Namulong Sila Kanato
Sundaang Propeta
Ang engagement ring kasagaran nagrepresentar sa pasalig. Apan alang sa akong asawa ug kanako, ang pagkawalay engagement ring nagrepresentar sa among pasalig sa Ginoo ug sa Iyang mga propeta.
Nahimamat nako ang anghel nga mahimo nakong asawa sa salo-salo sa institute sa ikaduhang gabii sukad nauli ko gikan sa misyon. Bisan tuod si Shelley ug ako nagdako sa Canada pipila ka gatusan ka milya ang gilay-on ug wala pa magkita sukad, nag-ila-ila kami pag-ayo sa misunod nga mga bulan. Sa dihang nag-propose ko niya sa tulo ka higayon ug gibalibaran tungod kay nagpasalig siya nga moserbisyo og misyon, sa katapusan iyang gidawat ang akong proposal sa dihang misaad ko niya nga mag-misyon ming duha kon managko na unya among mga anak. Iyang gidawat ang engagement ring niadtong Disyembre 22, 1976.
Apan sa misunod nga mga adlaw, kaming duha nabalaka—dili kabahin sa pagminyo apan kabahin sa singsing. Tuguti ko sa pagpasabut.
Usa ka Desisyon sa Pagsunod sa Propeta
Sa mga semana nga nagkaduol ang among engagement, si Shelley ug ako migahin og nindot kaayong panahon sa pag-istoryahanay kon unsaon namo pagtukod sa among pamilya ug unsa nga mahisama ang among kaminyoon. Usa sa mahinungdanon nga mga butang sa diskusyon mao ang among determinasyon nga mosunod kanunay sa propeta.
Duha ka bulan sa wala pa kami ma-engaged, naminaw kami og daghang mga pakigpulong sa kinatibuk-ang komperensya sa Oktubre 1976 naghatag og gibug-aton sa mga baruganan sa pagpaningkamot sa kaugalingon. Kini mao ang hilisgutan nga kanunayng gitudlo ni Presidente Spencer W. Kimball (1895–1985) ug sa uban sulod sa pipila ka tuig. Kaming duha ni Shelley ug ako nagtubo nga nasayud sa kaimportante sa paghimo og tanaman, pagkaanaay suplay sa pagkaon, ug sa kinatibuk-an mahimong andam. Apan sa niana nga kinatibuk-ang komperensya, ang tema sa pagpangandam ingon og tataw kaayo. Pipila sa mga tigpamulong nagpasabut sa baha sa Teton Dam nga nahitabo niadtong Hunyo. Lakip kanila mao si Barbara B. Smith (1922–2010), ang kinatibuk-ang presidente sa Relief Society, kinsa naghatag og gibug-aton sa kaimportante sa pagpaningkamot sa kaugalingon—ilabi na, sa pagsangkap og usa ka tuig nga suplay sa pagkaon, nga gitambag niadtong panahona.1 Si Presidente Kimball, sa panapos nga sesyon sa komperensya, mipahinumdom sa mga Santos sa Ulahing mga Adlaw sa kasulatan sa Lucas 6:46, diin ang Manluluwas miingon, “Nganong motawag man kamo kanako nga, Ginoo, Ginoo, apan dili mobuhat sa ginasugo ko kaninyo?” Si Presidente Kimball dayon miawhag sa mga Santos nga ang mga mensahe sa komperensya maanaa sa ilang “mga panimalay ug … sa umaabot nga kinabuhi.”2
Human sa among engagement, samtang si Shelley ug ako namalandong sa pagsugod sa among kaminyoon ug kinabuhi nga may kaugalingong pamilya, kini nga mga mensahe among nahinumduman. Wala masayud ang usag usa, kaming duha naghunahuna kon unsaon sa pagsugod og home storage sa among pamilya. Aron makasunod sa tambag niadtong higayona, kinahanglang magsugod mi sa pag-angkon og usa ka tuig nga suplay sa pagkaon. Apan unsaon namo sa pagbuhat niini? Kami mga estudyante—ug sa umaabut pa nga mga tuig—ug wala mi daghang kwarta. Ang Espiritu Santo mihatag kanamo, tagsa-tagsa, sa sama nga tubag: kinahanglan namo nga ibaligya ang engagement ring.
Apan unsaon nako sa paghangyo ni Shelley nga buhaton kadto? Bag-o lang nakong gihatag kaniya ang singsing. Unsa kaha ang iyang hunahunaon kabahin sa akong paghangyo kaniya sa pagbaligya niini aron makapalit mi og pipila ka oat ug harina ug bugas? Sa samang higayon, siya nabalaka usab niini. Unsa kaha ang akong hunahunaon, siya naghunahuna, kon siya moduol kanako kabahin sa pagbaligya sa singsing nga akong napilian alang kaniya? Kini ba makapasakit kanako?
Apan ang pagdasig nga among nabati lisud kaayo nga ibaliwala, ug kon mas naghunahuna kami kabahin niini, mas migilak ang diyamante nga singsing. Sa dihang gihisgutan ni Shelley ang hilisgutan mga pipila lang ka adlaw pagkahuman sa Pasko, nahupay ko nga kami adunay sama nga konklusyon. Sa daghang mga paagi, kini talagsaon nga kompirmasyon kanamong duha kabahin sa pagpili kon si kinsa ang among minyoan. Ang pagkasayud nga ang among mga prayoridad ug mithi kapareha ug nahiuyon sa propeta sa Dios usa ka dako nga kasigurohan. Mapasalamaton kaayo ko sa iyang kaandam sa paghimo og ingon nga sakripisyo aron sa pagsunod sa propeta.
Palihug ayaw kog laina sa pagsabut ug palihug ayaw ibaligya ang inyong mga singsing. Ang pagpalit ug pagsul-ob og engagement ring dili sayop. Sa pagkatinuod, ang among naminyo nga mga anak adunay nindot ug angay nga mga singsing. Adunay daghang mga paagi nga kita makasunod sa mga propeta ug mga apostoles ug magamit ang ilang tambag sa atong personal nga kinabuhi. Tungod ang Espiritu miderekta kanamo sa pagsunod sa propeta pinaagi sa pagbaligya sa among engagement ring, sa among bahin ang pagpili anaa tali sa dili pagbaligya sa singsing ug sa pagsunod sa propeta. Kini nakatabang sa pag-establisar og duha ka sumbanan sa among panimalay gikan pa sa sinugdanan: ang pagsunod sa propeta ug pagsunod sa personal, espirituhanon nga mga pagdasig nga atong nadawat.
Mga Tubag sa Atong Desisyon
Ang tindahan sa alahas diin akong gipalit ang singsing nanirado mga usa ka semana paghuman sa Pasko, apan sa pag-abli gyud niini, nakig-istorya ko sa alahero. Nagdahum gyud ko nga dili siya mo-refund; kay, ang singsing nasul-ob na ug gikonsiderar nga ginamit. Giandam na nako ang akong kaugalingon alang niining reaksyon ug nagdahum nga ibaligya ang singsing isip secondhand nga dako og alkansi. Apan sa akong katingala, nahumok ang kasingkasing sa alahero. Migawas ko nga may dala nga kwarta—ug nahigangha sa katingala kon giunsa sa Ginoo sa pag-andam sa agianan alang kanamo nga magmasulundon.
Dili tanan ang uyon kaayo sa among desisyon. Sa dihang ang among mga higala—lakip niadtong mga miyembro sa Simbahan—nahibalo sa among gibuhat ug nakakita sa gamay nga panit nga singsing nga akong gihimo aron sul-ubon ni Shelley, ila kaming giingnan nga kami nabuang. Ang ubang mga babaye nga kaedad ni Shelley dili makatuo nga siya andam sa iyang gibuhat. Pipila lang ang nagdasig o nagsuporta.
Si Shelley lig-on ug nasayud nga siya ma-OK ra bisan unsa pa ang hunahunaon sa mga tawo; siya adunay pagsalig sa pagkasayud nga siya nagsunod sa propeta. Ug kana mas importante kaysa bisan unsa nga butang. Apan ang Ginoo naghatag kanamo og malumong kalooy pinaagi sa duha ka higala kinsa mitabang kanamo nga mobati nga kami wala mag-inusara.
Ang akong higala nga si Bob ug ako mipaila-ila ni Fran sa Simbahan niadtong high school. Kaming tulo sa wala madugay nagserbisyo og misyon, ug sa dihang miuli si Fran gikan sa iyang misyon, siya ug si Bob na-engaged. Sa dihang sila mipakigbahin sa maayong balita kang Shelley ug kanako, among nahibaloan nga imbis nga mopalit og engagement ring, sila usab mihukom nga gamiton ang pundo sa pagpalit og food storage. Nakapainteres kanamong upat nga ang Espiritu miderekta kanamo sa pagbuhat sa sama nga butang. Ang among pasalig sa pagsunod sa Espiritu Santo ug pagsunod sa buhi nga propeta midugang og bag-ong dimensyon sa among panaghigalaay, nga milungtad og sobra sa 40 ka tuig.
Mga Panalangin gikan sa Pagkamasulundon
Si Shelley ug ako misugod sa pagpalit sa nag-unang mga pagkaon alang sa among home storage niadtong Enero 1977 ug hinay-hinay nga nagpadayon sa pagpalit hangtud nga gikasal kami sa Abril niadto nga tuig. Sa wala pa ang among kasal, among gitipigan ang mga pagkaon sa balay sa akong ginikanan.
Gisul-ob ni Shelley ang panit nga singsing isip singsing sa kasal sa dugay nga panahon samtang akong gihuman ang undergraduate studies ug dayon sa dental school. Sa mga panahon sa pagpursige og edukasyon, ang among pamilya mibalhin og kadaghan. Kami naanad pagdala-dala og mga binaldi nga trigo sa pagbalhin-balhin og apartment, balay, ug siyudad. Ang among mga higala misugod sa paglikay kanamo matag higayon kami mobalhin, apan sa wala madugay nga katuigan, mapasalamaton kaayo kami sa pagsunod sa tambag sa mga lider sa Simbahan.
Sa dihang migradwar ko sa dental school ug misugod sa pagkadentista, si Shelley ug ako adunay duha ka anak ug wala gyuy kwarta. Mapasalamaton, nabuhi kami sa mga pagkaon nga among gipalit alang sa food storage sa wala pa mi maminyo. Ang among pagkamasulundon sa propetikanhon nga tambag nakapanalangin sa among kinabuhi pag-usab mga sobra na sa usa ka dekada ang milabay sa dihang nagminyo mi, sa dihang nakompleto na nako ang dugang nga pag-eskwela ug anaa na sa orthodentic residency. Kami walay kwarta na usab, ug imbis nga mobayad og mga pagkaon gamit ang mga credit card o hinulaman nga pundo, kami napanalanginan nga makapakaon sa among pamilya (nga karon naglakip na og upat ka mga anak) gikan sa among supply.
Sukad niadtong mga tuiga, kami napanalanginan sa daghang mga paagi pinaagi sa pagsunod sa pulong sa propeta. Kami nakakat-on nga dili magpangutana sa katinuod sa mga panudlo sa mga propeta ug apostoles o maghunahuna kon kini ba adunay kahulugan. Kami nakakat-on nga pinaagi sa pagsunod—ug pagsunod diha-diha dayon—sa ilang tambag, ang among kinabuhi mapanalanginan.
Pagkat-on sa Pagpaminaw sa mga Propetikanhong Pulong
Ang uban mahimong motawag sa among gibuhat nga sunod-sunod lang nga wala maghunahuna. Apan anaa kanamo ang personal nga saad sa Ginoo nga ang mga propeta dili mopasalaag kanato.3 Ang pagkasayud niini nakatabang kanamo nga maminaw sa ilang mga tingog sama nga kami naminaw sa Iyahang tingog (tan-awa sa D&P 1:38).
Kami usab nakakat-on nga ang buhi nga mga propeta sagad modapit kanato sa pagbuhat sa mga butang, dili sila mogamit og mga pulong sama sa gisugo o gipugos. Ang ilang pamaagi mabination ug malumo, apan kana wala naghatag kanato og rason nga dili mosunod. Kon si Shelley ug ako naglantaw sa mga pagdapit isip mga sugo, kami sa kanunay napanalanginan.
Kami usab nakakat-on sa pag-ila sa ilang direksyon pinaagi sa pagpaminaw niining hugpong sa mga pulong “Namalandong ko …” o “Adunay usa ka butang nga kanunay nakong gihunahuna …” o “Mibati ko nga sultihan kamo …” o “Tuguti ko sa pagtambag kaninyo kabahin sa …” o “Naglaum ko nga …” Kini ug uban pang susama nga mga hugpong sa pulong mga timaan sa pagtabang kanato nga masayud unsa ang anaa sa hunahuna ug kasingkasing sa dinihugang mga sulugoon sa Ginoo.
Usa pa ka laing butang nga makatabang kanato nga makadungog sa tingog sa Ginoo samtang kita maminaw sa mga propeta ug apostoles mao ang pagpaminaw pag-ayo kon sila mokutlo sa ubang mga propeta ug apostoles. Ang Ginoo nagtudlo nga Iyang iestablisar ang Iyang pulong pinaagi sa ba-ba sa duha o tulo ka saksi (tan-awa sa 2 Mga Taga-Corinto 13:1; D&P 6:28).
Tungod kay ang mensahe sa pagpaningkamot sa kaugalingon gibalik-balik og kadaghan sa kinatibuk-ang komperensya sa wala pa kami ma-engaged, ang akong asawa ug ako mibati sa mensahe nga alang gayud kanamo nianang higayona. Kami nadasig sa pagsunod niana nga tambag sa dayag nga paagi. Hinoon, ang pagsunod sa propeta dili sa kanunay kabahin sa pagpakita og debosyon; sa kanunay ang atong pagkamasulundon mapakita sa gagmay, mas personal nga mga pamaagi. Dili igsapayan kon ang uban nasayud sa atong pagkamasulundon o wala, ang Ginoo nasayud. Ug Siya mopanalangin kanato sa atong pagkamasulundon ug moandam og pamaagi nga kini mahimong posible.
Karon si Shelley nagsul-ob sa mas tradisyonal nga singsing sa kasal, apan gitipigan niya ang kadtong panit isip handumanan sa mga katuigan. Alang kanamo kini simbolo sa among sayo nga desisyon nga mosunod kanunay sa tambag sa propeta isip mahinungdanon nga bahin sa kinabuhi sa among pamilya. Karon samtang kami nagtan-aw sa among mga anak nga nagpadako sa ilang mga anak, kami mapasalamaton nga ang matinud-anong pagsunod sa propeta sa Ginoo, si Presidente Thomas S. Monson, kabahin usab sa ilang pamilya. Alang kanamo kining pagkamasulundon usa ka talagsaong panulundon ug makita nga timaan sa pagtuman sa pakigsaad sama sa engagement ring.
Karon si Shelley nagsul-ob sa mas tradisyonal nga singsing sa kasal, apan gitipigan niya ang kadtong panit (sa ubos) isip handumanan sa mga katuigan. Alang kanamo kini simbolo sa among sayo nga desisyon nga mosunod sa tambag sa propeta.
Gilitratohan ni John Luke.