinansa uban sa bukas nga hunahuna ug kasingkasing.
Paghunahuna sa indibidwal kang kinsa ninyo gipahigayon ang mahinungdanon nga ordinansa. Usahay pag-ampo nga siya mouyon sa kamahinungdanon sa mga ordinansa ug mamahimong takus o nag-andam nga mahimong takus aron makabenepisyo tungod niini.

Usahay kon makadungog ako sa choir atol sa tulumanon sa pagpahinungod sa templo, makasinati ako og pagbati nga hilabihan ka balaanon nga kini mopabayaw sa akong kasingkasing ug hunahuna. Akong ipiyong ang akong mga mata, ug dili lang kausa, diha sa akong hunahuna, akong mahanduraw ang dakong pundok sa mga indibidwal ibabaw kanamo nga nanukad sa templo ug mibayaw pataas. Akong gibati nga sila nagrepresentar sa daghang mga espiritu nga naghulat alang sa panghalili nga buhat nga pagahimoon alang kanila niana nga dangpanan, nagmaya tungod kay sa katapusan may usa ka dapit nga makapalingkawas kanila gikan sa mga kadena nga nagpugong kanila sa ilang mahangturon nga paglambo. Aron makab-ot kini nga katuyoan, kamo kinahanglan nga mohimo sa panghalili nga buhat. Kinahanglan nga kamo makaila sa inyong mga kaliwatan. Ang bag-ong programa sa FamilySearch naghimo sa paningkamot nga mas sayon kay sa kaniadto. Kinahanglan gayud nga makaila niadto nga mga kaliwatan, andamon ang gikinahanglan nga mga impormasyon ug adto sa balay sa Ginoo aron sa pagpahigayon sa mga ordinansa nga ilang gihandum nga madawat.

Pagkadakong kalipay nga makaapil sa buhat sa templo!

Paghulagway sa litrato pinaagi ni Derek Israelsen