Ang Espiritu Santo Mohupay, Modasig, ug Mopamatuod

Ang gasa sa Espiritu Santo mao ang usa sa dakong panalangin nga atong madawat ning kinabuhia, kay ang Espiritu Santo mohupay, modasig, mopasidaan, molimpyo ug mogiya kanato. Siya mopuno kanato “sa paglaum ug hingpit nga gugma” (Moroni 8:26). Siya nagtudlo “sa kamatuoran sa tanan nga mga butang” (Moroni 10:5). Kita makadawat og pagpadayag ug espirituhanong mga gasa gikan sa Dios pinaagi sa Espiritu Santo. Labaw sa tanan, kita makaangkon og pagpamatuod sa Langitnong Amahan ug ni Jesukristo pinaagi sa Espiritu Santo.

Sa wala pa mo bunyagi, panagsa inyong mabati ang Espiritu Santo. Apan pinaagi lang sa pagdawat sa gasa sa Espiritu Santo human sa inyong bunyag nga matagamtaman ninyo ang kanunayng panag-uban sa Espiritu Santo, kon kamo takus. Kini nga gasa ihatag sa usa ka tighupot sa Melchizedek Priesthood pinaagi sa pagpandong sa mga kamot (tan-awa sa Mga Buhat 19:6; D&P 33:15). Matag Dominggo human niana, inyong mabag-o ang pakigsaad sa bunyag samtang moambit sa sakrament ug sa ingon makadawat sa panalangin sa Ginoo nga kamo “kanunay makabaton sa Iyang Espiritu” (D&P 20:77).

Ang Espiritu Santo mao ang ikatulong sakop sa Dios nga Kapangulohan. Si Propeta Joseph Smith mitudlo: “Ang Amahan adunay lawas nga unod ug mga bukog nga mahikap ingon sa tawo, ang Anak usab, apan ang Espiritu Santo walay lawas nga unod ug mga bukog, apan usa ka personahe sa Espiritu. Kon dili tungod niini, ang Espiritu Santo dili makapuyo sulod kanato” (D&P 130:22).

“Tungod kay ang Espiritu sa Ginoo dili mopuyo sa dili balaan nga mga templo” (Helaman 4:24), kita kinahanglang takus sa Iyang pagpakig-uban. Ato ning mahimo pinaagi sa, lakip sa uban pang mga butang, pagbaton og mahiyasong panghunahuna, pagpakabuhi nga may integridad, ug pagtinguha sa pagsunod sa kasugoan.

Human madawat ang gasa sa Espiritu Santo, kita makabuhat og daghan aron maanaa ang Iyang impluwensya kanato:

Pag-ampo.
Pagtuon sa mga kasulatan.
Pag-ambit nga takus sa sakrament.
Pagsimba diha sa templo.
Pagtan-aw og limpyo nga media, paggamit og limpyong sinultahan, ug mahiyasong panghunahuna.

Dili Nato Ibaliwala Kini nga Gasa

“Sama sa tanang mga gasa, kini nga gasa kinahanglang madawat ug dawaton sa kalipay. Sa dihang ang mga kamot sa priesthood gipandong sa inyong ulo sa pagkumpirma ninyo nga miyembro sa Simbahan, nakadungog kamo sa mga pulong, ‘Dawata ang Espiritu Santo.’ Wala kini magpasabut nga ang Espiritu Santo sa walay kondisyon mahimo ninyong kauban sa kanunay. Ang mga kasulatan nagpasidaan nato nga ang Espiritu sa Ginoo ‘dili kanunay mopuyo sa tawo’ (Genesis 6:3). Sa dihang gikumpirmahan kita, gihatagan kita sa katungod sa pagpakig-uban sa Espiritu Santo, pero kini nga katungod kinahanglang padayon natong maangkon pinaagi sa pagkamasulundon ug katakus.”

Elder Joseph B. Wirthlin (1917–2008) sa Korum sa Napulog Duha ka mga Apostoles, “Ang Dili Mahulagway nga Gasa,” Liahona, Mayo 2003, 28.

Paghulagway sa litrato pinaagi nila ni Christina Smith, Eve Tuft, Cody Bell, ug Matthew Reier