Pagsaulog sa mga Templo!
Si Darcie Jensen nagpuyo sa California, USA.
Sa dihang ang Templo sa Salt Lake nakompleto niadtong 1893, nalipay ang mga Santos sa Ulahing mga Adlaw. Milungtad og 40 ka tuig ang ilang pagtukod sa templo. Tungod kay ang mga bata miamot og kwarta aron sa pagtabang sa pagtukod sa templo, si Presidente Wilford Woodruff nakahukom sa pagpahigayon og lima sa espesyal nga mga sesyon sa pagpahinungod aron makatambong ang mga bata.
Karon ang mga templo anaa sa tibuok kalibutan, ug ang mga bata nagtabang gihapon sa pagsaulog sa pagkakompleto sa mga templo. Tan-awa giunsa sa mga bata ang pag-apil kaniadto ug karon.
Labaw sa 12,000 ka mga bata ang miadto sa Templo sa Salt Lake alang sa pagpahinungod. Kini nga mga bata gikan sa Sugar House Ward misakay og tren.
Kini nga tiket nakapatugot sa mga bata hangtud sa edad nga 16 sa pagtambong sa espesyal nga mga tulumanon sa pagpahinungod alang sa Templo sa Salt Lake. Ang mga Apostoles ug mga sakop sa Unang Kapangulohan namulong ngadto sa mga bata sa sulod sa templo.
Usahay ang mga templo ipahinungod pag-usab human kini ayoha. Ang mga bata sa Primary mikanta ug midala og mga suga sa mga pasundayag nga nagsaulog sa pagpahinungod pag-usab sa Templo sa Anchorage Alaska.
Kada semana samtang ang Templo sa Gilbert Arizona gitukod, ang mga bata sa Primary gikan sa Gilbert Arizona Highland Stake naghimo og mga tumong sa pagserbisyo og usa ka tawo sa ilang mga ward.
Sa dihang ang Templo sa San Diego California gitukod, ang mga bata sa Primary gikan sa Mexico mihimog mabulukong carpet alang sa templo. Ang mga General Authority mibarug sa carpet atol sa tulumanon sa pagpahimutang sa bato sa pamag-ang sa pagpahinungod.
Ang mga bata sa Primary sa Manitoba, Canada, nagbiyahe og tulo ka oras ngadto sa Templo sa Regina Saskatchewan aron sa paghikap sa mga bong-bong ug mipasalig nga moabut ang adlaw nga mosulod sa templo.
Sa open house sa Templo sa Kyiv Ukraine ang mga bata sa Primary miabi-abi sa mga bisita pinaagi sa pagkanta og “I Love to See the Temple.”
Labaw sa 800 ka mga bata sa Primary gikan sa West Africa mikanta sa “I Am a Child of God [Ako Anak sa Dios]” sa kasaulogan sa kultura sa wala pa ipahinungod ang Templo sa Accra Ghana.
Ang kada templo adunay bato sa pamag-ang nga nagpakita sa tuig nga kini gipahinungod. Sa pagpahinungod, ang mga General Authority mosilyo sa bato sa pamag-ang ginamit ang mortar. Si Isaac B., edad 9, mitabang sa pagbutang sa mortar diha sa bato sa pamag-ang sa Templo sa Kansas City Missouri.
Ang mga bata sa Primary mikanta alang ni Presidente Gordon B. Hinckley sa dihang miabut siya sa pagpahinungod sa Templo sa Aba Nigeria.
Mga litrato (gikan sa wala): sa maayong kabubut-on sa Gilbert Arizona Highland Stake; sa maayong kabubut-on sa Church History Library; sa maayong kabubut-on ni Richard N. Holzapfel; ni Lynn Howlett; ni Mabel ug Delbert Palmer; sa maayong kabubut-on ni Russell K. Anderson; ni David M. W. Pickup; ni Lori Garcia; ni Gerry Avant; ug ni Julie Dockstader Heaps; paghulagway pinaagi ni Brad Teare