Ang Tibuok Kalibutan nga Programa sa Seminary Naglig-on sa mga Estudyante diha sa Ebanghelyo
Si Milton Reis nga taga-Portugal mag-adtoan sa lokal nga chapel. Si Frazer Cluff nga taga-Tasmania, Australia, magtambongan diha ra sa panimalay nga ang magtutudlo ang iya rang mama. Si Lauren Homer nga taga-Utah, USA, molabang sa karsada atol sa second period sa iyang klase matag duha ka adlaw sa iyang pagka-high school; si Ben Gilbert nga taga-Vermont, USA, sinemana nga motambong, sa dili pa mag-Mutual; ug sa Alabama, USA, si McKenzie Morrill magtambongan kada adlaw pinaagi sa web conference. Si Daun Park nga taga-Korea motambong sa alas 10:00 sa gabii, samtang si Jamie Greenwood nga taga-New Mexico, USA, mobangon og alas 4:00 sa buntag aron makaabut sa saktong oras sa iyang alas 5:15 sa buntag nga klase.
Tanan kini nga mga batan-on—ug dul-an sa 370,000 pang uban nga sama kanila—nagsunod sa propetikanhong tambag sa paghimo sa seminary nga usa ka prayoridad sa ilang kinabuhi.
Ang programa sa seminary, nga magsaulog sa ika-100 nga anibersaryo niining tuiga, naimplementar sa lahi nga paagi paglapas sa panahon, ug gani bisan karon ang indibidwal nga panginahanglan ug lokal nga mga kahimtang sagad nga nanginahanglan og pagpahiangay. Apan tadlas sa panahon ug sa gilay-on, usa ka butang ang nagpabiling mao gihapon: ang pagtuon sa ebanghelyo nagtabang sa mga kabatan-onan nga molig-on sa ilang mga pagpamatuod sa Manluluwas ug sa Iyang ebanghelyo.
Sa dihang si Milton Reis, 17 anyos, sa Portugal, unang mitambong sa seminary, usa ka gamayng grupo sa kabatan-onan ang magpundok matag Sabado tungod kay daghan kanila miapil og sports ug uban pang mga kalihokan sa eskwelahan nga nagkinahanglan og pagbansay ug mga hitabo matag adlaw.
Apan, karon, si Milton nagtambong og seminary atol sa semana—usahay sa dili pa siya mosulod sa klase ug usahay inigka human na. Alang kang Milton kana nagpasabut nga momata og mas sayo, ug usahay dili motambong og sosyal nga mga kalihokan sa gabii aron lang makatambong og klase.
Bisan pa, wala lantawa ni Milton nga ang seminary usa ka sakripisyo. “Kini usa ka pribelihiyo,” siya miingon. Si Milton naglaum nga makasunod sa lakang sa iyang igsoon nga babaye, kinsa nagserbisyo karon og misyon, ug ang seminary mao ang usa ka paagi nga siya mangandam. “Niining tanang mga hagit, nasayud ko nga kini alang sa akong kaayohan,” siya miingon.
Si Dia Lacno, 18 anyos, sa Pilipinas, nabunyagan sa edad nga 14 ug nagsugod dayon sa pagtambong sa seminary. Siya nagdahum nga ang klase morag kurso sa eskwelahan, nga anaa siyay homework, pakigpulong, ug ma-presure. Hinoon, siya miingon, “ang seminary naghatag kanako og kalig-on nga magaan ang buluhaton sa eskwelahan. Kon motambong ko og seminary, mobati ko nga lagsik ug relaks.”
Aron makabasa sa mga sakripisyo ug mga kalampusan sa mga estudyante sa seminary sa tibuok kalibutan, pangitaa ang “Seminary Program Anchors Students in the Gospel” diha sa news.lds.org.
Ang mga estudyante nagtambongan og seminary sa Wetterau, Germany.
© IRI