Atong mga Panimalay, Atong mga Pamilya
Pagpangandam alang sa Kinatibuk-ang Komperensya
Ang among pamilya nakat-on nga ang pagtuon sa kinatibuk-ang komperensya makadapit sa Espiritu sa atong kinabuhi matag adlaw.
Ang akong pamilya ug ako nakakaplag nga ang labing maayo nga paagi sa pagpangandam sa sunod nga kinatibuk-ang komperensya mao ang pagpamalandong pag-ayo sa tambag nga gihatag sa miaging komperensya. Kon ang akong asawa walay buhaton, siya mobasa sa mga isyu sa komperensya sa Liahona. Dayon naningkamot siya sa paggamit sa mga pagtulun-an nga iyang nakat-unan. Sama pananglit, siya miingon kanako nga ang pakigpulong ni Elder David A. Bednar kabahin sa pagpalambo sa kalidad sa atong mga pag-ampo nakatabang kaniya nga mas matinguhaon og gugmang putli sa pagpadako sa among duha ka kiat kaayo nga anak nga mga lalaki.1
Ang pagribyu sa miaging komperensya gipaningkamutan usab nakong buhaton. Samtang naglakaw ko padulong sa eskwelahan matag buntag, maminaw ko og usa ka pamulong ug dayon mamalandong ug mag-ampo, nagtugot sa mga pagtulun-an sa mga propeta nga motuhop sa akong kasingkasing ug hunahuna. Nangamuyo ko sa Langitnong Amahan kabahin sa mga buluhaton nako nianang adlawa ug sa akong mga responsibilidad isip bana, amahan, usa ka Santos sa Ulahing mga Adlaw, estudyante, ug tagilungsod.
Usa ka buntag mibati ko nga may kalabutan gayud sa akong mga sirkumstansya ang pakigpulong ni Elder L. Tom Perry nga “Ipahimo Niya Kini sa Kayano”.2 Gigamit ni Elder Perry ang mga baruganan nga gitudlo ni Henry David Thoreau sa Walden sa pagpayano sa atong kinabuhi pinaagi sa pagpuyo sa espirituhanong paagi ug pag-angkon og kahupayan gikan sa kasamok sa kalibutan. Tungod sa mga kinahanglanon sa akong pag-eskwela, ang paglingaw-lingaw uban sa pamilya alang kanamo bililhon ug talagsaon. Usa ka ting-init sa wala pa ang pamulong ni Elder Perry, kami mibisita sa Walden Pond, naggahin og panahon sa pagpamalandong sulod sa replika nga cabin ni Thoreau. Gipahimuslan namo kana nga hapon pinaagi sa pag-ubog sa Walden Pond ug paghimo og mga kastilyo nga balas diha sa baybayon. Pag-uli, ang among pamilya nagpasalamat sa Langitnong Amahan alang sa Iyang mga gilalang diin nalingaw gyud kami.
Mga bulan ang milabay samtang naglakaw ko sa mga sidewalk nga natabunan sa snow, nakahinumdom ko niadtong nindot kaayo nga adlaw sa ting-init. Isip resulta niana nga kasinatian ug sa mensahe ni Elder Perry, mas klaro nakong nasabtan kon unsa kaimportante ang paggahin og panahon uban sa akong pamilya aron magpuyo og kinabuhi nga nakasentro sa ebanghelyo.
Dugang sa indibidwal nga pagpaminaw sa mga pakigpulong, matag buntag sa Dominggo ang among pamilya maminaw og pakigpulong sa komperensya sa computer samtang nangandam nga mosimba. Gani, kausa ang akong asawa ug ako nakakita sa among upat ka tuig nga anak nga lalaki naghangyo sa iyang manghud nga mohilum aron makapaminaw siya ni Presidente Thomas S. Monson.
Ang mga pagtulun-an sa atong Manluluwas pinaagi sa ba-ba sa modernong mga propeta mga panalangin sa among pamilya. Ang paningkamot nga malakip ang mga propeta, manalagna, ug tigpadayag sa among kinabuhi matag adlaw naghimo sa Espiritu Santo nga maoy giya namo sa kanunay. Among napalanog ang mga pulong sa himno: “Salamat, O Dios, sa propeta.”3
Pinaagi sa makanunayong pagtuon sa tambag nga gihatag sa kinatibuk-ang komperensya, ang akong asawa ug ako mas nakasabut sa bag-ong mga pagtulun-an sa Ginoo inig-abut sa sunod nga kinatibuk-ang komperensya. Kami nabayaw sa espirituhanon nga paagi ug mas naandam nga modawat sa Iyang bag-ong mga pagtulun-an pinaagi sa Iyang mga sulugoon, mga propeta.
Paghulagway sa litrato pinaagi ni David Stoker