Anak nga mga Babaye sa Akong Gingharian

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana aron pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo, Pamilya, Kahupayan

Kita anak nga mga babaye sa atong Amahan sa Langit. Siya nakaila kanato, nahigugma kanato, ug adunay plano alang kanato. Apil sa plano mao ang pag-anhi sa yuta aron makat-on sa pagpili sa maayo kaysa dautan. Kon kita mopili sa pagsunod sa mga sugo sa Dios, kita nagtahud Kaniya ug nag-ila sa atong pagkatawo isip anak nga mga babaye sa Dios. Ang Relief Society nagtabang kanato sa paghinumdom niining balaanong panulundon.

Ang Relief Society ug ang kasaysayan niini naglig-on ug nagsuporta kanato. Si Julie B. Beck, kinatibuk-ang presidente sa Relief Society, miingon: “Isip anak nga mga babaye sa Dios, nag-andam kamo alang sa mahangturon nga mga pagkatinudlo, ug ang kada usa kaninyo adunay ilhanan sa pagkababaye, kinaiyahan, ug responsibilidad. Ang kalampusan sa mga pamilya, mga komunidad, niini nga Simbahan, ug ang bililhong plano sa kaluwasan nag-agad sa inyong pagkamaunungon. … Katuyoan [sa Atong Langitnong Amahan] sa Relief Society sa pagtabang sa paglig-on sa Iyang mga katawhan ug sa pag-andam kanila alang sa mga panalangin sa templo. Gitukod Niya [ang Relief Society] sa pag-abin sa Iyang anak nga mga babaye ngadto sa Iyang buhat ug sa pagkuha sa ilang tabang sa pagtukod sa Iyang gingharian ug sa paglig-on sa mga panimalay sa Zion.”¹

Ang atong Amahan sa Langit naghatag kanato og piho nga buluhaton sa pagtabang og tukod sa Iyang Gingharian. Nagpanalangin usab siya kanato og espirituhanong mga gasa nga atong gikinahanglan sa pagtuman niining piho nga buhat. Pinaagi sa Relief Society, kita adunay mga oportunidad sa paggamit sa atong mga gasa sa paglig-on sa mga pamilya, sa pagtabang niadtong nanginahanglan, ug sa pagkat-on unsaon pagpuyo isip mga disipulo ni Jesukristo.

Si Presidente Dieter F. Uchtdorf, Ikaduhang Magtatambag sa Unang Kapangulohan, miingon kabahin sa pagkadisipulo: “Pinaagi sa mapailubon nga paglakaw diha sa dalan sa pagkadisipulo, atong gipakita sa atong mga kaugalingon ang gidak-on sa atong hugot nga pagtuo ug ang atong pagkaandam sa pagdawat sa kabubut-on sa Dios kaysa ato.”²

Atong hinumduman nga kita anak nga mga babaye sa Dios ug naningkamot nga mopuyo isip Iyang mga disipulo. Samtang ato kining buhaton, makatabang kita sa pagtukod sa gingharian sa Dios dinhi sa yuta ug mahimong takus nga mobalik sa Iyang presensya.

Gikan sa mga Kasulatan

Zacarias 2:10; Doktrina ug mga Pakigsaad 25:1, 10, 16; 138:38–39, 56; “Ang Pamilya: Usa ka Pamahayag ngadto sa Kalibutan” (Liahona, Nob. 2010, 129)

Gikan sa Atong Kasaysayan

Niadtong Abril 28, 1842, si Propeta Joseph Smith miingon sa mga sister sa Relief Society: “Kamo karon nahimutang sa sitwasyon diin kamo makabuhat pinasubay niadtong mga maloloy-ong pagbati nga gitanom sa Dios diha [kaninyo]. … Kon kamo mopuyo sumala sa inyong mga pribilehiyo, ang mga anghel dili mapugngan nga mahimo ninyong mga kauban.”³

Sa pag-ila sa gahum sa Relief Society nga makaserbisyo sa uban ug makatabang sa mga indibidwal sa pagpalambo sa pagtuo, si Zina D. H. Young, ikatulo nga kinatibuk-ang presidente sa Relief Society, misaad sa mga sister niadtong 1893, “Kon siksikon ninyo pag-ayo diha sa inyong kasingkasing kamo makakaplag, uban sa tabang sa Espiritu sa Ginoo, sa perlas nga labing bilihon, ang pagpamatuod niini nga buhat.”⁴