Ang Importansya sa Buotang mga Higala

Ang mga higala may dakong impluwensya sa atong lihok, ilabi na sa atong mga batan-on. “Sila moimpluwensya og dako kaayo sa inyong panghunahuna ug panglihok, ug gani makatabang sa pagtino sa pagkatawo nga kamo mahimo.”¹ Ug kon mopili mo og buotang mga higala, “sila mahimong dakong kalig-on ug panalangin nganha kaninyo. … Sila motabang kaninyo nga mahimong mas maayo nga tawo ug mohimo niining mas sayon alang kaninyo nga mosunod sa ebanghelyo ni Jesukristo.”²

Sa mga pahina 52–53 niini nga isyu, si Elaine S. Dalton, kinatibuk-ang presidente sa Young Women, nagtudlo sa importansya sa pagpangita ug mahimong buotang higala. “Ang pagtinguha sa labing maayo sa laing tawo mao ang diwa sa tinuod nga panaghigalaay,” miingon siya.

Ang panaghigalaay nga gibase niining mga baruganan makatabang sa mga batan-on nga makamugna og mahangturong relasyon ug kahanas sa pakig-sosyal nga labaw pa sa pakig-“higala” diha sa internet. Isip ginikanan makapasabut mo sa inyong mga anak sa importansya nga mahimong buotang higala ug pagpili og mga higala kinsa modasig nila sa pagsunod sa ebanghelyo. Ang mosunod nga mga sugyot makatabang.

Mga Sugyot sa Pagtudlo sa mga Batan-on

Isip pamilya, siksika ang kasulatan alang sa mga ehemplo sa buotang mga higala. Hisguti ang mga butang nga nakapalig-on niana nga panaghigalaay. Ikonsiderar sila si David ug Jonathan (tan-awa sa 1 Samuel 18–23), Ruth ug Naomi (tan-awa sa Ruth 1–2), ug si Alma ug mga anak ni Mosiah (tan-awa sa Mosiah 27–28; Alma 17–20).³
Ribyuha ang seksyon sa mga higala sa Alang sa Kalig-on sa mga Kabatan-onan. Ipakigbahin sa inyong mga tin-edyer sa unsang paagi ang panaghigala nakaimpluwensya sa inyong kinabuhi. Dapita sila sa pakigbahin sa unsang paagi sila miimpluwensya ug naimpluwensya sa ilang mga higala.
Basaha ang artikulo ni Sister Dalhon niining isyu. Hisguti ang tumong sa iyang anak, si Emi, sa pagpangita og buotang mga higala. Tabangi inyong mga anak sa paghimo og tumong sa matang sa higala nga ilang pangitaon ug mamahimo.
Konsideraha nga mag-family home evening aron sa pagpakigbahin og mga ideya sa pakighigala, sama sa: “Aron makabaton og maayo nga mga higala, magminaayo ka usab nga higala. Pagpakita og tinuoray nga interes sa uban; pahiyom ug ipahibalo kanila nga kamo nagpakabana kanila.”⁴

Mga Sugyot sa Pagtudlo sa mga Bata

Ang pagkahimong higala naglakip sa pagtabang sa uban. Basaha ang “Nagbarug alang kang Caleb” sa Marso 2009 nga Liahona ug hisguti ang mga paagi nga sila magmabination sa ilang mahimamat.
Sa tanang sitwasyon, kita mohukom kon unsa kita nga matang sa higala. Kantaha og dungan ang “Maninguha Kong Mahimong Mahisama kang Jesus”⁵ ug dayon istoryahi inyong mga anak unsaon nila pagpili og buotang higala, sama sa Manluluwas, sa lain-laing sitwasyon.

Paghulagway pinaagi ni Taia Morley