Ang Pundo Nakatabang sa mga Miyembro sa Tibuok Kalibutan nga Makadawat og mga Panalangin sa Templo
Sukad sa iyang pagsulod sa Manila Philippines Temple niadtong Hulyo 2001, sa wala pa siya molarga alang sa iyang misyon sa Singapore, si Riaz Gill nga taga-Pakistan gusto nga mobalik sa templo aron makabaton og mahangturong pamilya.
Niadtong 2007, ang iyang asawa, si Farah, gibunyagan, apan lisud ang kwarta ug wala sila masayud kon kanus-a sila makabiyahe ngadto sa templo, nga kapin sa 3,500 ka milyas (5,700 ka kilometros) ang gilay-on. Sa pagkatawo sa ilang anak nga lalaki, nga si Ammon Phinehas, niadtong 2009, mas nagkadako ang ilang tinguha nga mabugkos sa templo, ug sa katapusan sa tuig 2010, uban sa tabang sa General Temple Patron Assistance Fund sa Simbahan, natubag ang ilang mga pag-ampo.
“Ang pag-adto sa templo uban sa akong pamilya nakatabang nga mas malig-on ang akong pagpamatuod,” si Brother Gill miingon. “Human sa among pag-adto sa templo, maingon og duna pa koy daghang ikahatag sa Ginoo. … Ang pag-adto sa templo nindot kaayo ug makapalig-on sa pagpamatuod, lisud kining isulti sa mga pulong.”
Samtang didto, si Brother Gill nakahimo usab sa pagpahigayon sa mga ordinansa alang sa iyang papa, apohan, ug ugangan, kinsa mga patay na. Iyang napahimo ang buhat alang sa iyang mama, ug siya nabugkos sa iyang mga ginikanan.
“Dako kaayo kadto nga kahigayunan alang kanako ug sa akong pamilya nga makaadto sa templo,” miingon siya. “Gusto nakong ihatag ang espesyal nga mga pagpasalamat uban sa daghang pag-ampo ngadto sa mga lider nga naghimong posible sa temple trip.”
Sukad niadtong 1992 ang pundo, nga 100 ka porsyento nga gisuportahan pinaagi sa mga kontribusyon sa mga miyembro, nahimo nga usa ka paagi sa paghatag og panahon nga makabisita sa templo ang mga miyembro nga nagpuyo sa gawas sa Estados Unidos ug Canada kinsa maglisud sa pag-adto. Ang mga miyembro nga nagtinguha nga makaamot sa pundo mosulat lang og “Temple Patron Fund” diha sa “Other” nga seksyon sa normal nga sulatanan sa kontribusyon. Ang mga indibidwal mahimo usab nga moamot sa pundo pinaagi sa mga LDS Philanthropies [manggihatagon nga pundok].
Atol sa kinatibuk-ang komperensya niadtong Oktubre 2011, si Presidente Thomas S. Monson miawhag sa mga miyembro sa pag-amot alang sa General Temple Patron Assistance Fund nag-ingon, “Aduna pay mga dapit sa kalibutan diin ang mga templo layo kaayo sa atong mga miyembro nga sila dili makabayad sa biyahe aron makaadto. Sa ingon dili sila makaambit sa sagrado ug mahangturong mga panalangin nga ihatag sa templo” (“Sa Atong Pagkita og Usab,” Liahona ug sa Ensign, Nob. 2011, 4-5).
“Ang tuyo niini nga pundo mao ang pagtabang niadtong anaa sa mga parte sa kalibutan diin mas lisud ang pag-adto sa templo,” miingon si Elder William R. Walker, Executive Director sa Temple Department. “Ang kausa ra [one-time] nga probisyon mao ang pagsangkap sa usa ka indibidwal aron makadawat sa kaugalingon niyang mga ordinansa.”
Ang pipila sa daghan nga nanginahanglan, miingon si Elder Walker, naggikan sa Africa, sa Pasipiko, ug sa Asia. Ang mga presidente sa stake ug mga presidente sa misyon mohimo og mga rekomendasyon sa ilang Presidency sa Area, kinsa maoy mangalagad sa pundo nga mag-agad basi sa matag nasud nga gialagaran.
Niadtong 2009 ug 2010, gibana-bana nga 4,000 ka mga miyembro ang nakagamit sa pundo sa pagbiyahe ngadto sa usa ka templo alang sa unang higayon—ug posible nga sa mao ra nga—higayon.
Si Elder Walker miingon nga aron makapanalangin og daghang kinabuhi kutob sa mahimo, ang mga miyembro “mangita og templo diin [sila] makadaginot sa pletehan. Nagpasabut kana nga dili kanunay basihan ang distansya o kon ang templo nasakop ba o wala masakop sa ilang area.”
Ang matag miyembro nga mogamit sa pundo gilauman nga mohimo og matang sa pagsakripisyo o kontribusyon.
“Sa pipila ka mga dapit ang pagkuha pa lang og passport dako na og gasto ug lisud kaayo,” miingon si Elder Walker. “Mao nga sa ubang dapit, diin ang mga miyembro mobiya sa ilang nasud aron sa pag-adto sa templo, kinahanglan nga sila ang mogasto sa kaugalingon nilang passport aron makagamit sa pundo. Sa ubang mga nasud, dili kaayo kini dako nga kantidad. Alang sa uban dili kaayo kini dako nga gasto, apan alang kanila tingali mao ra gayud kana ang ilang matigom sulod sa unom ka bulan.”
Miingon si Elder Walker nga kadtong kinsa moamot alang sa usa ka tumong kasagaran mas makapasalamat niini. “Sa hapit matag sitwasyon ang mga tawo nakahimo sa tanan nilang mahimo sa pag-amot ug napanalanginan sa hilabihan, ug wala nila kini pahimusli,” miingon siya.
Agig dugang nga mahimong posible sa mga tawo nga makaadto sa templo, ang mga pundo gamiton usab sa pagpalit og pito ka parisan nga garment alang sa matag indibidwal aron ilang matuman ang ilang mga pakigsaad kon sila manguli na.
Ang pamahayag ni Presidente Monson atol sa komperensya mao ang unang higayon nga gipahibalo ang mao nga pundo diha sa pulpito pinaagi sa propeta. Kadto, inubanan sa nagkadako nga panginahanglan sa pundo, labing siguro makapadako sa mga donasyon, si Elder Walker miingon.
“Aduna pa kitay mga tawo nga madugang sa Simbahan, ug wala pa gayud nato mahatag ang hingpit nga katagbawan sa mga panginahanglan sa daghang mga dapit,” miingon siya. Sa pagkutlo sa tambag gikan ni Presidente Howard W. Hunter (1907–1995) niadtong 1994 nga ang tanang takus nga mga miyembro makahupot og rekomend sa templo, (tan-awa sa “The Great Symbol of Our Membership,” Tambuli, Nob. 1994, 6; Ensign, Okt. 1994, 2), mipadayon siya, “Aduna kitay daghang matinud-anon nga mga miyembro sa Simbahan kinsa naghupot sa magamit nga mga rekomend sa templo apan wala pa makaadto sa templo ug dili pa gayud makaadto sa templo diha-diha.”
Si Elder Walker miingon nga ang pahibalo ni Presidente Monson kabahin sa pundo nahimo gumikan sa iyang gugma alang sa mga templo ug sa iyang pagbati sa mga Santos kinsa maoy nanag-una nga makabenepisyo sa mao nga pundo.
“Kon mangadto kamo niining lagyo nga mga dapit, masinati ninyo ang gibati niining mga tawhana ug sa mga hagit nga anaa kanila,” si Elder Walker miingon. “Kini nga pundo gamiton alang sa pagpanalangin sa daghang katawhan.”
Si Riaz Gill, iyang asawa, si Farah, ug ang anak, si Ammon Phinehas, nakaadto sa Manila Philippines Temple ug nabugkos ang tibuok pamilya niadtong 2010, salamat sa General Temple Patron Assistance Fund sa Simbahan.
Litrato sa maayong kabubut-on ni Riaz Gill
Manila Philippines Temple
© IRI