Ang Gamay nga Misyonaryo ni Lola Deny
Si Emília Maria Guimarães Correa nagpuyo sa Federal District, Brazil.
“Kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa katawhan” (2 Nephi 33:1).
Si Vitor nagpuyo uban sa iyang inahan ug igsoong babaye sa balay sa iyang Lola Deny. Ang lola ni Vitor nasakit ug dili makabangon sulod sa daghang mga semana. Mingaw siya sa iyang kwarto.
Nakahukom si Vitor nga iyang kuyugan iyang Lola Deny. Kada adlaw inig uli niya gikan sa eskwelahan, magdala siya og kopya sa Liahona ngadto sa kwarto ni Lola ug mobasa niya og mga istorya gikan sa mga pahina sa mga bata.
Human niya mabasa ang tanang mga kopya sa Liahona nga naa sa iyang pamilya, gisugdan niya pagbasa ang Basahon ni Mormon ug ang Biblia ngadto kaniya. Si Lola Deny dili miyembro sa Simbahan, apan ganahan siyang maminaw ni Vitor nga mobasa kaniya. Malipayon siyang nakat-on sa ebanghelyo.
Nangutana og daghan si Lola. Kon si Vitor wala makahibalo sa mga tubag, mangutana siya sa magtutudlo sa Primary o mangita diha sa mga kasulatan. Gitawag ni Lola si Vitor nga iyang gamay nga misyonaryo.
Giingnan ni Lola Deny si Vitor nga nakat-on siya og daghan gikan niya. Misaad siya nga mosimba uban niya kon maayo na siya. Ang iyang nakat-unan maoy nakadasig niya nga mamaayo ug magtuon pa sa ebanghelyo.
Sa dihang naayo na si Lola, iyang gituman ang iyang saad. Misimba siya uban ni Vitor aron makat-on pa sa unsay iyang gitudlo kaniya. Wala madugay nabunyagan ug nakumpirmahan si Lola. Nakatabang si Vitor kaniya nga makat-on nga ang ebanghelyo tinuod.
Pagdako ni Vitor, nahimo siyang full-time misyonaryo sa Boston Massachusetts Mission. Sa wala pa siya mobiya, miadto siya sa templo—uban ni Lola Deny.
Mga litrato sa maayong kabubut-on ni Emilia Maria Guimarães Correa