Semana sa Pasko sa Pagkabanhaw [Easter]

Ang atong Manluluwas nga si Jesukristo mituman sa Pag-ula—nga naglakip sa Iyang pag-antus sa Getsemani, Iyang Paglansang sa Krus sa Golgota, ug Iyang Pagkabanhaw gikan sa lubnganan—atol sa katapusang semana sa Iyang kinabuhi.

Sa Konseho sa Langit sa wala pa gimugna ang kalibutan, gipresentar sa Langitnong Amahan ang Iyang plano alang nato, Iyang mga anak. Kita misinggit sa kalipay dihang ang Langitnong Amahan mipili ni Jesus sa pagpatuman sa plano sa kaluwasan (tan-awa sa Job 38:7 ug Abraham 3:27). Gipanganak ni Maria sa Bethlehem, si Jesus nagpakabuhi nga walay sala. Tungod sa Iyang Pag-ula, kita makabalik sa pagpuyo uban sa atong Langitnong Amahan ug makadawat og kinabuhing dayon. Si Jesukristo mobalik pag-usab uban sa gahum ug himaya aron mopuyo sa kalibutan atol sa Milenyum, ug Siya ang Maghuhukom sa tanang tawo sa ulahing adlaw.

Ang mosunod mga litrato gikan sa Bible videos nagpakita sa katapusang semana sa kinabuhi sa Manluluwas. Ikonsiderar ang pagbasa sa mga bersikulo nga gilista sa matag litrato. Alang sa kompletong pagkasunod-sunod sa panghitabo, pag-refer sa tsart sa kasulatan sa upat ka Ebanghelyo sa Bible Dictionary o sa Giya ngadto sa mga Kasulatan. Ang mga Bible video anaa sa biblevideos.lds.org.

Sa ikalima nga adlaw sa wala pa ang Paglabay [Passover], si Jesus nagsakay og asno padulong sa Jerusalem sama sa gipanagna. Ang mga tawo miila Kaniya isip ilang Hari, misyagit og “Hosanna,” ug mibutang sa ilang mga sinina ug lukay sa yuta atubangan sa asno. (Tan-awa sa Mateo 21:1–11; Marcos 11:1–11; Zacarias 9:9.)

Mga Imahe © IRI

Sa ikaduhang higayon atol sa Iyang mortal nga pagpangalagad, gilimpyohan ni Jesus ang hawanan sa templo. “Ang akong balay pagatawgon nga balayng ampoanan; apan gihimo ninyo kini nga langub sa mga tulisan,” Iyang giingnan ang mga tigpangilis og kwarta (Mateo 21:13). Dayon daghan sa mga buta ug bakol ang miadto Niya sa templo, ug sila Iyang gipang-ayo. Apan dihang nakita sa halangdong mga pari ug mga eskriba ang Iyang mga milagro, nasuko sila ug nagtinguhang patyon Siya. (Tan-awa sa Mateo 21:12–17; Marcos 11:15–19.)

Mga Imahe © IRI

Si Jesukristo, ang Bugtong Anak sa Amahan, nagpakig-angay [condescended] dinhi sa yuta aron luwason ang tanang katawhan gikan sa Pagkapukan. (Tan-awa sa 1 Nephi 11:16–22, 26–33; Alma 7:10–13.)

Mga Imahe © IRI

Sa tibuok semana, ang Manluluwas namulong sa pipila sa Iyang labing mahinumduman nga mga wali, lakip sa Iyang pagtulun-an sa diyot sa biyuda. (Tan-awa sa Marcos 12:41–44; Lucas 21:1–4.)

Mga Imahe © IRI

Sa Tanaman sa Getsemani, ang Manluluwas nagluhod ug nag-ampo, ang Iyang paghingutas sa mga sala sa kalibutan nakapahimo Kaniya “sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu” (D&P 19:18). Sa wala madugay si Judas Escariote ug pundok sa armadong mga tawo misikop kang Jesus, ug ang tanang disipulo mibiya sa Ginoo. (Tan-awa sa Mateo 26:36–56; Marcus 14:32–50; Lucas 22:39–53.)

Atol sa Iyang katapusang panihapon, si Jesus misaad sa Iyang mga apostoles nga ilang madawat ang Maghuhupay, o Espiritu Santo, kon Siya mawala na. Siya mitudlo kanila sa paghinumdom Kaniya pinaagi sa pag-ambit sa sakrament. Sa dayong tapos sa kagabhion, si Jesus mihalad sa Ampo sa Pangaliya, diin nag-ampo Siya nga ang mga disipulo magkahiusa. (Tan-awa sa Mateo 26:17–30; Marcus 14:12–26; Lucas 22:14–32; Juan 13–17.)

Human sa ilegal nga pagtaral ug bangis nga paglatigo, mitugot si Jesukristo nga ilansang Siya sa krus, nagtuman sa “mahinungdanon ug katapusan nga sakripisyo” nga naghimo sa kaluwasan nga posible alang sa tanang anak sa Dios (tan-awa sa Alma 34:14–15). Sa wala pa mogabii, gitangtang sa mga sumusunod ni Jesus ang Iyang lawas sa krus, giilisan ug gipahumotan, ug gilubong. (Tan-awa sa Mateo 27; Lucas 23; Marcos 15; Juan 19.)

Pagkakaadlawon sa Dominggo, si Maria Magdalena ug ubang matinud-anon nga mga babaye miadto sa lubnganan aron dihogan pa ang lawas ni Jesus. Ilang nakita nga ang giali nga bato nabalhin ug duha ka anghel mahimayaong mideklarar: “Wala na Siya dinhi: Kay Siya nabanhaw” (Mateo 28:6). Ang nabanhaw nga Manluluwas nakabuntog sa pisikal nga kamatayon ug nakapahimo nato nga mabuhi pag-usab: “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi” (1 Mga Taga-Corinto 15:22). (Tan-awa sa Mateo 28; Marcos 16; Lucas 24; Juan 20).