Pag-inom gikan sa Tinubdan

Ni Aaron L. West

Editor, Church Publishing Services

Si Jesukristo mao ang tinubdan sa buhi nga tubig.

Kon maghisgot kita sa kanindot sa mga templo, kasagaran atong hisgutan ang mga spire, mga bintana, ug mga painting. Balaanon kitang maghisgot sa mga bunyaganan, sa mga endowment room, sealing room, ug celestial room.

Apan kon ang propeta mopahinungod sa templo sa Ginoo, iyang ipahinungod ang tibuok building, dili lang ang maanindot nga mga bahin nga makita sa tanan. Sa pag-ampo sa pagpahinungod alang sa Templo sa Kansas City Missouri, si Presidente Thomas S. Monson miingon: “Among ipahinungod ang yuta nga gibaruganan niini nga templo. Among ipahinungod ang tanang bahin niining maanindot nga estraktura, gikan sa dili makita nga pundasyon ngadto sa harianong estatuwa ni Moroni nga nagbuntaog kinatumyan.”¹ Sa dihang gilitok ni Presidente Joseph Fielding Smith ang pag-ampo sa pagpahinungod sa Templo sa Ogden Utah, iyang gipahinungod “ang pundasyon, ang mga bong-bong, ang mga salog, ang mga kisame, ang tore, ug ang tanang bahin sa building,” ug siya nag-ampo alang sa proteksyon “sa tanang mekanikal nga mga bahin, sa agianan sa mga suga ug mga kagamitan, sa ventilating system ug sa mga elevator, ug sa tanan kalabut niini nga building.”²

Mapasalamaton ako nga ang Ginoo midasig sa Iyang mga propeta sa pagpahinungod sa kada bahin sa matag templo. Bisan og ang bisagra sa pultahan o kagamitan sa suga dunay gamay nga natampo kay sa altar sa sealing room, ang maong gamay nga bahin nakatampo sa importante ug mahimayaong katuyoan sa templo.

Usa niining gamay nga bahin nakatabang nako nga makat-on og malungtarong leksyon. Didto ko sa Templo sa Salt Lake usa ka adlaw niana, nag-andam nga mogawas sa dressing room human moapil sa usa ka ordinansa alang sa mga patay. Nakakita og imnanan, nakaamgo ko nga giuhaw diay ako, maong miinom ko. Usa ka mensahe ang misulod sa akong hunahuna:

Miinom ka niining tubig dinhi sa templo, apan miinom ba ikaw sa buhi nga tubig nga ania dinhi?

Dili kadto grabe nga paghukom—malumo lang nga pagbadlong ug makapatuhop sa kalag nga pangutana.

Ang akong tubag niadto nga pangutana wala. Wala ako sa hingpit moinom sa buhi nga tubig sa templo. Akong gidawat nga akong hunahuna naglatagaw sa akong pagdawat sa mga ordinansa alang sa mga patay. Bisan og nakahimo ako og maayong buhat alang sa mga tawo kinsa nagkinahanglan sa akong tabang, wala nako tuguti ang akong kaugalingon sa pagdawat sa tanang tabang nga akong gikinahanglan.

Karon, kada adto nako sa templo, mangita ko sa tinubdan nga imnanan ug moinom. Akong gipangutana ang akong kaugalingon kon unsa ka lawom ako moinom gikan sa tinubdan sa buhing tubig. Ang akong tubag: Dili gihapon kaayo lawom. Apan ako nagkauhaw.