Visiting Teaching

Pagsabut sa Gahum sa Pagpangalagad

Sa Kinatibuk-ang Kapangulohan sa Relief Society

Ang atong Langitnong Amahan nagsugo kanato sa pagsunod sa mas taas nga dalan ug pagpakita sa atong pagkadisipulo pinaagi sa kinasingkasing nga pag-amuma sa Iyang mga anak.

Atol sa mortal nga kinabuhi ni Kristo, Siya nangalagad sa uban. Samtang kita nagtinguha nga mahimo Niyang mga disipulo, kita kinahanglang molantaw Kaniya isip atong panig-ingnan. Siya mitudlo, “Ang mga buhat nga kamo nakakita nga Ako mihimo kana kamo mobuhat usab” (3 Nephi 27:21). Ang Bag-ong Tugon napuno sa mga ehemplo sa pagpangalagad ni Kristo. Iyang gipadayag ngadto sa babaye sa Samaria nga Siya mao ang Mesiyas. Iyang giayo ang ugangan nga babaye ni Pedro. Iyang gibuhi pag-usab ang anak nga babaye ni Jairo alang sa iyang mga ginikanan ug si Lazaro alang sa iyang nagmasulub-on nga igsoong mga babaye. Bisan sa Iyang pag-antus sa krus, ang Manluluwas “mipahayag og kahingawa alang sa Iyang inahan, kinsa niadtong higayona tingali usa na ka biyuda nga nagkinahanglan og pag-atiman.”¹ Sa krus, Iyang gihangyo si Juan sa pagbantay sa Iyang inahan.

Si Julie B. Beck, kinatibuk-ang presidente sa Relief Society, miingon: “Pinaagi sa Relief Society [ug visiting teaching] kita magbansay ingon nga mga disipulo ni Kristo. Kita magkat-on unsay Iyang buot nga atong makat-unan, kita magbuhat unsay Iyang buot nga ipabuhat kanato, ug kita mahimo unsay Iyang buot nga kita mahimo.”²

Pagsabut sa Gahum sa Pagpangalagad

Ang pagpangalagad ug paghatag og kahupayan ngadto sa uban sa kanunay mao ang kasingkasing sa Relief Society. “Sa mga katuigan, ang mga sister ug lider sa Relief Society nakakat-on sa hinay-hinay ug nakapalambo sa ilang abilidad sa pag-amuma sa uban,” miingon si Sister Beck. “May mga higayon nga ang mga sister nag-focus nga makakompleto sa mga pagbisita, makatudlo og mga leksyon, ug magbilin og mga sulat kon sila nakabisita sa balay sa mga sister nga ilang bisitahanan. Kini nga mga naandang binuhatan nakatabang sa mga sister nga makat-un sa sumbanan sa pag-amuma. Sama sa mga katawhan ni Moises nga nag-focus sa pagtuman sa taas nga lista sa mga balaod, ang mga sister sa Relief Society nagsunod og daghang nasulat ug wala masulat nga mga lagda sa ilang kaugalingan sa ilang tinguha nga makasabut unsaon sa paglig-on sa usag usa.

“Tungod sa daghang panginahanglan alang sa paghupay ug pagluwas diha sa mga kinabuhi sa mga sister ug sa ilang mga pamilya karon, ang atong Langitnong Amahan nagkinahanglan kanato nga mosubay og mas maayong dalan ug mopakita sa atong pagkadisipulo pinaagi sa sinserong pag-amuma sa Iyang mga anak. Tungod sa paghunahuna niining importante nga katuyoan, ang mga lider karon gitudloan sa pagpangayo og mga report mahitungod sa espirituhanon ug temporal nga kaayohan sa mga sister ug sa ilang mga pamilya ug mahitungod sa serbisyo nga gihatag. Karon ang mga visiting teacher adunay responsibilidad nga sa ‘kinasingkasing ilhon ug higugmaon ang kada sister, tabangan siyang malig-on ang iyang pagtuo, ug hatagan og serbisyo.’”³

Ang kasaysayan sa atong Relief Society, Anak nga mga Babaye sa Akong Gingharian, ug Handbook 2: Administering the Church nagtudlo unsaon nga kita makasunod sa mas taas nga dalan ug ipakita ang atong pagkadisipulo:

Pag-ampo matag adlaw alang niadtong inyong gibisitahan ug sa ilang mga pamilya.
Pagtinguha og inspirasyon aron masayran ang panginahanglan sa inyong mga sister.
Pagbisita kanunay sa inyong mga sister aron sa paghupay ug paglig-on kanila.
Pagkontak kanunay sa inyong mga sister pinaagi sa pagbisita, pagtawag diha sa telepono, pag-sulat, pag-e-mail, pag-text, ug pagbuhat og yano nga mga butang sa pagkamabination.
Pag-abi-abi sa inyong mga sister sa simbahan.
Pagtabang sa inyong mga sister kon sila magkasakit o adunay lain nga dinaliang kinahanglanon.
Pagtudlo sa inyong mga sister sa ebanghelyo gikan sa mga kasulatan ug Mensahe sa Visiting Teaching.
Pagdasig sa inyong mga sister pinaagi sa paghimo nga maayong ehemplo.
Pagreport sa mga lider sa Relief Society sa espiritwal ug temporal nga kaayohan sa inyong mga sister.⁴

Pag-focus sa Pagpangalagad

Kita ang mga kamot sa Ginoo. Nagdepende Siya sa matag usa kanato. Kon mas nakita nato nga ang buluhaton sa visiting teaching usa sa atong labing importante nga responsibilidad, kita mas moalagad niadtong atong bisitahan.

Mosangkap kita og mga kasinatian nga modapit sa Espiritu ug motabang sa atong mga sister nga ipalambo ang pagtuo ug personal nga pagkamatarung.
Moamuma kita og maayo niadtong atong gibisitahan ug motabang kanila nga malig-on ang ilang panimalay ug pamilya.
Molihok kita kon ang atong mga sister nanginahanglan.

Ang mosunod mao ang ehemplo nila ni Maria ug Gretchen—mga visiting teacher kinsa nakasabut sa gahum sa pagpangalagad. Dinhi atong makita nga ang mga visiting teacher adunay oportunidad nga mobisita sa tinagsa-tagsa o nga magkauban. Ilang makonsiderar ang ilang “pag-amuma” bisan kon dungan o nagtinagsa sila nga makabisita ug makahatag og mensahe. Sila makahimo sa angay nga buhaton bisan wala sugoa. Sila aktibong makatinguha, makadawat, ug makatuman sa personal nga pagpadayag aron masayud unsaon sa pagtubag sa espiritwal ug temporal nga mga panginahanglan sa matag sister nga ilang bisitahan.

Si Rachel mabdos sa iyang unang anak ug kinahanglang kanunay nga mopahulay. Ang iyang mga visiting teacher nag-ampo aron madasig unsa ang labing maayo nga paagi sa pagtabang kaniya. Si Maria, kinsa nagpuyo sa duol, kasagaran makatabang diha sa balay ni Rachel sa dili pa motrabaho. Usa ka adlaw iyang gilimpyohan ang usa ka bahin sa kaligoanan; pagkasunod adlaw ang nahibilin iyang gilimpyohan. Sa laing adlaw iyang gi-vacuum ang sala, pagkasunod adlaw iyang giandaman og paniudto si Rachel. Ug sa ingon nagpadayon ang iyang pagpangalagad samtang siya nanlaba, nagpaspas sa abog, o bisan unsa nga gikinahanglan ni Rachel.

Si Gretchen kanunay manawag ni Rachel sa telepono aron sa paglingaw kaniya. Usahay sila mag-istoryahanay ug mangatawa. Usahay sila si Gretchen ug Maria mobisita ni Rachel sa kilid sa iyang kama ug mopakigbahin sa ilang pagpamatuod, sa kasulatan, o sa Mensahe sa Visiting Teaching. Ug human nga natawo ang bata ni Rachel, padayon silang mitabang kaniya.

Niining mga panahona, sila si Maria ug Gretchen nakig-alayon usab sa kapangulohan sa Relief Society alang sa ubang pag-amuma nga gikinahanglan ni Rachel ug sa iyang pamilya. Ang kapangulohan sa Relief Society nakigtambag sa bishop ug sa ward council aron ang mga home teacher ug uban makahatag og dugang tabang.

Ang pagpangalagad nahimong mas nindot samtang kining mga sister nakapalambo og gugma sa usag usa ug samtang sila mipakigbahin og espirituhanong mga kasinatian. Isip mga visiting teacher kita makasunod niining sumbanan ug mga baruganan sa pagpangalagad ug pagdawat sa sama nga mga panalangin.

Pagpangalagad sama sa Gibuhat ni Kristo

“Ingon nga matinud-anon nga mga disipulo sa Manluluwas, nagpalambo kita sa atong abilidad sa pagbuhat sa mga butang nga Iyang buhaton kon Siya ania pa unta dinhi,” miingon si Sister Beck. “Nahibalo kita nga alang Kaniya ang atong pag-amuma mao ang importante, ug busa kita naningkamot sa pag-focus diha sa pag-amuma sa atong mga sister kay sa paghuman sa mga listahan sa mga butang nga pagabuhaton. Ang tinuod nga pagpangalagad mas masukod pinaagi sa giladmon sa atong gugmang putli kay sa kahingpit sa atong mga numero.”⁵

Isip mga visiting teacher kita masayud nga kita nagmalampuson sa atong pagpangalagd kon ang atong mga sister makasulti nga: “Ang akong mga visiting teacher nagtabang kanako nga motubo sa espirituhanong paagi. Nasayud ko nga ang akong mga visiting teacher nabalaka kaayo kanako ug sa akong pamilya, ug kon ako adunay mga problema, nasayud ko nga ila kong tabangan.” Pinaagi sa pagsunod sa mas taas nga dalan isip mga visiting teacher, kita nag-apil sa milagroso nga buhat sa Ginoo ug sa pagkab-ut sa mga katuyoan sa Relief Society nga mao ang pagpalambo sa pagtuo ug personal nga pagkamatarung, paglig-on sa mga pamilya ug panimalay, ug pagtabang sa nanginahanglan.

Paghulagway sa litrato pinaagi ni Jerry Garns