Nagkaproblema ang Akong Eroplano
Craig Willie, Utah, USA
Usa ka gabii samtang gipadagan nako sa runway ang akong eroplano nga puno sa pasahero, mibati ko nga may problema sa steering system niini. Sa pagsiguro sa akong espiritwal nga impresyon, migawas ko sa taxiway ug mihimo og pipila ka 360-degree nga pagtuyok. Ingon og wala may problema.
Naghunahuna ko, “Paluparon ba ni nako ug dalhon ang mga pasahero sa ilang destinasyon sa saktong oras, o ibalik nako sa gate?” Nasayud ko ang pagbalik makalangan pag-ayo. One way ra ang taxiway; kinahanglang paabuton nako ang ground control sa paghimo og lugar aron makapadagan ko pabalik. Dayon paabuton pa namo ang tigmintenar nga susihon ang eroplano. Ang kalangay makahatag og mga problema sa airline ug sa mga pasahero nga may mga tawo nga sugaton ug mga connecting flights nga himoon. Naghunahuna pud ko kon unsay reaksyon sa maintenance department sa akong report nga ang eroplano may problema nga wala koy ikapakita gawas lang sa kusog nga pagbati.
Isip kapitan sa eroplano, responsable ko sa among kaluwasan [safety], mao nga mihukom ko nga sundon akong impresyon ug mobalik.
Sa among pag-abut sa gate, giingnan nako ang mekaniko nga akong gibati nga may problema ang eroplano apan wala masayud kon unsa kini. Wala siya motuo nga may problema.
“Siguro basa lang ang taxiway,” miingon siya. “Dangog lang siguro ang aspalto.” Bisan pa niana, miuyon siya, nga susihon ang steering gear sa pangunahan nga ligid. Human sa pagsusi niini, siya mihangyo nga ang mga pasahero pakanaugon aron masulayan niya og padagan ang eroplano.
Sa iyang pagbalik human sa 30 ka minutos, nabalaka siya pag-ayo. Atol sa pagtesting, nakadungog siya og nagbalik-balik nga daw nagkagot nga tingog. Dihang nag-brake siya sa iyang pagtuyok balik sa gate, nawad-an siya og kontrol sa eroplano ug hapit nalapas sa taxiway.
Nakit-an sa pag-inspeksyon nga wala matarung ang maintenance sa mga brake sa miaging gabii. Inig-landing sa eroplano gikan sa paglupad, dili mokupot pag-ayo ang mga brake, ug dili na nako makontrolar ang eroplano.
Gihatagan ko og laing eroplano nga paluparon, ug luwas nga gidala nako ang mga pasahero sa ilang destinasyon nga nalangay og tulo ka oras.
Mapasalamaton kong naminaw sa mga paghunghong sa Espiritu. Nasayud ko nga ang Espiritu mopahimatngon kanato kon tinguhaon nato ang paggiya sa Ginoo ug maminaw sa mga pagdasig niini.