Makasulti ba mo og Russian?
Anna Nikiticheva, Scotland
Bisan tuod busy kaayo mi, ang akong bana, si Daniil, ug ako mihukom nga mobisita mi og usab sa Templo sa Preston England sa dili pa mahuman ang 2009. Nanginahanglan kini og duha ka pagsakay sa bus ug hapit unom ka oras nga pagbyahe aron makaabut didto gikan sa usa ka gamay nga Scottish nga lungsod diin kami nagpuyo.
Pagkakaadlawon sa among pagbiyahe nagdag-um ug nag-ulan, apan malipayon kami nga mibiya padulong sa templo. Samtang nagpaabut kami og lain nga oras aron makasakay sa ikaduha nga bus sa balhinanan og sakyanan, misugod sa pagbunok ang ulan ug nagkabugnaw kini.
Hinoon, ang paglaum nga sa dili madugay makaabut sa templo mihupay kanamo. Sa among pag-abut sa Preston, mibati mi og kusog nga impresyon nga modiretso dayon sa templo. Kami gigutom ug basa, apan kami naminaw sa Espiritu Santo.
Sa among pagsulod sa templo, usa ka mahigalaong temple worker ang nangita sa among mga rekomend sa templo. Iyang gitangtang ang iyang antipara ug mitan-aw pag-usab sa mga ngalan sa among rekomend.
“Taga-Russia ba mo?” nangutana siya nga natingala.
“Oo,” kami mitubag, nasurprisa og gamay sa iyang reaksyon.
“Makasulti mo og Russian?” siya nangutana.
“Siyempre,” kami miingon.
Siya dayon midayal sa telepono ug nanawag sa usa ka tawo.
Sa wala madugay ang presidente sa templo miduol kanamo. Lapus sa iyang atimpara, among makita nga adunay mga luha sa iyang mga mata. “Kamo mga anghel gikan sa Dios!” siya miingon uban sa pahiyum, naghangyo kanamo nga mosunod kaniya. Misunod mi kaniya ug sa wala madugay nakakita og batan-ong misyonaryo uban sa mga temple worker nga nagpalibut kaniya.
Among nahibaloan nga kini nga misyonaryo gikan sa Armenia ug makasulti og Russian. Siya gitawag nga moserbisyo sa England London Mission apan wala pa makakat-on og Iningles. Walay tawo nga makasulti og Russian sa missionary training center tapad sa templo. Niini nga adlaw siya unta modawat sa iyang endowment, apan ang mga temple worker dili makasabut kaniya—hangtud ang usa ka basa kaayo nga taga-Russia nga managtiayon misulod.
Diha-diha dayon giubanan ni Daniil ang batan-ong misyonaryo. Ang misyonaryo nalipay pag-ayo ug sa wala madugay miingon nga siya mibati og espesyal nga diwa sa among pag-abut.
Mapasalamaton ako nga bisan sa among busy nga eskedyul ug ulanon nga panahon, ang akong bana ug ako mihukom gihapon nga mobisita sa templo niadtong adlawa aron makatabang sa usa ka anak sa Dios nga makasulti lang og Russian sa Great Britain. Mapasalamaton ako sa mga panalangin sa templo, nga midan-ag sa among kinabuhi og espesyal nga kahayag ug katuyoan. Nasayud ko nga kon kita mosunod sa mga aghat sa Espiritu Santo, Siya mogiya kanato balik sa atong langitnong panimalay—sama sa Iyang paggiya sa akong bana ug kanako sa balay sa Ginoo niadtong adlawa.