Mga Pangutana ug mga Tubag sa Templo
Ngano nga kita adunay mga templo?
Ang mga Templo sa Ang Simbahan ni Jesukristo sa mga Santos sa Ulahing mga Adlaw mao ang balaan nga mga dapit diin kita makat-on sa mga kamatuoran ug moapil sa sagrado nga mga ordinansa.
Unsay bation sa sulod sa templo?
Ang templo usa ka malinawon, balaan, ug matahum nga lugar. Ang tanan sa sulod sa templo limpyo ug hapsay. Ang tanan nagsul-ob og puti ug mag-istorya og hinay.
Unsay mahitabo sa sulod sa mga templo?
Ang usa ka asawa mabugkos ngadto sa iyang bana, ug ang mga anak mabugkos ngadto sa ilang mga ginikanan. Ang pagbugkos makapahimo sa mga pamilya nga mag-uban sa kahangturan. Sa templo, ang mga lalaki ug babaye makadawat usab og gasa sa espirituhanong mga panalangin nga gitawag og endowment. Makadawat usab sila sa endowment ug mabugkos alang niadtong namatay nga wala makahimo og mga pakigsaad sa templo.
Unsa pay mahitabo sa sulod sa mga templo?
Gawas sa pagbugkos ug sa endowment, ang ubang mga ordinansa gihimo diha sa mga templo. Ang mga tawo mahimong bunyagan ug makumpirmahan alang niadtong kinsa wala mamiyembro sa Simbahan sa buhi pa sila. Kon mag-edad na mo og 12 ug takus nga mosulod sa templo, duna moy kahigayunan nga magpabunyag ug magpakumpirma alang niadtong namatay nga walay ebanghelyo.
Unsa man kon ang akong pamilya wala makaadto sa templo?
Ang Langitnong Amahan nakaila ug nahigugma kaninyo ug sa inyong pamilya. Gusto Siya nga ang tanan makabaton sa mga panalangin sa mga ordinansa sa templo. Pagpakatakus sa pagsulod sa templo. Paghimo og tumong karon nga kamo modawat sa endowment ug magminyo sa templo sa umaabut. Ang inyong Langitnong Amahan mopanalangin kaninyo ug sa inyong pamilya.
Paghulagway ni Brad Teare