Pagtulun-an human sa usa ka Pagtulun-an
Amos 3:7
Kini nga bersikulo nagtudlo kanato sa mahinungdanon nga tahas sa mga propeta.
7. Sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad, ang mga propeta.
Ang Ginoong Dios
“Tungod kay ang atong Amahan nahigugma sa iyang mga anak, dili niya kita pasagdan nga magtag-an tag-an kon unsa ang pinakaimportante niining kinabuhia kon diin ang atong pagtagad niini magdala og kalipay o ang atong kawalay pagtagad niini magdala og kasub-anan. Usahay direkta niyang sultihan ang usa ka tawo nianang mga butanga, pinaagi sa inspirasyon. Apan siya, agi og dugang, mosulti kanato niining importanting mga butang pinaagi sa iyang mga sulugoon. … Gibuhat niya kini aron bisan kadtong dili mobati sa inspirasyon mahibalo, kon maminaw lamang sila, nga sila nasultihan sa kamatuoran ug napahimangnoan.”
Presidente Henry B. Eyring, Unang Magtatambag sa Unang Kapangulohan, “Ang Pamilya,” Liahona, Okt. 1998, 12; Ensign, Peb. 1998, 10.
Siya Magpadayag
Sa unsang paagi makigsulti ang Ginoo sa Iyang mga propeta? Dunay daghang paagi, lakip sa:
-
Inspirasyon pinaagi sa Espiritu Santo (tan-awa sa 2 Pedro 1:21).
-
Mga panan-awon ug mga damgo (tan-awa sa Numeros 12:6; 1 Nephi 8:2).
-
Mga pagbisita sa langitnong mga binuhat (tan-awa sa Joseph Smith—Kasaysayan 1:16–17; D&P 110:8).
Iyang mga Tinago
Ang orihinal nga Hebreohanon nga pulong nga gigamit sa Biblia alang sa tinago sa tinuoray nagpasabut nga “tambag,” busa may kalabutan kini sa mga plano ug katuyoan sa Ginoo.
Iyang mga Sulugoon nga mga Propeta
“Gibalik-balik sa pagpahayag sa mga kasulatan nga ang Ginoo mohatag sa Iyang mga sugo ngadto sa mga anak sa tawo pinaagi sa buhing mga propeta. Walay komitiba, katiguman, o bisan unsang awtoridad ang adunay katungod sa pagdiktar Kaniya og doktrina nga supak sa Iyang balaod. Ang mahangturong mga panalangin sa Dios mag-agad sa atong kamasulundon ug kamaunungon sa pulong sa Ginoo nga gipadayag ngari kanato pinaagi sa Iyang balaan nga mga propeta.”
Elder L. Tom Perry sa Korum sa Napulog Duha ka mga Apostoles, “Kami Nagtuo sa Tanan nga Gipadayag sa Dios,” Liahona, Nob. 2003, 88.
Unsa man ang bag-ohay lang nga gihangyo kanato sa mga propeta ug mga apostoles nga atong buhaton? Ribyuha ang pinakabag-o nga kinatibuk-ang komperensya (tan-awa sa conference.lds.org) ug ikonsiderar ang pagsulat sa inyong journal sa mga butang nga gibati ninyo diin kamo giaghat sa pagbuhat isip resulta sa unsay gisulti sa mga sulugoon sa Ginoo.