Giunsa Nako sa Pagkasayud
Ang Akong Imbitasyon sa Kaluwasan
Paghulagway pinaagi ni Roger Motzkus
Isip usa ka batan-ong lalaki, mibisita ko og daghang mga denominasyon ug nalibug tungod kay ang kada usa nagtudlo og lain-laing mga interpretasyon sa mga kasulatan. Dili maayo ang akong gibati sa akong nakita nga ang pipila kanila walay tahud, mao nga miundang ko sa pagpangita og kasimbahan.
Paglabay sa pipila ka tuig usa ka higala nako, si Cleiton Lima, nabunyagan sa Ang Simbahan ni Jesukristo sa mga Santos sa Ulahing mga Adlaw. Wala siya maghisgot niini nako bisan og kami suod nga mga higala, apan sa paglabay sa panahon, akong nakita ang iyang mga kausaban. Sa mga Dominggo kasagaran moadto ko sa iyang balay sa buntag aron magdula mi og football, apan wala siya sa balay. Nahitabo ni sa duha o tulo ka Dominggo nga nagsunod. Sa katapusan gisultihan ako ni Cleiton nga dili na siya makadula og football sa mga Dominggo kay nagbalaan na siya sa adlaw sa Ginoo. Giingnan nako siya, “Nahimo kang panatiko niini nga simbahan.”
Dayon giimbitar ko ni Cleiton nga mosimba. Mibalibad ko tungod kay nadismaya gihapon ko sa relihiyon. Sulod sa 10 ka bulan, gidala ni Cleiton ang mga misyonaryo aron sa patudlo nako, apan mibalibad ko kanunay o misulti nga ako busy kaayo. Apan wala siya moundang.
Usa ka adlaw sa Hunyo, giimbitar ko niya sa pagtambong og sayaw sa Simbahan. Gikomedyahan nako siya, “Duna bay libreng pagkaon ug daghang mga babaye?” Nagkatawa, miingon siya oo!
Moangkon ko nga pilde gyud ko sa akong tiyan. Mibisita ko sa simbahan ug giganahan niini. Giabi-abi ko sa tanan, mikaon ko og daghan, ug nainteresado sa pagtambong og miting. Sa akong pag-abut sa simbahan sa Dominggo, nakahimamat ko og daghang tawo ug nakadungog sa ilang mga pagpamatuod. Dili ko pamilyar sa Basahon ni Mormon, apan akong gibati ang Espiritu sa Ginoo sa dihang ang daghang mga miyembro sa Simbahan mipamatuod, “Ako nasayud nga ang Basahon ni Mormon tinuod, nga kini mao ang Simbahan ni Jesukristo, ug nga si Joseph Smith propeta nga gitawag sa Dios.” Wala ako sukad mibati og hilabihan kanindot. Dili gihapon ko gustong makigkita sa mga misyonaryo, apan kadtong miting sa pagpamatuod nakatandog nako.
Pagkasunod semana, giimbitar na sad ko ni Cleiton sa pagsimba. Wala ko makahimo kay duna koy laing obligasyon. Akong makita ang kasubo sa iyang nawong sa dihang gisultihan nako siya nga dili ko makaadto.
Hinoon, sa buntag sa Dominggo mimata ko nga dunay tinguha nga mosimba. Mibangon ko sa pagka-6:50, nga lisud alang nako, ug nangandam ko ug naghulat nga moabut si Cleiton. Nasurprisa siya sa dihang nakita ko niya nga nagsinena ug naghulat. Nianang Dominggoha ang bishop mitudlo mahitungod sa priesthood. Kusog nakong nabati ang Espiritu ug dunay impresyon nga maminaw sa mga leksyon sa misyonaryo. Pagkahuman sa miting sa Young Men, nasayud ko nga ako magpabunyag.
Pagkahuman sa simba, akong giingnan si Cleiton, “Gusto kong magpabunyag!”
Nagtuo siyang nangomedya ko. Apan siya miingon, “kon akong tawgon ang mga elder, makigsulti ka nila?” Mitubag ko og oo.
Gitudloan ko sa mga elder. Sa dihang nakadungog ko sa mensahe sa Pagpahiuli, nakadawat ko og mas dako nga kumpirmasyon nga ako kinahanglang magpabunyag. Apan gusto kong masayud sa akong kaugalingon sa pagkatinuod sa Basahon ni Mormon. Ang mga elder mimarka sa Moroni 10:3–5 sa akong Basahon ni Mormon ug miimbitar nako sa pag-ampo ug pagpangutana sa Dios kon kini tinuod ba.
Pagkasunod gabii nahinumdom ko nga wala pa ko makabasa sa Basahon ni Mormon. Sa akong pagsugod sa pagbasa, gibati nako ang espiritu nga kusog kaayo. Nag-ampo ko, ug sa wala pa ako mahuman, nasayud ko nga ang Basahon ni Mormon tinuod. Mapasalamaton ko sa Dios sa pagtubag sa akong pag-ampo. Nabunyagan ko niadtong Hulyo 2006.
Sa wala madugay nagserbisyo ko isip misyonaryo sa Brazil Cuiabá Mission, ug akong higala nga si Cleiton nagserbisyo sa Brazil Santa Maria Mission. Among gibuhat unsay gihimo ni Cleiton kanako: nag-imbitar sa mga tawo sa pagduol ngadto ni Kristo ug sa pagtabang nila sa pagdawat sa gipahiuli nga ebanghelyo pinaagi sa pagpakita og hugot nga pagtuo diha kang Jesukristo, paghinulsol, pagpabunyag, ug pagdawat sa gasa sa Espiritu Santo. Mao gayud kini ang dalan sa kaluwasan.
Imbitaron nato kanunay ang atong mga higala ug mga paryente sa pagkat-on sa ebanghelyo, kay ang Manluluwas miimbitar sa tanan sa dihang Siya miingon, “Umari kanako” (Mateo 11:28). Nasayud ako nga kini ang Simbahan ni Jesukristo ug nga karon mao ang panahon sa pag-imbitar sa tanan sa pagduol ngadto Kaniya.