Mga Pakigsaad sa Templo

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi. Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

“Ang makaluwas nga mga ordinansa nga madawat sa templo nga magtugot kanato nga makabalik sa atong Langitnong Amahan diha sa mahangturong relasyon sa pamilya ug aron matugahan sa mga panalangin ug gahum gikan sa kahitas-an bililhon sa tanang sakripsiyo ug tanang paningkamot,”¹ miingon si Presidente Thomas S. Monson. Kon wala pa mo makaadto sa templo, kamo makaandam pinaagi sa:

Pagtuo sa Langitnong Amahan, ni Jesukristo, ug sa Espiritu Santo.
Pag-ugmad og usa ka pagpamatuod sa Pag-ula ni Jesukristo ug sa gipahiuli nga ebanghelyo.
Pagpaluyo ug pagsunod sa buhing propeta.
Pagpasarang alang sa rekomend sa templo pinaagi sa pagbayad sa hingpit nga ikapulo, moral nga kalimpyo, pagmatinuoron, pagtuman sa Pulong sa Kaalam, ug pagpakabuhi nga uyon sa mga pagtulun-an sa Simbahan.
Paghatag og panahon, mga talento, ug mga paagi nga makatabang sa pagtukod sa gingharian sa Ginoo.
Pag-apil sa buhat sa family history.²

Si President Monson midugang, “Samtang kita mahinumdom sa mga pakigsaad nga atong gihimo sa sulod [sa templo], mas makaagwanta kita sa mga pagsulay ug mas makabuntog sa matag tintasyon.”³

Gikan sa mga Kasulatan

Doktrina ug mga Pakigsaad 14:7; 25:13; 109:22

Gikan sa Atong Kasaysayan

“Kapin sa 5,000 ka mga Santos ang nagdasok sa Templo sa Nauvoo human sa pagpahinungod niini. …

“Ang kusog, gahum, ug mga panalangin sa mga pakigsaad sa templo makasuporta sa mga Santos sa Ulahing mga Adlaw atol sa ilang biyahe, kon sila mag-antus sa kabugnaw, kainit, kagutom, kakabus, sakit, mga aksidente, ug kamatayon.”⁴

Sama sa daghang mga sister sa Relief Society, si Sarah Rich miserbisyo isip temple worker. Siya mihisgut sa iyang kasinatian: “Kay kon dili pa tungod sa hugot nga pagtuo ug kahibalo nga gitugyan ngari kanamo didto sa templo pinaagi sa … Espiritu sa Ginoo, ang among biyahe susama ra unta sa pag-ambak ngadto sa kangitngit. … Apan kami adunay hugot nga pagtuo sa Langitnong Amahan, … pagbati nga kami Iyang pinili nga katawhan … , ug imbis magsubo, among gibati ang pagmaya nga ang adlaw sa among pagkaluwas miabut na.”⁵

Ang pagbiya dili “pag-ambak ngadto sa kangitngit” alang sa matinud-anong mga babaye nga Santos sa Ulahing mga Adlaw. Gisuportahan sila sa ilang mga pakigsaad sa templo.

The End of Parley Street, ni Glen S. Hopkinson, dili mahimong pakopyahan