Sa Tibuok Simbahan

Panawagan alang sa mga Litrato sa Kabatan-onan

Kining tema sa Mutual karong tuiga ang “Barug kamo sa balaan nga mga dapit ug ayaw pagbalhin” (D&P 87:8). Batan-ong mga lalaki ug mga babaye, ang Liahona nangita og mga litrato ninyo nga nagbarug sa balaan nga mga dapit. Ang mga litrato mahimong nagpakita nga kamo naggahin og panahon uban sa inyong pamilya, nagserbisyo, naghimo og misyonaryo nga buhat, naghimo og art, nagtuon sa ebanghelyo, nagsuroy-suroy sa kinaiyahan, ug uban pa! Ania kon unsaon ninyo sa pagsumiter sa inyong litrato:

• Pagpakuha og litrato ninyo nga nagbarug sa usa ka balaan nga dapit.

• I-email ang inyong high-resolution nga litrato ngadto sa [e-mail].

• Sulati og mensahe kon nganong usa kini ka balaan nga dapit alang ninyo.

• Sa inyong email, palihug ilakip ang inyong tibuok pangalan, petsa sa pagkahimugso, pangalan sa ward ug stake (o branch ug district), ug email address sa inyong mga ginikanan.

Ang mga litrato sa kabatan-onan gikan sa tibuok kalibutan ipagawas sa umaabut nga isyu.

Apostol Mibisita sa Morocco

Niadtong Disyembre 2012, human makatukod sa ika-3,000 nga stake sa Simbahan didto sa Sierra Leone sa Habagatang Africa, si Elder Jeffrey R. Holland sa Korum sa Napulog Duha ka mga Apostoles mihimo og espesyal nga pagbisita sa usa ka gamay ug layo nga branch sa Simbahan sa Rabat, Morocco.

Sa usa ka espesyal nga debosyonal sa gabii sa Dominggo, si Elder Holland mipakigbahin sa gugma sa mga lider sa Simbahan alang sa kada miyembro sa Simbahan sa tibuok kalibutan, bisan unsa pa sila ka gamay o ka layo sa ilang dapit.

“Wala kamo kalimti, ug kamo kabahin sa kahibulongan nga buhat samtang ang Ginoo moila ug mopaspas sa panagpundok sa Israel niining importante nga dispensasyon,” miingon siya.

Templo sa Tegucigalpa Honduras Gipahinungod

Niadtong Dominggo, Marso 17, 2013, human sa kasaulogan sa kultura ug tulo ka semana nga open house, ang Templo sa Tegucigalpa Honduras gipahinungod sa tulo ka mga sesyon, nga gisibya ngadto sa tanang mga unit sa Honduras ug Nicaragua.

Ang mga miyembro sa Honduras, kinsa mobiyahe og daghang mga oras padulong sa Templo sa Guatemala sa Guatemala City, nalipay nga nakakita sa unang templo sa nasud nga gipahinungod. Ang templo unang gipahibalo sa sulat sa Unang Kapangulohan niadtong Hunyo 9, 2006, ug nag-ground breaking sa maong luna niadtong Septyembre 12, 2009.

Pagbisita ni Presidente Monson sa Germany

Sa ulahing bahin sa 2012 si Presidente Thomas S. Monson mibiyahe ngadto sa Germany aron makighimamat sa mga miyembro sa Simbahan sa Hamburg, Berlin, Munich, ug Frankfurt, Germany, ug sa pag-awhag nila sa pagsunod ni Jesukristo.

“Mitudlo Siya sa pagpasaylo pinaagi sa pagkamapasayloon,” iyang giingnan ang mga miyembro sa Frankfurt. “Mitudlo Siya og kapuangod pinaagi sa pagkamapuanguron. Mitudlo Siya og pagkamahalaron pinaagi sa paghatag sa Iyang kaugalingon.”

Ang kabatan-onan sa tibuok kalibutan nagpakita giunsa nila sa pagbarug sa balaan nga mga dapit.