Mensahe sa Unang Kapangulohan
Siya Nabanhaw
Ang pagpamatuod sa reyalidad sa Pagkabanhaw ni Jesukristo usa ka tinubdan sa paglaum ug determinasyon. Ug mamahimo kini alang sa tanang anak sa Dios. Kini nahitabo nako usa ka adlaw sa ting-init sa Hunyo 1969 dihang namatay akong inahan, nakaepekto nako sukad pa niadto, ug hangtud makita ko siya pag-usab.
Ang kaguol sa temporaryong panagbulag napulihan dayon og kalipay. Kini sobra pa sa paglaum sa malipayong panagkita og usab. Tungod daghan ang gipadayag sa Ginoo ngadto sa Iyang mga propeta ug ang Espiritu Santo mipamatuod sa katinuod sa Pagkabanhaw ngari nako, akong nalantawan kon sama sa unsa ang panagkita og usab sa atong nalimpyo ug nabanhaw nga mga minahal:
“Kini mao sila kinsa motungha diha sa pagkabanhaw sa makiangayon. …
“Kini mao sila kansang mga ngalan nahisulat sa langit, diin ang Dios ug si Kristo mao ang mga maghuhukom sa tanan.
“Kini mao sila kinsa mga makiangayon nga mga tawo nga nahimo nga hingpit pinaagi ni Jesus ang tigpataliwala sa bag-o nga pakigsaad, kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo” (D&P 76:65, 68–69).
Tungod nabugto ni Jesukristo ang higot sa kamatayon, tanang mga anak sa Langitnong Amahan nga natawo dinhi mabanhaw sa lawas nga dili na mamatay. Busa ang atong pagpamatuod nianang mahimayaong kamatuoran makapawala sa ikos sa kamatayon sa minahal nga kapamilya o higala ug pulihan sa malipayong pag-paabut ug lig-ong determinasyon.
Gihatag sa Ginoo kanato ang gasa sa pagkabanhaw, diin ang atong espiritu mabutang sa hingpit nga lawas (tan-awa sa Alma 11:42–44). Ang akong inahan makita nga batan-on ug lagsik, mawala ang epekto sa katigulangon ug mga katuigan sa pag-antus. Madawat na niya ug nato isip gasa.
Apan para nato nga gustong makig-uban niya sa kahangturan kinahanglang mohimo og mga pagpili nga makasarang anang pakig-uban, sa pagpuyo uban sa Amahan ug sa Iyang Hinigugmang nabanhaw nga Anak diha sa himaya. Kana lang ang dapit diin ang pamilya mahangturong magpadayon: Ang pagpamatuod nianang kamatuoran nakapalambo sa akong determinasyon aron makasarang ko ug niadtong akong gimahal sa kinatas-ang ang-ang sa celestial nga gingharian pinaagi sa Pag-ula ni Jesukristo nga nakaimpluwensya sa atong kinabuhi (tan-awa sa D&P 76:70).
Ang Ginoo mihatag nato og giya niining panaw alang sa kinabuhing dayon diha sa mga pag-ampo sa sakrament nga makatabang nato. Kita gidapit sa pagbag-o sa atong mga pakigsaad sa bunyag matag miting sa sakrament.
Kita nagsaad sa paghinumdom kanunay sa Manluluwas. Ang timaan sa Iyang sakripisyo makatabang nato nga makasabut sa kadako sa bili nga Iyang gibayad para sa pagbugto sa higot sa kamatayon, pagtanyag nato og kalooy, ug pagpasaylo sa tanan natong sala kon kita maghinulsol.
Misaad kita nga mosunod sa Iyang mga sugo. Ang pagbasa sa kasulatan ug sa mga pulong sa buhing mga propeta ug pagpaminaw sa dinasig nga mga mamumulong sa atong miting sa sakrament makapahinumdom nato sa atong pakigsaad. Ang Espiritu Santo mopahinumdom ug modasig nato sa mga sugo nga kinahanglan natong sundon anang higayona.
Diha sa mga pag-ampo sa sakrament, ang Dios nagsaad nga maanaa kanato ang Espiritu Santo (tan-awa sa Moroni 4:3; 5:2; D&P 20:77, 79). Akong nakaplagan nianang higayona nga ang Dios ingon og personal nga nag-interbyu nako. Nagpahinumdom Siya nako sa akong nahimo nga nakapahimuot Kaniya, akong panginahanglan sa paghinulsol ug pagpasaylo, ug mga ngalan ug dagway sa mga tawo nga gusto Niyang paserbisyohan nako.
Sa mga katuigan, kanang balik-balik nga kasinatian mihimo sa paglaum ngadto sa pagbati og gugmang putli ug misiguro nga ang kalooy anaa alang nako pinaagi sa Pag-ula ug Pagkabanhaw sa Manluluwas.
Mopamatuod ko nga si Jesus mao ang nabanhaw nga Kristo, atong Manluluwas, ug atong hingpit nga ehemplo ug giya sa kinabuhing dayon.
Pagtudlo Niini nga Mensahe
Kinahanglan nga kita “mipahisama sa tanan nga mga kasulatan ngari kanato, nga kini unta mahimo alang sa kaayohan ug sa atong pagkat-on” (1 Nephi 19:23). Ikonsiderar sa pagbasa sa mga pag-ampo sa sakrament, nga makita sa Doktrina ug mga Pakigsaad 20:76–79. Human og basa sa mga pagtulun-an ni Presidente Eyring kabahin sa mga pag-ampo sa sakrament, dapita ang inyong gitudloan sa paghunahuna og paagi nga kining mga pag-ampo makagiya sa ilang kinabuhi ug makatabang nila nga makabalik sa Langitnong Amahan ug ni Jesukristo.
Gilitratohan ni Matthew Reier; Siya Nabanhaw, ni Del Parson, dili mahimong pakopyahan