Napalong ang Telepono
Seda Meliksetyan, Armenia
Niadtong Marso 1997, samtang nagpuyo sa Russian nga siyudad sa Rostov-on-Don, ang akong bana ug ako nabunyagan sa Ang Simbahan ni Jesukristo sa mga Santos sa Ulahing mga Adlaw.
Samtang nagtuon ko sa mga doktrina sa Simbahan, daghan sa akong pangutana natubag. Makapainteres ang pagkat-on kabahin sa plano sa kaluwasan, lakip na ang buhat sa bunyag alang sa patay. Natingala ko sa pagkasayud nga kita mabunyagan para sa atong namatay nga katingulangan.
Usa ka tuig human sa among bunyag, ang presidente sa misyon midapit namo sa pagpangandam sa pagsulod sa templo. Isip kabahin sa among pagpangandam, nagsiksik mi sa among family history. Usa ka adlaw samtang naghunahuna ko sa pagbuhat niini, mikiring ang telepono. Ang akong ugangang babaye kini. Mihangyo ko kaniya kon makapadala siya nako og listahan sa nangamatay nga katingulangan sa akong bana. Siya nahibulong ug miingon nako ang bunyag alang sa patay dili doktrina ni Kristo apan hinimo-himo lang sa mga Mormon. Dili ko sigurado unsaon sa pagtubag niya kay dili ko pamilyar sa mga pakisayran sa kasulatan nga misuporta sa doktrina.
Samtang naghunahuna ko og itubag, napalong ang telepono. Sa mubong higayon dili ko sigurado unsay nahitabo, apan gibutang nako ang telepono ug miadto sa kwarto. Gikuha nako ang Bag-ong Tugon, miluhod aron sa pag-ampo, ug mihangyo sa Langitnong Amahan sa pagpakita nako sa tubag sa pangutana.
Pagkahuman sa akong pag-ampo, giablihan nako ang Biblia. Mibati ko nga may miingon nako nga basahon ang ika-29 nga bersikulo sa pahina nga akong naabli. Kini ang ika-15 nga kapitulo sa 1 Mga Taga-Corinto, nga naghisgut sa doktrina sa bunyag sa patay.
Natandog ug nasurprisa ko nga ang Langitnong Amahan mitubag sa akong pag-ampo diha-diha dayon. Nindot kaayo ang pagbati.
Namalandong ko niining kasinatian sa dihang mikiring ang telepono pag-usab. Ang akong ugangang babaye kini, nangutana nako nganong napalong ang telepono. Giingnan nako siya nga wala ko kahibalo ug gihangyo nako siya sa pag-abli sa iyang Biblia ug basahon ang 1 Mga Taga-Corinto 15:29.
Pipila ka adlaw ang milabay usa ka listahan sa patay nga mga paryente anaa sa akong lamesa. Ang akong ugangang babaye mibasa sa kasulatan ug mituo na nga ang Manluluwas, pinaagi ni Apostol Pablo, mitudlo sa doktrina sa bunyag alang sa patay.
Ang Dios misaad og dakong panalangin niadtong mobuhat niining makatubos nga buhat. Nasayud ko nga tinuod ni.