Pagpili sa Mas Maayong Bahin

Ni Matthew D. Flitton

Mga Magasin sa Simbahan

Usahay kinahanglang isakripisyo ninyo ang usa ka butang alang sa mas maayo.

Usa ka adlaw si Zoltán Szücs sa Szeged, Hungary, misurprisa sa iyang coach sa kayaking sa pagsulti nga dili siya moadto sa Germany para sa kompetisyon.

“Natunong kini sa adlaw sa akong bunyag, maong mibalibad ko,” miingon si Zoltán.

Sa edad nga 17, si Zoltán kadaghan nang nakadaog sa kompetisyon sa kayaking. Kini sikat nga sport sa Hungary, ug si Zoltán maayo niini—maayo nga igong mahimong propesyonal niini. Labaw pa sa pagdesisyon nga dili makaapil og usa ka kompetisyon, si Zoltán sa dili madugay moundang na sa kayaking. Aduna siyay mas importanting buhaton.

Nahimong panalangin ang kayaking ni Zoltán. Sa daghang tuig uban sa giya sa iyang coach, siya nakakat-on og pagpugong sa kaugalingon, pagmasulundon, ug pagkugi. Si Zoltán nakakat-on usab sa paglikay sa mga butang ug buhat nga makadaut sa iyang pagdula. Dili kini sayon nga kinabuhi; mingaw, ug ang pagka-propesyal mas nanginahanglan og daghang oras. Ang mga propesyonal magpraktis og 12 ka oras matag adlaw ug makigkompetinsya og Dominggo.

“Mas daghang oras akong igahin sa kayaking,” miingon si Zoltán. “Panatiko ko niini. Tungod niini, daghang butang akong napasagdan.”

Maong mihukom si Zoltán nga dili niya mapahinungod ang iyang kaugalingon sa ebanghelyo ug kayaking. Niadtong 2004 iyang giingnan iyang coach nga moundang na siya sa kayaking.

Sa sayong bahin niadtong tuiga ang mga misyonaryo nagtudlo sa mama ni Zoltán. Wala pa siya moapil sa leksyon. Siya napugos lang sa pagtambong sa bunyag sa iyang inahan. Apan natandog iyang kasingkasing dihang misulod siya sa simbahan. Misugot si Zoltán nga makigkita sa mga misyonaryo, tungod kay daw may panagsama siya nila.

“Ang mga misyonaryo nakapainteres nako kay normal silang mga tawo apan nagsunod og taas nga sumbanan,” siya miingon.

Tungod sa taas nga sumbanan nga gisunod ni Zoltán isip kayaker, dali niyang nadawat ang mga pagtulun-an sa ebanghelyo nga bililhon. Human sa duha ka bulan nabunyagan siya.

Sa sinugdanan nagtuo siya nga makapadayon siya og kayaking nga dili makigkompentinsya ma-Dominggo. Apan tungod siya usa ka matang sa tawo nga, kon may pasalig sa usa ka kalihokan, tarungon gyud ni niya, siya mipili nga hingpit nga moundang og kayaking.

Kausa gihimo niyang kalingawan ang kayaking human sa iyang bunyag. Dihang iya ning gibuhat, mihangyo ang coach niya sa pagtudlo sa uban ug pag-organisar og mga biyahe kay dili man siya moapil sa kompetinsya. Apan dili siya gusto nga mopasalig sa kayaking—o bisan unsa nga kalihokan—nga makababag sa iyang pagkadisipulo.

Busa gibitay ni Zoltán iyang bugsay ug gipahinungod iyang kaugalingon sa pagserbisyo sa Simbahan sama sa gibuhat ni Presidente Howard W. Hunter (1907–95) dihang nagminyo siya. Si Presidente Hunter usa ka malampusong musikero kinsa makatugtog og daghang instrumento. Matag gabii motugtog siya sa orchestra, apan ang estilo sa kinabuhi sa iyang mga kauban nasukwahi sa mga baruganan sa ebanghelyo. Busa, gihipos ni Presidente Hunter iyang mga instrumento ug ipagawas lang ni kon manganta ang pamilya.¹

Gimingaw si Zoltán sa kayaking, apan nakaamgo siya nga ang iyang gugma para sa kayaking dako kaayo nga basin mosobra pa kaysa iyang gugma para sa Ginoo kon nagpabilin siya sa sport.

Susama nga baruganan ang magamit sa bisan unsang kalihokan nga makapalayo nato kon unsay gusto sa Ginoo kita mamahimo. Alang kanato mas maayong magpakabuhi nga wala nianang pihong mga butang—bisan kini maayo nga mga butang—kaysa irisgo ang atong kinabuhing dayon sa pag-angkon niini.

“Ang Simbahan nahimo nakong kinabuhi,” miingon si Zoltán. “Nasayud nga ang kayaking dili mahimong panginabuhian kon gusto ko nga maaktibo ug igo ra ning kalingawan, mas sayon ang pag-undang niini. Hinoon, gusto nako ang Langitnong Amahan maoy akong focus.”

Si Zoltán nagsugod sa pagtuon sa ebanghelyo sa samang kadasig sa mga butang nga iyang gustong maangkon. Siya naghimo og tumong nga mag-misyon. Siya ganahang magpabilin sa iyang nasud ug magtudlo sa uban.

Siya miserbisyo sa Hungary ug karon nagtrabaho isip high school English teacher. Padayon niyang unahon ang ebanghelyo. “May mga butang nga atong hunungon kay nakababag ni sa dalan sa Dios,” siya miingon. “Daling hunungon ang bati kon nasayud ta nga kinahanglan natong hunungon. Kasagaran dili ta makaamgo kon kanus-a isakripisyo ang usa ka butang para sa mas maayo. Maghunahuna ta nga tungod dili ni bati, makapadayon ta niini ug magsunod gihapon sa plano sa Dios.” Apan si Zoltán nasayud nga atong hunungon ang maayo kon kini nakapugong nato sa pagsunod sa plano sa Dios alang nato.

Si Zoltán Szücs, sa Szeged, Hungary, miundang sa kayaking aron mas mogahin og panahon para sa ebanghelyo.