Kinatibuk-ang mga Lider sa Young Women ug Relief Society Milibut sa Asia
Sulod sa siyam ka adlaw sa Nobyembre 2012 sila, Mary N. Cook, unang magtatambag sa kinatibuk-ang kapangulohan sa Young Women, ug Linda S. Reeves, ikaduhang magtatambag sa kinatibuk-ang kapangulohan sa Relief Society, mitudlo ug midasig sa mga sister ma-batan-on ug hamtong sa tibuok Area.
Ang biyahe mitukma sa pahibalo sa giusab nga kurikulom sa kabatan-onan, Come, Follow Me, diin ang mga klase sa Young Men, Young Women, ug Sunday School sa kabatan-onan magsugod sa Enero 2013. Ang bag-ong kurikulom gitumong sa pagtabang sa mga magtutudlo nga motudlo sama sa pagtudlo sa Manluluwas ug mopalambo og lig-on nga koneksyon uban sa mga miyembro sa klase.
Human sa pagbisita nila ni Sister Cook ug Sister Reeves sa Asia Area, daghang kabatan-onan sa Asia ug ilang mga ginikanan namalandong nga sila karon mas nadasig sa paglimpyo ug pag-focus sa ilang mga kaugalingon ug mahimong ehemplo sa ilang lokal nga mga komunidad.
Didto sa Hong Kong, si Sister Reeves misaad sa kabatan-onan, “Kon magpabilin kamo nga limpyo sa inyong kinabuhi, makabarug kamo nga may pagsalig sa atubangan ni bisan kinsa!”
Nadasig sa iyang mga pulong, ang 12 anyos nga si Tang Kak Kei mikomentaryo human sa miting, “Nasayud ako nga ako kinahanglang mobasa sa Basahon ni Mormon kada adlaw. Ang pagkat-on sa paghinulsol ug pagpuyo nga matarung sa unsay gitudlo sa Alang sa Kalig-on sa Kabatan-onan kanako aron nga ang Kahayag ni Kristo ug tinuod nga kalipay modan-ag pinaagi kanako.”
Didto sa India, si Sister Cook nakigkita sa mga miyembro sa bag-ong meetinghouse sa Chennai India District ug uban sa mga miyembro sa bag-ong Hyderabad India Stake ug mipahimangno sa mga young adult sa pag-andam alang sa umaabut. “Kuha og edukasyon kutob sa mahimo,” miawhag siya, “uban sa mga kahanas nga makatabang ninyo sa pagtukod sa gingharian. Focus sa inyong pamilya ug unsay inyong mahimo sa pagpanalangin sa mga sakop sa inyong pamilya, ug sa inyong espirituhanong pagpangandam aron takus kamo niadtong espirituhanong mga pag-aghat ug aron nga kamo makahibalo asa kamo paingon ug unsay buhaton.”
Didto sa Indonesia, si Sister Reeves miapil sa unang komperensya sa stake sa bag-ong Surakarta Indonesia Stake. “Gibati namo ang ilang mapainubsanon ug mahigugmaong mga espiritu. Pagkamatinud-anon nga mga miyembro!” siya miingon.
Mibisita dayon si Sister Reeves sa Malaysia, diin iyang gihisgutan uban sa grupo sa mga sister sa Relief Society ang labing dinalian nga isyu isip usa ka organisasyon diha sa Malaysia ug sa unsa nga paagi nga ang Simbahan makahatag og giya ug inspirasyon.
Didto sa Taiwan, si Sister Reeves mikomentaryo sa kalig-on ug kamahalaron sa lokal nga mga miyembro. “Nalipay kaayo mi nga nakahibalo sa ilang matinud-anong mga kinabuhi ug kanunayng pagtambong sa templo. … Ang mga miyembro mao ang mahigugmaong mga ehemplo sa ilang mga higala ug mga silingan,” miingon siya.
Didto sa Taiwan, si Mary N. Cook ug si Linda S. Reeves nakigkita sa mga area authority ug sa mga lider sa priesthood ug mga miyembro sa Taiwan.
Gilitratohan ni Yang Chieh-wen