Mga Istorya gikan sa Komperensya
Ang Bulawanon nga Tiket
“Usa ka babaye ang nagtinguha gayud labaw sa bisan unsang butang nga maminyo sa templo sa matarung nga naghupot sa priesthood ug mahimong inahan ug asawa. Iya kining gipangandoy sa tibuok niyang kinabuhi, ug ah, pagkatalagsaon ug mahigugmaon unya niya nga asawa. Ang iyang panimalay mapuno sa mahigugmaon nga pagbati. Walay sakit nga pulong ang malitok. Ang giluto dili gayud mapaig. Ug ang iyang mga anak, imbis mokuyog sa ilang mga barkada, mas mopili sa paggahin sa ilang mga gabii ug katapusan sa semana uban ni Mama ug ni Papa.
“Mao kini ang iyang bulawanon nga tiket. Mao kini ang usa ka butang diin gibati niya nga magdepende ang tibuok niyang pagpakabuhi. Mao kini ang usa ka butang sa tibuok kalibutan nga iya gayud nga gipangandoy.
“Apan wala gayud kini mahitabo. Ug, paglabay sa katuigan, nag-anam siya og pagkalayo, maligutguton, ug gani masuk-anon. Wala siya makasabut nganong dili mohatag ang Dios niining matarung niyang tinguha.
“Nagtrabaho siya isip magtutudlo sa elementarya, ug ang pagpakig-uban sa mga bata sa tibuok adlaw nagpahinumdom lang nga ang iyang bulawanon nga tiket wala gayud moabut. Sa paglabay sa katuigan nagkagrabe ang iyang kasagmuyo ug pagpalayo. Ang mga tawo dili na ganahan kon anaa siya ug molikay na sila kaniya kutob sa ilang mahimo. Gani iyang gidala ang iyang mga kasagmuyo ngadto sa mga bata sa eskwelahan. …
“Ang trahedya niini nga istorya mao nga kining minahal nga babaye, sa tanan niyang kasagmuyo sa iyang bulawanon nga tiket, napakyas sa pagmatikod sa mga panalangin nga siya aduna na. Wala siyay mga anak sa iyang panimalay, apan gilibutan siya niini sa iyang klasrom. Wala siya panalangini og usa ka pamilya, apan ang Ginoo mihatag kaniya og oportunidad nga pipila lang ka tawo ang aduna—ang kahigayunan nga makaimpluwensya alang sa kaayohan sa kinabuhi sa gatusan ka mga bata ug mga pamilya isip usa ka magtutudlo.
“Ang leksyon dinhi mao nga kon hutdon ra nato ang atong adlaw sa paghulat sa maanindot nga rosas, dili nato makita ang katahum ug kaanindot sa gagmay kaayong forget-me-not nga naa sa atong palibut.”
Presidente Dieter F. Uchtdorf, Ikaduhang Magtatambag sa Unang Kapangulohan, “Ayaw Ko Paghikalimti,” Liahona, Nob. 2011, 121–22.
Mga pangutana nga angayang palandungon:
-
Unsa kaha ang inyong “bulawanon nga tiket,” ug sa unsang paagi kini nakababag sa inyong abilidad nga makakita sa mga panalangin nga anaa na kaninyo?
-
Unsa ang “gagmayng mga forget-me-not” nga posibleng wala ninyo mailhi sa inyong kinabuhi?
Ikonsiderar sa pagsulat sa inyong panghunahuna sa journal o hisguti kini ngadto sa uban.
inyong damgo matinuod