Pagtabang sa mga Bata sa Pagpangandam alang sa Bunyag
Ang pagkabata mao ang panahon sa mga unang malipayong mga higayon. Unang higayon sa pagbisikleta, pag-eskwela, o pagtilaw og bag-ong pagkaon mao ang pipila sa kulbahinam nga panghitabo nga mohulma sa kinabuhi sa bata. Isip mga hamtong kita adunay oportunidad sa pagtabang sa mga bata diha sa dalan sa pagdiskobre. Isip mga hamtong sa Simbahan, kita may oportunidad usab sa pagtabang kanila nga motubo sa ebanghelyo (tan-awa sa D&P 68:25). Unsay atong buhaton aron masiguro nga ang bunyag sa bata—ang unang pakigsaad nga himoon sa tawo ngadto sa Langitnong Amahan—mamaayo ug makahuluganong panghitabo?
“Kini ang sukaranang katuyoan niining Simbahan sa pagtudlo sa kabatan-onan: una diha sa panimalay ug dayon sa simbahan,” mitudlo si Presidente Boyd K. Packer.1
Sa mosunod nga mga ehemplo, ang mga ginikanan nagpakigbahin giunsa nila pag-andam ilang anak alang sa sagradong mga ordinansa ug pakigsaad sa bunyag ug kumpirmasyon.
Kita Magsugod sa Bata pa
“Ang tuig nga mag-siyete anyos ang bata panahon sa pagsaulog,” miingon si Lori, inahan og upat. Siya ug ang iyang bana nagtudlo sa ilang mga anak kabahin sa bunyag sugod sa pagkatawo nila. Hinoon, kon ang matag bata mag-siyete anyos, ilang pamilya magsugod og mas pihong pagpangandam. Ilang leksyon sa family home evening kada bulan maglakip og hilisgutan kabahin sa bunyag, sama sa pakigsaad ug ehemplo ni Jesus.
Si Lori miingon nga ang mga leksyon atol sa bulan nga mag-otso anyos ang bata mahinungdanon kaayo. Iyang ipakita ilang sinina dihang gihatagan sila og pangalan ug panalangin, ug siya maghisgut sa adlaw nga gipahigayon kadto nga ordinansa.
“Kini ang tukmang higayon nga mag-focus sa mga panalangin sa pakigsaad sa templo,” gihatagan og gibug-aton ni Lori. “Among ipasabut og maayo nga ang pagpabunyag mao ang unang lakang sa pagpangandam sa pagdawat sa mga panalangin sa templo.”
Himoon Natong Kalihokan sa Pamilya
Si Monica, inahan sa upat ka anak, mirekomendar sa pagpaapil sa mga maguwang sa pagtabang sa mga manghud nilang igsoon kutob sa mahimo. “Kon makadungog sa ilang tin-edyer nga igsoon nga mopamatuod ug mopakigbahin mas makapaepektibo gayud,” siya miingon. Si Lori midugang nga usahay ilang hangyoon ang mga bata nga nag-andam sa bunyag sa pagtudlo sa ilang mga manghod unsay ilang nakat-unan.
Gamiton Nato Kini isip Himan sa Misyonaryo
Dihang nag-otso anyos ang anak ni Daniel, siya nasayud nga ang iyang anak ganahang mopakigbahin sa iyang bunyag ngadto sa iyang mga higala nga dili mga miyembro sa Simbahan. Busa mihukom sila nga imbitaron ang mga higala ni Allison sa eskwelahan ug kasilinganan sa iyang bunyag. Kini nga mga higala gihangyo sa pag-andam sa ilang paboritong bersikulo sa Biblia. Human sa bunyag, gilinyahan ni Allison ang mga bersikulo sa iyang bag-ong kasulatan ug gisulat ang ngalan sa iyang mga higala diha sa margin.
“Siyempre, isip iyang pamilya, nalambigit gayud mi niadtong adlawa. Apan amo siyang gipasagdan nga uban sa iyang mga higala ug maghisgut kanila kon unsay iyang gibati,” miingon si Daniel. “Nindot kaayo to nga higayon nga nakita among anak isip ehemplo.”
Praktison Nato ang Interbyu sa Bishop
Si Kimberly, inahan sa mga bata nga hapit nang mabunyagan, nakahinumdon nga misulod sa opisina sa bishop alang sa iyang interbyu sa bunyag dihang otso anyos pa siya. “Gikuyawan gyud ko!” Miingon si Kimberly.
Karon iyang gisiguro nga ang iyang mga anak dili makuyawan. Siya ug iyang bana naghisgut ngadto sa ilang mga anak kabahin sa interbyu sa bishop ug mangutana kanila kabahin sa bunyag nga daw giinterbyu sila. Kini nga mga interbyu wala lang magpapamilyar sa mga bata sa proseso sa interbyu—nag-awhag usab sila sa ilang mga anak sa pagpamalandong kon unsay kahulugan sa bunyag ngadto kanila.
Kita Adunay Talagsaong Oportunidad
Kini nga mga ginikanan daling makasulti nga wala maghinobra ang ilang gibuhat sa pagpangandam sa ilang mga anak sa bunyag ug kumpirmasyon, apan daghan kanila migamit sa mga pulong sama sa “kompleto” ug “makanunayon” sa paghulagway sa leksyon nga ilang gitudlo sa daghang katuigan. “Among gisiguro nga ang mga bata nakasabut nga kini importante nga bahin sa ilang kinabuhi, ug kini mahinungdanon,” miingon si Kimberly. “Amo usab nga gisiguro nga kami ang nag-andam kanila, ug wala lang maglaum nga ang ilang mga magtutudlo nagtudlo kanila.”
Katalagsaon sa oportunidad nga makatabang sa pag-andam sa mga bata nga among gimahal alang sa bunyag ug kumpirmasyon! Samtang mainampuon nato ning buhaton, ang Ginoo maanaa nato sa paghulma niining unang kasinatian sa paghimo og pakigsaad ngadto sa epektibong pundasyon alang sa espiritwal nga paglambo.
Mga paghulagway sa litrato pinaagi nila ni John Luke, Craig Dimond, ug Cody Bell