Unsaon sa Pagserbisyo sa mga Calling sa Priesthood

Ni Presidente Thomas S. Monson

Gikan sa Abril 1987 nga pakigpulong sa kinatibuk-ang komperensya.

Nakapamalandong ba kamo sa bili sa kalag sa tawo? Naghunahuna ba kamo sa potensyal nga anaa sa matag usa nato?

Nakatambong ko og komperensya sa stake diin ang akong kanhi presidente sa stake nga si Paul C. Child miabli sa Doktrina ug mga Pakigsaad 18 ug nagsugod sa pagbasa: “Hinumdumi ang bili sa mga kalag mahinungdanon sa panan-aw sa Dios” (bersikulo 10).

Nangutana dayon si Presidente Child, “Unsa ang bili sa kalag sa tawo?” Naglikay siya nga motawag og bishop, presidente sa stake, o high councilor para sa tubag. Hinoon, mipili siya sa presidente sa elders quorum.

Ang nakuratan nga tawo dugay kaayo nga wala katubag ug dayon mipahayag, “Ang bili sa kalag sa tawo mao ang iyang kapasidad nga mahimong Dios.”

Ang tanang nanambong namalandong niana nga tubag. Mipadayon si Presidente Child sa iyang mensahe, apan nagpadayon ko sa pagpamalandong nianang makapadasig nga tubag.

Ang pagtabang, pagtudlo, pagtandog sa bililhong mga kalag nga giandam sa Amahan alang sa Iyang mensahe usa ka dako nga buluhaton. Ang kalampusan talagsa ra nga yano. Sa kasagaran giunhan ni og mga luha, pagsulay, pagsalig ug pagpamatuod.

Ang mga sulugoon sa Dios nagsalig sa kahupayan gikan sa kasiguroan sa Ginoo: “Ako magauban kaninyo sa kanunay” (Mateo 28:20). Kining talagsaong saad makatabang ninyo mga kaigsoonan sa Aaronic Priesthood kinsa gitawag sa mga katungdanan diha sa mga korum sa mga deacon, teacher, ug priest. Nag-awhag kini ninyo sa inyong pagpangandam sa pagserbisyo sa misyon. Makahupay kini ninyo sa panahon sa pagkahigawad, nga moabut sa tanan.

“Busa, ayaw pagluya diha sa maayo nga buhat,” miingon ang Ginoo, “kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko.

Tan-awa, ang Ginoo nagkinahanglan sa kasingkasing ug usa ka andam nga hunahuna” (D&P 64:33–34). Ang makanunayong pagtuo, padayon nga pagsalig, ug mainitong tinguha maoy ikahulagway niadtong nagserbisyo sa Ginoo uban sa ilang tibuok kasingkasing.

Kon si bisan kinsa nga kaigsoonan nga maabut sa akong tingog mobati nga dili andam, gani dili makatubag sa tawag sa pagserbisyo, sa pagsakripisyo, sa pagpanalangin sa mga kinabuhi sa uban, hinumdomi ang kamatuoran: “Kon kinsa ang tawgon sa Dios, ang Dios mohimo kaniyang takus.”