Ang dili mga miyembro makaambit ba sa sakrament?

Sigon sa inyong nahibaloan, ang pan ug ang tubig sa sakrament gituyo alang sa mga miyembro sa Simbahan aron kita makabag-o sa atong mga pakigsaad sa bunyag. Hinoon, dili gayud kita mohimo og bisan unsa atol sa miting sa sakrament sa pagpugong sa dili mga miyembro nga moambit sa sakrament.

Maayo nga makadapit og mga higala ug pamilya nga dili miyembro ngadto sa simbahan, ug gusto nato nga bation nila nga sila gikahinangop ug sila komportable atol sa atong mga miting. Makatabang ang pag-andam kanila alang sa miting sa sakrament pinaagi sa pagpasabut sa katuyoan sa sakrament ug unsay mahitabo panahon sa miting. Kon mangutana sila kon kinahanglanon ba nga moambit sila sa sakrament, sultihi lang nga makahimo ra sila apan kini gituyo alang sa mga miyembro sa Simbahan, kinsa nagbag-o sa ilang mga pakigsaad sa pagbunyag.

Sumala pa ni Elder Dallin H. Oaks sa Korum sa Napulog Duha ka mga Apostoles, “Ang ordinansa sa sakrament makahimo sa miting sa sakrament nga labing sagrado ug importante nga miting sa Simbahan” (“Ang Miting sa Sakrament ug ang Sakrament,” Liahona, Nob. 2008, 17). Kinahanglan nga matabangan nato nga makasabut ang dili mga miyembro niining importante nga ordinansa, magsiguro nga bation usab nila ang kakomportable atol sa atong mga miting.