Namulong Karong Adlawa
Ang Propeta Miawhag sa mga Young Adults sa Pagkahimong Kahayag
Niadtong Nobyembre 1, 2011, sa usa ka debosyonal didto sa Brigham Young University–Provo, si Presidente Thomas S. Monson mitambag sa mga naminaw sa “pagkahimong matarung nga ehemplo.”
Nagkutlo gikan sa Bag-ong Tugon kang Apostol Pablo—“hinonoa alang sa mga magtotoo, pagkinabuhi ingon nga panig-ingnan sa sinultihan ug sa paggawi sa gugma, sa pagtoo, sa kaputli” (1 Timoteo 4:12)—si Presidente Monson mipahayag sa iyang tinguha nga ang mga miyembro sa Simbahan mamahimo nga kahayag sa kalibutan.
“Unsa ang kahayag?” siya nangutana. “Pilion nako ang yano ‘mga butang nga magpasanag.’ Ang pagpakita og ehemplo sa pagkamatarung … makatabang sa pagpasanag sa nagkangit-ngit nga kalibutan.”
Iyang giila nga alang sa kadaghanan, ang kahayag nagkakisdom nga hapit na gayud mahanaw. Ang atoa, miingon siya, mao ang responsibilidad sa paghimo sa atong mga kahayag nga mosanag aron makita sa uban, diin nagkinahanglan nga kita motuo gayud.
“Anaa ra sa matag usa kanato ang pagpalambo sa pagtuo nga gikinahanglan sa espirituhanon nga pagsugakod ug sa pagtumong sa atong kahayag aron makita sa uban,” miingon siya. “Hinumdumi nga ang hugot nga pagtuo ug pagduha-duha dili manaa sa samang dapit ug sa samang higayon.”
Ang pipila ka maayong mga paagi sa pag-angkon ug paghupot og hugot nga pagtuo, mipasabut si Presidente Monson, mao ang pagbasa ug pagtuon sa mga kasulatan ug kanunay nga pag-ampo.
“Inyo na bang nabasa ang Basahon ni Mormon? Inyo na bang gisulayan ang gisaad nga naa sa Moroni?” nangutana siya. Giawhag niya ang mga nanambong sa paggahin og oras matag adlaw sa pagkaplag sa ilang kaugalingon kon ang Basahon ni Mormon tinuod ba, “kay kini makausab sa inyong kasingkasing, ug makausab sa inyong kinabuhi,” miingon siya.
Nagkutlo sa 3 Nephi 12:16—“Busa, himoa nga ang inyong kahayag mohayag sa atubangan niini nga mga katawhan, aron sila makakita sa inyong maayo nga mga buhat ug himayaon ang inyong Amahan kinsa anaa sa langit”—si Presidente Monson mipasabut nga si Kristo mao ang “‘matuod nga kahayag, nga nagaiwag sa matag usa ka tawo, kini nagsingabut sa kalibutan’ (Juan 1:9), ang kahayag nagadan-ag sa taliwala sa kangitngitan’” (Juan 1:5).
Iyang gitapos: “Ang atong mga oportunidad sa paghatag og kahayag walay kinutuban. … Samtang magsunod kita sa ehemplo sa Manluluwas, ang atoa mao ang responsibilidad nga mahimong kahayag, sama kaniadto, sa kinabuhi sa mga nanaglibut kanato.”
Atol sa iyang pakigpulong sa debosyonal sa Brigham Young University–Provo, si Presidente Monson miawhag sa mga miyembro sa pagbasa sa Basahon ni Mormon ug sa pagkaplag sa kamatuoran niini sa ilang kaugalingon.
© IRI