Tinuod nga Kalipay
Kang kinsa nako ipakigbahin ang ebanghelyo? Duna koy tawo nga nahunahunaan.
“Ug kon kini mahimo nga ikaw … magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” (D&P 18:15).
Dihang gibasa sa akong bishop kini nga bersikulo, mibutok-butok ang akong kasingkasing. Akong makita ang akong kaugalingon nga naa sa bunyag sa tawo nga akong gisultihan sa ebanghelyo. Malipay gayud ang akong higala, ug ang tanan mahibalo nga tungod kanako nabunyagan ang akong higala. Dako unya ang akong kalipay.
Ang ngalan ni Angela misantop sa akong hunahuna. Siya ang suod nakong higala, ug gikinahanglan niya ang ebanghelyo. Nakasiguro ko nga ang pagkadungog sa ebanghelyo ug pagkahibalo nga siya anak sa Dios makatabang sa pagtubag sa iyang mga pangutana ug mobayaw kaniya.
Pagkasunod nga adlaw nangutana ko, “Oy, Ang, ang akong simbahan mag-barbecue inigka-Sabado. Gusto ka bang moadto?”
“Oo,” mitubag siya, “morag makalingaw kana.”
Mitambong siya, ug sulod sa mga bulan, padayon ang akong pagdapit kaniya sa matag kalihokan sa Simbahan nga akong mahunahunaan. Matag human sa kalihokan mangutana ko niya, “Unya, Ang, unsay imong hunahuna?” Naggiya kini ngadto sa mga paghisgot mahitungod sa mahangturong mga baruganan. Nalipay ko. Moabut ra ang adlaw nga akong maani ang mga panalangin nga gisaad sa Langitnong Amahan.
Usa ka tingtugnaw nga gabii sa wala pa ang Pasko, si Angela ug ako mihukom nga maglakaw libut sa Washington D.C. Temple. Ang Espiritu Santo mipalibut kanamo samtang naglakaw kami, ug nahibalo ko nga duna siyay gibati.
“Unya unsay imong gibati?” nangutana ko.
“Akong gibati nga gusto kong magpabunyag. … Kadyot lang,” mipasidaan siya dihang nakita niya ang kahinam sa akong panagway. “Dili pa ko mabunyagan karon, ug dili ko makapaadto ug makapabisita sa mga misyonaryo. Dili gayud mosugot ang akong mga ginikanan niini. Apan mahimo bang tudloan ko nimo sa tanan nimong nahibaloan?”
Nakalitan, mapaubsanon kong mitubag, “Oo, maningkamot ko sa pagtudlo nimo sa tanan nakong nahibaloan.”
Nianang pagkagabii akong gihunahuna ang saad nga akong gihimo. Tanan nakong nahibaloan? Apan unsa man kaha kon dili igo ang akong nahibaloan? Igo na ba kalig-on ang akong pagpamatuod? Nahibalo ba gayud ako nga ang ebanghelyo tinuod?
Nakahukom ko nga sa pagkasunod adlaw akong sugdan sa pagkat-on ang tanan kutob sa akong mahimo mahitungod sa ebanghelyo, sa pag-angkon og tinuoray nga pagpamatuod sa katinuod niini.
Uban sa kalagsik akong gisugdan ang pagbasa sa mga kasulatan matag gabii. Ang akong mga pag-ampo nagkaanam og kakinasing-kasing samtang nangamuyo ko alang kang Angela ug kanako aron mahibalo nga ang ebanghelyo tinuod.
Sa hinay-hinay miabut ang mga resulta. Sa among mga paghisgot usahay giyahan ako sa Espiritu sa pagsulti og mga butang nga wala nako hunahunaa hangtud nianang higayuna. Nagkalig-on ang akong pagpamatuod samtang gipaambit ko kini. Ang mga kasulatan nahimong tinuoray nga bahin ngari kanako.
Ang akong mga ginikanan anaa sa pagtabang kanako. Sila bililhon nga mga kapanguhaan, ug nakakat-on ako sa dugang nga paghigugma ug pagpasalamat kanila.
Lima ka tuig ang milabay si Angela wala gihapon mamiyembro sa Simbahan. Kon akong hukman ang akong kaugalingon sumala sa grade-eight nakong mga gilauman, wala ko kapasar. Wala ko makalingkod sa usa ka pagbunyag ug makadawat sa “hingpit nga kalipay” nga pagdayeg gikan sa tanan isip maoy nakadala og usa ka higala ngadto sa ebanghelyo. Bisan pa, ang akong mga gilauman nausab. Akong nadala ang kaugalingon nakong kalag paduol sa Dios. Bisan og si Angela wala magpasakop sa Simbahan, ang pagtuon ug pagtudlo nga akong gihimo wala makawang. Nakakat-on siya og dugang sa ebanghelyo, ug ang pagpakigbahin niini ngadto kaniya nagkabig kanako. Ug nakatabang kini kanako nga mahimong mas epektibo sa pagpakigbahin niini ngadto sa uban.
Ang hingpit nga kalipay nga gisaad diha sa Doktrina ug mga Pakigsaad wala magpasabut sa kalibutanon nga pagdayeg. Mas dako ang akong kalipay tungod kay mas nakaila ako sa Manluluwas ug nakabaton og lig-on nga pagpamatuod sa Iyang ebanghelyo.
Paghulagway pinaagi ni Julie Rogers